Amérikadiki bi'o-méditsina penliri dokturi erkin'ay abliz alemdin ötti

Muxbirimiz jüme
2020-10-25
Share
Erkinay_Abliz-4.jpg Amérikadiki aktip Uyghur ziyaliylirining biri bolghan doktor erkin'ay abliz 24-öktebir késel sewebi bilen alemdin ötti.
Social Media

Amérikadiki aktip Uyghur ziyaliylirining biri bolghan doktor erkin'ay abliz 24-öktebir késel sewebi bilen alemdin ötti. Erkin'ay ablizning waqitsiz ölümi uning ata-ana we uruq-tughqanlirining yürek-baghrini qanchilik lexte qilghan bolsa, yéqinlirining qelbini shunchilik hesrette qaldurdi.

Doktor erkin'ay ablizning aldinqi yilidin buyan üchey raki bilen dawaliniwatqanliqi melum bolghan idi.

Erkin'ay ablizning wapati heqqide élan qilin'ghan tor uchurlirigha qarighanda, u 1976-yili bügür nahiyiside bir oqutquchi a'iliside dunyagha kelgen. U ilgiri-kéyin bolup, shinjang pédagogika uniwérsitéti, nyu-york shtatliq uniwérsitéti, jorji washin'gton uniwérsitéti qatarliq bilim yurtlirida bakalawérliq, magéstirliq we dokurluq unwanliri üchün ilim tehsil qilghan.

Igilinishiche, erkin'ay abliz amérika yémeklik we dora ishlirini bashqurush idariside ishlesh jeryanida ménge rakini dawalash ünümini östürüsh saheside qolgha keltürgen netijisi bilen kesipdashliri arisida yaxshi bahagha érishken. U shu sahediki mexsus tetqiqat netijisi bilen doktorluq ilmiy unwanigha érishken. Erkin'ay ablizning yene xelq'araliq ilmiy zhurnallirida köpligen tetqiqat maqalilirini élan qilghanliqi melum.

Doktor erkin'ay abliz bir tereptin ishlesh, bir tereptin oqush we bir tereptin yürek parisi bolghan qizini yalghuz béqip qatargha qoshush qatarliq qatmu-qat bésimlargha berdashliq bérip kelgen. Uningdin bashqa u yene amérikadiki Uyghurlarning jama'etchilik ishlirighimu waqit ajritip, belgilik töhpilerni qoshqan.

Qisqa, emma tinimsiz küresh ichide menilik ötken hayatining tengdin tolisini rak tetqiqatigha béghishlighan merhume erkin'ay ablizning jinaza namizi 25-öktebir chüshtin kéyin amérikaning wirginiye shitati feyrfekis shehiride chüshürüldi. Uning méyiti shu küni wirginiye shtatigha jaylashqan bir musulmanlar qebristanliqida yerlikke qoyuldi.

Korona wirusi wehimisi we yamghurluq hawagha qarimastin depne murasimgha qatnashqan ademlerning köplüki, Uyghurlardiki jama'et söyerlik, qéyin künlerde bir-birining yénida bolushtek ésil en'enilerni namayan qildi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.