Exmet dawut'oghlu: "Imza 100 minggha yetkende b d t we türkiye parlaméntigha tapshurup bérimiz"

Ixtiyariy muxbirimiz erkin tarim
2021-06-24
Share
Exmet dawut'oghlu: Türkiye kélechek partiyesi re'isi exmet dawut'oghlu ependi muxbirlarni kütüwélish yighinida sözlimekte. 2021-Yili 22-iyun, enqere, türkiye.
RFA/Erkin Tarim

Türkiye kélechek partiyesi re'isi exmet dawut'oghlu türkiye bilen xitay arisida tüzülgen "Jinayetchilerni öz'ara ötküzüp bérish kélishimi" ning türkiye parlaméntida maqulluqtin ötüshini tosush üchün 3-ayning 8-küni türkiye boyiche imza yighish pa'aliyiti qozghighanliqini jakarlighanidi. Exmet dawut'oghlu ependi 6-ayning 22-küni muxbirlarni kütüwélish yighini chaqirip bu imza toplash pa'aliyitide hazirghiche 80 ming imza yighilghanliqini, yüz minggha yetkende bularni birleshken döletler teshkilati bilen türkiye parlaméntigha tapshurup béridighanliqini bayan qildi.

U, Uyghurlar bilen bolghan qérindashliq munasiwitini orundash üchün imza toplash pa'aliyiti bashlighanliqini bayan qilip mundaq dédi: "Kélechek partiyesi qurulghan kündin tartip sherqiy türkistan dewasi üchün, sherqiy türkistandiki ayallarning ippiti we sherqiy türkistanliq balilarning imani üchün, sherqiy türkistandiki jaza lagérlirida iskenjide turuwatqan qérindashlirimizning heq-hoquqi üchün küresh qilmaqta we küresh qilishni dawam qilidu".

Türkiye kélechek partiyesi re'isi exmet dawut'oghlu ependi muxbirlarni kütüwélish yighinida sözlimekte. 2021-Yili 22-iyun, enqere, türkiye.

Exmet dawut'oghlu ependi sherqiy türkistan dewasini qollash üchün imza yighish pa'aliyiti ötküzgenlikini bayan qilip mundaq dédi: "Biz kélechek partiyesi bolush süpitimiz bilen pütün türkiyede imza yighish pa'aliyiti ötküzduq. Bir qanche aydin buyan bu pa'aliyetni élip bériwatimiz. Bu yil 3-ayning 8-küni partiyemizning merkizide Uyghur xanim-qizlirining mesililirini otturigha qoyush üchün mexsus yighin chaqirghaniduq. Bügünki künde pütün türkiyede imza toplash pa'aliyiti ötküzüsh arqiliq yéngi bir basquchqa qedem tashliduq".

Türkiyening sabiq bash ministiri, kélechek partiyesining re'isi exmet dawut'oghlu bu imzalarni türkiye parlaménti kishilik hoquqi komitéti qatarliq munasiwetlik organlargha tapshurup béridighanliqini bayan qilip mundaq dédi: "Biz bu imzalarni türkiye parlaménti kishilik hoquq komitétigha, her qaysi siyasiy partiyelerge tapshurup bérimiz. Qéni qarap baqayli sükütte turuwatqan adalet we tereqqiyat partiyesi bilen milletchi heriket partiyesi bu imzani körgendin kéyinmu sükütte turushni dawam qilamdikin?"

Exmet dawut'oghlu ependi bu imzalarni birleshken döletler teshkilatighimu sunidighanliqini, pa'aliyetlirini sherqiy türkistan erkinlikke érishkiche dawamlashturidighanliqini bayan qilip mundaq dédi: "Sherqiy türkistandiki zulum tügümigiche biz üchün jim turush, sükütte turush haramdur".

Ziyaritimizni qobul qilghan sultan satuq bughraxan wexpisi konya shöbisining re'isi ablet udun ependi imza yighish pa'aliyiti heqqide melumat bérish üchün ötküzülgen muxbirlarni kütüwélish pa'aliyitining yaxshi ötkenlikini bayan qildi.

U, kélechek partiyesi bashlighan imza yighish pa'aliyitining Uyghur mesilisining keng xelq ammisigha anglitish üchün zor ehmiyetke ige ikenlikini bayan qildi.

Türkiye bilen xitay arisida tüzülgen "Jinayetchilerni öz'ara ötküzüp bérish kélishimi" 2017-yili ikki dölet ministirliri arisida imzalan'ghan bolup, 2019-yili türkiye prézidénti rejep tayyip erdoghan buninggha imza qoyghan bolsimu, emma türkiye parlaméntining maqulluqidin ötmigenliki xewer qilin'ghanidi. Bu xewer tarqalghandin kéyin, 1-ayning 13-küni kélechek partiyesining yashlar yachéykisi türkiyening konya wilayitide imza yighish pa'aliyiti uyushturup, "Jinayetchilerni öz ara ötküzüp bérish kélishimi" ning türkiye parlaméntida maqulluqtin ötüshini tosushqa kirishken. Qisqighine waqit ichidila 10 ming 420 kishilik imza yighilghan bolup, bu imzalarni 17-féwral küni kélechek partiyesining mu'awin re'isi selchuq özdagh bashchiliqidiki hey'et türkiye parlaméntining re'isige hemde parlaménttiki her qaysi siyasiy partiyelerning wekillirige tapshurup bergenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet