Анализчилар әркин туниязниң уйғур аптоном райониға мувәққәт рәисликкә қоюлушидики арқа көрүнүш һәққидә тохталди

Мухбиримиз меһрибан
2021-10-06
Share
Анализчилар әркин туниязниң уйғур аптоном райониға мувәққәт рәисликкә қоюлушидики арқа көрүнүш һәққидә тохталди Хитайниң шинҗаң райониниң муавин рәиси әркин тунияз бирләшкән дөләтләр тәшкилатидики кишилик һоқуқ кеңиши йиғинида сөз қиливатқан көрүнүш. 2019-Йили 25-июн, җәнвә.
REUTERS

30-Сентәбир күни үрүмчидә уйғур аптоном районлуқ хәлқ қурултийиниң 13-нөвәтлик даимий комитет йиғини ечилған. Йиғинда 2015-йилдин буян аптоном районниң рәислик хизмитини өтәп келиватқан шөһрәт закирниң истепаси қобул қилинип, униң орниға аптоном районлуқ һөкүмәтниң муавин рәиси әркин туниязниң мувәққәт рәис қилип тәйинлигәнлики елан қилинған.

Хитай һөкүмити уйғурларға "ирқий қирғинчилиқ" қилиш билән әйиблиниватқан бир вақитта, шөһрәт закирни уйғур аптоном райониниң рәисликидин қалдуруп, орниға әркин туниязниң рәис қилип тәйинлиниши, хитай һөкүмитиниң уйғур сияситини йеқиндин көзитип келиватқан көзәткүчиләрниң күчлүк инкасини қозғиди.

Америкадики уйғур паалийәтчилиридин дуня уйғур қурултийи хитай ишлири мудири илшат һәсән әпәнди өз қарашлирини оттуриға қойди.

Униң қаришичә, мәйли шөһрәт закир болсун, яки әркин тунияз болсун һәр иккисила хитай һөкүмитиниң өзи тәрбийәләп өстүргән вә уйғурларни бастурушидики "қолчомақлар" икән.

Илшат һәсән әпәнди әркин туниязниң уйғур аптоном райониниң мувәққәт рәисликигә тәйинлинишидә, униң хитай һөкүмитиниң уйғур районида қурған лагерлирини ақлашта көрсәткән бир йүрүш хизмәтлири асас қилинғанлиқини билдүрди.

Голландийәдики уйғур паалийәтчилиридин асийә уйғур ханим уйғур аптоном районида һөкүмәт әмәлдарлириниң вәзиписидин қалдурулуши вә йеңидин вәзипигә тәйинлинишидәк әһвалниң тибәт аптоном районидиму йүз бәргәнликини билдүрди.

Хитайниң һөкүмәт хәвәрлиридә, шөһрәт закирниң "истепа" бәргәнлики ейтилған, әмма немә үчүн "истепа" бәргәнлики чүшәндүрүлмигән.

Асийә ханим шөһрәт закирниң истепа бериш сәвәби вә әркин туниязниң униң орниға тәйинлишидики сәвәбләр һәққидә тохталди.

Асийә ханимниң билдүрүшичә, шөһрәт закир ши җинпиң вәзипигә олтуруштин илгирики хитай рәһбәрлириниң қоллиши билән юқири өрлигән хитай һөкүмитигә садиқ әмәлдарларниң бири.

Шуңа униң истепа бериш намида вәзиписидин қалдурулуши, йеқиндин буян ши җинпиң һөкүмитиниң бир түркүм юқири дәриҗилик һөкүмәт әмәлдарлирини вәзиписидин қалдуруп, йеңидин алмаштуруши биләнму алақидар болуши мумкин икән.

Асийә ханим йәнә шөһрәт закирниң орниға тәйинләнгән әркин тунияз һәққидиму тохталди.

Асийә ханим әркин туниязниң хитай һөкүмитиниң уйғурларға қарита ирқий қирғинчилиқ йүргүзүватқанлиқи хәлқарада диққәт нуқтиси болуватқан мәзгилләрдә өтигән вәзипилириниң уйғур диярида қурулған "кәспий тәрбийә орунлири" намидики лагерларға алақидар икәнликини билдүрди.

Алақидар материялдин мәлум болушичә, бу йил 59 яшқа киргән әркин тунияз 1983-йили "санҗи педагогика оқутқучилар билим ашуруш институти" ни пүттүрүш һарписида хитай компартийәсигә әза болған. Әркин тунияз 2005-йилдин 2008-йилғичә хотән вилайитиниң башлиқи, вилайәтлик парткоминиң муавин секретарилиқ вәзиписидә болған. У, 2008-йилдин 2014-йилғичә уйғур аптоном районлуқ һөкүмәтниң муавин рәиси болған. 2014-Йилдин 2016-йилғичә йәнә уйғур аптоном районлуқ парткомниң даимий һәйити болған. 2016-Йилдин 2021-йилғичә уйғур аптоном районлуқ һөкүмәтниң муавин рәиси, аптоном районлуқ парткомниң муавин секретари, уйғур аптоном районлуқ маарип хизмәт комитетиниң муавин секретари қатарлиқ вәзипиләрни өтигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт