Korlada lagérgha tizimlitishni ret qilghan erkin sulaymanning saqchixanidin jesiti chiqqan

Muxbirimiz shöhret hoshur
2021-09-20
Share
Korlada lagérgha tizimlitishni ret qilghan erkin sulaymanning saqchixanidin jesiti chiqqan Xitay saqchiliri dawanchingdiki 3-nomurluq tutup turush merkizining sirtqi kirish éghizida posta turuwatqan körünüsh. 3-Nomurluq tutup turush merkizi xitay boyiche eng chong bolup, watikan shehirining ikki hessisige toghra kélidu. 2021-Yili 23-aprél.
AP

Korla weziyi'itidin xewerdar kishilerdin birining radiyomizgha inkas qilishiche, korla sheherlik teminat-soda sariyining téxnik ishichisi erkin sulayman, 7 ‏-ayning birinchi heptisi "Terbiyelesh" ke özini tizimlitish üchün saqchixanigha chaqirtilghan. Erkin sulayman özining gunahsizliqini bildürüp tizimlitishni ret qilghan. Netijide shu heptisi öyidin mejburi tutup ekitilgen erkin sulaymanning üch heptidin kéyin a'ilisige jesiti qayturulghan. Muxbirimizning korlagha qarita élip barghan téléfon ziyaretliri dwamida weqening rastliqi delillendi.

Weziyettin xewerdar kishining inkasida bayan qilinishiche, korla sheherlik teminat-soda sariyining 25 yilliq téxnik ishchisi erkin sulayman 7‏-ayning birinjchi heptisi "Terbiyelesh" ke tizimlitish üchün saqchixanigha chaqirtilghan. Erkin bu "Terbiyelesh" ke bérishning sewebini sorighinida, saqchilar uning 5 yilning aldida türkiyediki inisi bilen téléfonda sözleshkenliki we téléfon söhbet xatiriside "Mesile" körülgenliki, shuning üchün uning choqum "Terbiyelesh" ke bérishi kérekliki uqturghan.

Erkin sulayman türkiyediki inisi bilen 4 yildin buyan alaqisi üzülgenliki, ilgiriki söhbetliri heqqide eyni chaghda saqchilargha tepsiliy hésap bérip bolghanliqini bayan qilighan we özining "Terbiyelesh" ke munasip héchqandaq bir mesilisi yoqluqini éytqan. Saqchilar uning özligidin kélip tizimlitishi üchün 3 künlük möhlet bergen. Erkin sulayman "Terbiyelesh" ke ketse ishsiz qalidighanliqi we a'ilisining béqishsiz qalidighanliqini bildürüp, téléfonni qoyuwetken.

Biz bu uchurlarning toghra-xataliqini aydinglashturush üchün, korla sheherlik j x idarisigha téléfon qilduq.

Alaqidar xadimlardin biri, erkin sulayman heqqide mexsus délo turghuzulghanliqi we chétishliq kishiler üstidin tekshürüsh élip bériwatqanliqini tilgha aldi. Emma uning ölgenliki uchur heqqide melumat bermidi.

Inkasta diyilishiche, bu yil 56 yashqa kirgen korla sheherlik teminat-soda sariyida téxnik ishchi bolup ishlewatqan erin sulayman, keskin we heqqaniyetchi mijezi bilen jem'iyette tonulghan kishilerdin iken. U saqchixanigha bérishni téléfonda ret qilghandin kéyin, shu küni kéchide saqchilar uning öyige bésip kirgen, erkin sulayman özining héchqandaq gunah ötküzmigenlikini, shunga "Terbiyelesh" ke barmaydighanliqini éytqan. Saqchilar uninggha 15 künlükla "Terbiye" linidighanliqini bildürüp, yumshaq pozitsiye tutqan, erkin sulayman 15 künlük dep "Terbiyelesh" ke ekitilgen kishilerning héchbirsining téxiche öyge qaytmighanliqi we köpinchisining késilip ketkenlikini bildürüp: "Terbiyelesh" ke bérishni ret qilghan we bu ret qilishi seweplik béshigha kélidighan herqandaq aqiwetke özining teyyar ikenlikini bildürgen, bu chaghda ikki saqchi étilip bérip, uning qoligha koyza salghan we béshigha qara xalta kiydürüp saqchixanigha élip ketken.

Korladiki bir saqchi xadimi, erkin sulaymanning saqchixanigha ekitilgen künining del7 ‏-ayning8 ‏-küni ikenlikini delillidi.

Melum bolishiche, shu küni saqchilarning peylidiki bu shumluqqa shahit bolghan erkin sulaymanning ayali we bashqa uruq-tughqanliri erkin sulaymanning iz-dérikini sürüshte qilishqimu jasaret qilalmighan. Aridin üch hepte ötkende saqchilar erkin sulaymanning jesitini élip kélip a'ilisige tapshurghan we daghdughsiz halda yerlikide qoyushqa buyrughan.

Inkasta yene diyilishiche, erkin sulaymanning jesiti a'ilisige bérilgen1 ‏-awghusttin ta bügün'ge qeder, erkinning we qérindashlirining turalghusi, shundaqla erkinning méyiti yerlikke qoyulghan zaretgahliq saqchilar teripidin nazaret qilinmaqta iken. Alaqidar saqchi xadimliri erkin sulaymanning a'ilisige kirip chiqiwatqan gumanliq petichilerni közitip nazaret qiliwatqanliqini bildürüsh bilen birlikte, hazirghiche 7-8 giche kishini tutup tekshürgenlikini bayan qildi.

Alaqidar saqchi xadimliridin biri, erkin sulaymanning tutulushida uning türkiyediki inisi bilen alaqisining sewep bolghanliqini yoshurmidi. Emma u erkin sulaymanning ölüm sewebi, jümlidin qéyin-qistaqtin ölgenlik éhtimalliqi toghrisidiki so'alimizgha jawaben, sewebni özlirining éniq bilidighanliqi, emma buni ashkarilashqa bolmaydighanliqini eskertti.

Téléfonimizni qobul qilghan yene bir saqchi xadimi, erkin sulaymanning ötken ayda tutulghanliqi we saqchixanida soraqtiki mezgilide ölgenlikini ashkarilighan bolsimu, emma uning soraq jeryani we ölüm sewebi heqqide melumat bérishke bolmaydighanliqini bayan qildi.

Erkin sulayman lagérgha bérishni ret qilghanliqi üchün saqchixanigha ekitilgen we üch heptidin kéyin jesiti qayturulghan, emma uning béshigha saqchixanining ichide néme kelgülüklerning kelgenliki hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet