Türkiyening sabiq bash ministiri exmet dawut'oghlu erkin alptékinni doxturxanida yoqlidi

Ixtiyariy muxbirimiz erkin tarim
2021-09-23
Share
Türkiyening sabiq bash ministiri exmet dawut'oghlu erkin alptékinni doxturxanida yoqlidi Türkiye kélechek partiyesi re'isi, sabiq bash ministir exmet dawut'oghlu d u q ning sabiq qurghuchi re'isi erkin aptékin ependini doxturxanida yoqlidi. 2021-Yili 23-séntebir, turkiye.
RFA/Erkin Tarim

Türkiye kélechek partiyesi re'isi, sabiq bash ministir exmet dawut'oghlu dünya Uyghur qurultiyining sabiq qurghuchi re'isi erkin aptékin ependini doxturxanida yoqlidi.

Kélechek partiyesi re'isi, sabiq bash ministir exmet dawut'oghlu, mu'awin re'isi selchuq özdagh, sélim timurchi we mustafa güzel qatarliq rehberlerdin terkib tapqan hey'et 23-séntebir küni chüshtin burun enqere uniwérsitéti tébbiy fakultéti doxturxanisida yétiwatqan d u q ning sabiq qurghuchi re'isi erkin alptékinni doxturxanida yoqlap hal soridi. Mezkur hal sorashta doxturxanining mudiri, erkin alptékinni dawalawatqan doxturlarmu keldi.

Kélechek partiyesi re'isi, sabiq bash ministir exmet dawut'oghlu, mu'awin re'isi selchuq özdagh, sélim timurchi we mustafa güzel qatarliq rehberlerdin terkib tapqan hey'et d u q ning sabiq qurghuchi re'isi erkin aptékin ependini doxturxanida yoqlidi. 2021-Yili 23-séntebir, turkiye.
Kélechek partiyesi re'isi, sabiq bash ministir exmet dawut'oghlu, mu'awin re'isi selchuq özdagh, sélim timurchi we mustafa güzel qatarliq rehberlerdin terkib tapqan hey'et d u q ning sabiq qurghuchi re'isi erkin aptékin ependini doxturxanida yoqlidi. 2021-Yili 23-séntebir, turkiye.

Aldi bilen erkin aliptékin ependining doxturi wolqan qozluja ependi exmet dawut'oghlu ependi bashchiliqidiki hey'etke erkin alptékinning késellik ehwali torghisida melumat bérip mundaq dédi: "Erkin aliptékin ependining salametliki eslige keldi. Gérmaniyege bérip dawalinishni dawam qilmaqchi, yéqinda balnistin chiqsa bolidu".

Arqidin exmet dawut'oghlu erkin aliptékin ependining salametlikining eslige kelgenlikidin xursen bolghanliqini we salametlik tileydighanliqini bayan qilghandin kéyin sherqiy türkistan dewasining kélechek partiyesining dewasi ikenlikini bayan qilip mundaq dédi: "Siz shundaq yaxshi bolup kétipsiz, sizni körüp bek xursen boldum. Biz her da'im silerni qollaymiz. Sherqiy türkistan dewasi bizning öz dewayimizdur. Sherqiy türkistan bizning atayurtimiz, medeniyitimizning böshüki, biz kélechek partiyesi bolush süpitimiz bilen pütün küchimiz bilen Uyghurlarning hazirqi éghir weziyitini kün tertipke élip kélishke tirishiwatimiz, bundin kéyinmu Uyghur qérindashlirimizning erkinliki üchün qolimizdin kelgen tirishchanliqni körsitimiz".

Erkin alptékin ependi kélechek partiyesi re'isi exmet dawut'oghlu we uning mu'awinlirigha rehmet éytqandin kéyin Uyghur dewasi we türkiyedin kütkenliri toghrisida toxtilip mundaq dédi: "Burun sherqiy türkistan dewasi sépida yétishken ademlirimiz az idi. Hazir bir qanche til bilidighan talantliq yétishken yashlar dewa sépimizge qoshuldi. Biz xelq'arada türkiye dölitining aliy menpe'etinimu nezerde tutqan halda sherqiy türkistan xelqining aliy menpe'eti üchün küresh qiliwatimiz. Buni xelqimizgimu her da'im tekitlewatimiz. Türkiye döliti burundin tartip Uyghurlargha ige chiqishqa tirishiwatidu, 1949-yili kommunist xitaylar sherqiy türkistanni bésiwalghandin kéyin keshmir arqiliq türkiyege kelgen lidirimiz muhemmet'imin bughra we eysa yüsüp aliptékin bashchiliqidiki köp sanda Uyghur we qazaqlarni qobul qildi. Buning üchün men rehmet éytimen. Lékin bügün Uyghurlar irqiy qirghinchiliqqa uchrimaqta, xitay hökümiti Uyghurlarni yoq qilishqa tirishmaqta. Bundaq bir weziyette türkiyemizning Uyghurlargha téximu köp köngül bölüshi kérek".

Exmet dawut'oghlu baliliq chaghlirida erkin alptékinning dadisi eysa yüsüp alptékinni köp qétim körgenlikini bayan qilip mundaq dédi: "Eysa yüsüp aliptékin 20-esirdiki türk dunyasining eng muhim rehberliridin biridur. Men kichik waqtimda eysa ependi dadamning yénigha kélip-kétetti, uni öz taghamdek körettim. U, bosniyeliklerning lidiri izzet bégowichke oxshaytti. U, éghir-bésiq, emma qet'iy iradige ige adem idi. Eysa ependi addiy-sadde, emma ghururluq kishi idi. Merhumning sherqiy türkistan dewasigha qoshqan töhpisi nahayiti zor, alla yatqin jayini jennette qilsun".

Erkin aliptékin ependi tuyuqsiz késel bolup enqerede balnista yétip qalghandin kéyin dunya Uyghur qurultiyining re'isi dolqun eysa ependi uni yoqlash üchün 18-séntebir küni enqerege kelginide türkiye saqchi da'iriliri 9-ayning 9-küni türkiye hökümitining dolqun eysa heqqide "Dölet bixeterlikige tehdit" dégen ichki qarar chiqirip, uning türkiyege kirishini ikkinchi qétim chekligenlikini bildürüp gérmaniyege qayturuwetkenidi. Shuningdin kéyin dunya Uyghur qurultiyi wexpisi mes'ulliri dolqun eysa namidin erkin aliptékin ependini doxturxanida ziyaret qilip hal soridi. Mezkur wexpining re'isi abduréshit abdulxemit ependi bu heqte melumat berdi.

Erkin aliptékin ependi bu yil 83 yashqa kirgen bolup, 15-séntebir küni uning salametliki tuyuqsiz özgirip qélip, enqere uniwérsitéti tébbiy fakultétining doxturxanisida balnista yatqanidi. Hazir uning késellik ehwali yaxshilan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet