Америкадики био-медитсина пәнлири доктури әркинай аблиз аләмдин өтти

Мухбиримиз җүмә
2020-10-25
Share
Erkinay_Abliz-4.jpg Америкадики актип уйғур зиялийлириниң бири болған доктор әркинай аблиз 24-өктәбир кесәл сәвәби билән аләмдин өтти.
Social Media

Америкадики актип уйғур зиялийлириниң бири болған доктор әркинай аблиз 24-өктәбир кесәл сәвәби билән аләмдин өтти. Әркинай аблизниң вақитсиз өлүми униң ата-ана вә уруқ-туғқанлириниң йүрәк-бағрини қанчилик ләхтә қилған болса, йеқинлириниң қәлбини шунчилик һәсрәттә қалдурди.

Доктор әркинай аблизниң алдинқи йилидин буян үчәй раки билән давалиниватқанлиқи мәлум болған иди.

Әркинай аблизниң вапати һәққидә елан қилинған тор учурлириға қариғанда, у 1976-йили бүгүр наһийисидә бир оқутқучи аилисидә дуняға кәлгән. У илгири-кейин болуп, шинҗаң педагогика университети, ню-йорк штатлиқ университети, җорҗи вашингтон университети қатарлиқ билим юртлирида бакалаверлиқ, магестирлиқ вә докурлуқ унванлири үчүн илим тәһсил қилған.

Игилинишичә, әркинай аблиз америка йемәклик вә дора ишлирини башқуруш идарисидә ишләш җәрянида меңә ракини давалаш үнүмини өстүрүш саһәсидә қолға кәлтүргән нәтиҗиси билән кәсипдашлири арисида яхши баһаға еришкән. У шу саһәдики мәхсус тәтқиқат нәтиҗиси билән докторлуқ илмий унваниға еришкән. Әркинай аблизниң йәнә хәлқаралиқ илмий журналлирида көплигән тәтқиқат мақалилирини елан қилғанлиқи мәлум.

Доктор әркинай аблиз бир тәрәптин ишләш, бир тәрәптин оқуш вә бир тәрәптин йүрәк париси болған қизини ялғуз беқип қатарға қошуш қатарлиқ қатму-қат бесимларға бәрдашлиқ берип кәлгән. Униңдин башқа у йәнә америкадики уйғурларниң җамаәтчилик ишлириғиму вақит аҗритип, бәлгилик төһпиләрни қошқан.

Қисқа, әмма тинимсиз күрәш ичидә мәнилик өткән һаятиниң тәңдин толисини рак тәтқиқатиға беғишлиған мәрһумә әркинай аблизниң җиназа намизи 25-өктәбир чүштин кейин американиң виргинийә шитати фәйрфәкис шәһиридә чүшүрүлди. Униң мейити шу күни виргинийә штатиға җайлашқан бир мусулманлар қәбристанлиқида йәрликкә қоюлди.

Корона вируси вәһимиси вә ямғурлуқ һаваға қаримастин дәпнә мурасимға қатнашқан адәмләрниң көплүки, уйғурлардики җамаәт сөйәрлик, қейин күнләрдә бир-бириниң йенида болуштәк есил әнәниләрни намаян қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.