Analizchilar erkin tuniyazning Uyghur aptonom rayonigha muweqqet re'islikke qoyulushidiki arqa körünüsh heqqide toxtaldi

Muxbirimiz méhriban
2021-10-06
Share
Analizchilar erkin tuniyazning Uyghur aptonom rayonigha muweqqet re'islikke qoyulushidiki arqa körünüsh heqqide toxtaldi Xitayning shinjang rayonining mu'awin re'isi erkin tuniyaz birleshken döletler teshkilatidiki kishilik hoquq kéngishi yighinida söz qiliwatqan körünüsh. 2019-Yili 25-iyun, jenwe.
REUTERS

30-Séntebir küni ürümchide Uyghur aptonom rayonluq xelq qurultiyining 13-nöwetlik da'imiy komitét yighini échilghan. Yighinda 2015-yildin buyan aptonom rayonning re'islik xizmitini ötep kéliwatqan shöhret zakirning istépasi qobul qilinip, uning ornigha aptonom rayonluq hökümetning mu'awin re'isi erkin tuniyazning muweqqet re'is qilip teyinligenliki élan qilin'ghan.

Xitay hökümiti Uyghurlargha "Irqiy qirghinchiliq" qilish bilen eyibliniwatqan bir waqitta, shöhret zakirni Uyghur aptonom rayonining re'islikidin qaldurup, ornigha erkin tuniyazning re'is qilip teyinlinishi, xitay hökümitining Uyghur siyasitini yéqindin közitip kéliwatqan közetküchilerning küchlük inkasini qozghidi.

Amérikadiki Uyghur pa'aliyetchiliridin dunya Uyghur qurultiyi xitay ishliri mudiri ilshat hesen ependi öz qarashlirini otturigha qoydi.

Uning qarishiche, meyli shöhret zakir bolsun, yaki erkin tuniyaz bolsun her ikkisila xitay hökümitining özi terbiyelep östürgen we Uyghurlarni basturushidiki "Qolchomaqlar" iken.

Ilshat hesen ependi erkin tuniyazning Uyghur aptonom rayonining muweqqet re'islikige teyinlinishide, uning xitay hökümitining Uyghur rayonida qurghan lagérlirini aqlashta körsetken bir yürüsh xizmetliri asas qilin'ghanliqini bildürdi.

Gollandiyediki Uyghur pa'aliyetchiliridin asiye Uyghur xanim Uyghur aptonom rayonida hökümet emeldarlirining wezipisidin qaldurulushi we yéngidin wezipige teyinlinishidek ehwalning tibet aptonom rayonidimu yüz bergenlikini bildürdi.

Xitayning hökümet xewerliride, shöhret zakirning "Istépa" bergenliki éytilghan, emma néme üchün "Istépa" bergenliki chüshendürülmigen.

Asiye xanim shöhret zakirning istépa bérish sewebi we erkin tuniyazning uning ornigha teyinlishidiki sewebler heqqide toxtaldi.

Asiye xanimning bildürüshiche, shöhret zakir shi jinping wezipige olturushtin ilgiriki xitay rehberlirining qollishi bilen yuqiri örligen xitay hökümitige sadiq emeldarlarning biri.

Shunga uning istépa bérish namida wezipisidin qaldurulushi, yéqindin buyan shi jinping hökümitining bir türküm yuqiri derijilik hökümet emeldarlirini wezipisidin qaldurup, yéngidin almashturushi bilenmu alaqidar bolushi mumkin iken.

Asiye xanim yene shöhret zakirning ornigha teyinlen'gen erkin tuniyaz heqqidimu toxtaldi.

Asiye xanim erkin tuniyazning xitay hökümitining Uyghurlargha qarita irqiy qirghinchiliq yürgüzüwatqanliqi xelq'arada diqqet nuqtisi boluwatqan mezgillerde ötigen wezipilirining Uyghur diyarida qurulghan "Kespiy terbiye orunliri" namidiki lagérlargha alaqidar ikenlikini bildürdi.

Alaqidar matériyaldin melum bolushiche, bu yil 59 yashqa kirgen erkin tuniyaz 1983-yili "Sanji pédagogika oqutquchilar bilim ashurush instituti" ni püttürüsh harpisida xitay kompartiyesige eza bolghan. Erkin tuniyaz 2005-yildin 2008-yilghiche xoten wilayitining bashliqi, wilayetlik partkomining mu'awin sékrétariliq wezipiside bolghan. U, 2008-yildin 2014-yilghiche Uyghur aptonom rayonluq hökümetning mu'awin re'isi bolghan. 2014-Yildin 2016-yilghiche yene Uyghur aptonom rayonluq partkomning da'imiy hey'iti bolghan. 2016-Yildin 2021-yilghiche Uyghur aptonom rayonluq hökümetning mu'awin re'isi, aptonom rayonluq partkomning mu'awin sékrétari, Uyghur aptonom rayonluq ma'arip xizmet komitétining mu'awin sékrétari qatarliq wezipilerni ötigen.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet