Radiyomiz tehriri eset sulaymanning tutqundiki ukisi exmet sulayman qoyup bérilgen

Muxbirimiz shöhret hoshur
2021-04-07
Share
Radiyomiz Uyghur bölümi tehriri eset sulaymanning inisi exmet sulaymanningmu tutqunda ikenliki delillendi Radiyomiz tehriri eset sulaymanning tutqundiki inisi, qumul sheher tengritagh yézisining yéza bashliqi exmet sulayman ependi.
Photo: RFA

Radiyomiz tehriri eset sulaymanning yéqin uruq-tughqanliridin 7 kishining tutqunda ikenilki, bulardin üchining késiwétilgenliki bu yil féwralning axiriqi heptisidiki éniqlashlirimiz dawamida delillen'gen idi. Bügünki éniqlashlirimizda bulardin peqet birining, yeni sabiq yéza bashliqi exmet sulaymanning yéiqinda qoyup bérilgenliki alaqidar xadimlar teripidin ashkarilandi

Hörmetlik radiyo anglghuchilar, radiyomiz tehriri eset sulaymanning uruq-tughqanliridin 7 kishining tutqunda ikenliki delillen'gendin kéyin, biz ularning délosining tereqqiyati we salametlik ehwali heqqide dawamliq éniqlash élip barduq. Téléfonimizni qobul qilghan qumul sheher tengritagh yéziliq hökümetning bir xadimi eset sulaymanning inisi, sabiq yéza bashliqi exmet sulaymanning yéqinda qoyup bérilgenlikini ashkarilidi. Biz uningdin exmet sulayman bilen yüz körüshken-körüshmigenlikini sorighinimizda, u lagér yaki türmidin chiqqan kishilerni yoqlashqa bolmaydighaliqini bildürdi.

Biz bu uchurning toghriliqini téximu aydinglashturush üchün exmet sulayman xizmet ishligen tengritagh yézisidiki kent mes'ullirigha téléfon qilduq. Alaqidar xadimlardin biri exmet sulaymanning buningdin bir ayche awwal qoyup bérilgenliki we nöwette étiz-ériq ishliri bilen meshghul ikenlikini ashkarilidi.

Ötkenki éniqlashlirimizda eset sulaymanning akisi ehet sulayman, inisi exmet sulayman hemde newre qérindashliridin jélil osman, muhemmet osman, éli ablélim, ablajan ablélim we adil ablélimlerning tutqunda ikenliki delillen'gen bolsimu, emma ularning néme üchün tutulghanliqi, yeni tutulushigha nimilerning bahane qilin'ghanliqi aydinglashmighan idi. Shu qétimda tengritagh yéziliq saqchi xadimi exmet sulaymanning dölet bixterlik saqchiliri teripidin tutulghanliqini ashkarilighan we uning tutulush sewebidin yéza derijiliktin yuquri emeldarlarningla xewerdar ikenlikini éytqan idi.

Mezkur kent xadimi xizmet chembirikidin anglighanlirigha asasen, exmet sulaymanning kompyotéridin "Chataq" chiqip tutulghanliqini ilgiri sürdi.

Hörmetlik radiyo anglighuchilar, ilgiriki éniqlashlirimizda meshhur xeyr-saxawetchi nurtay haji qatarliq köp sanda tutqunlarning bir qétim qoyup bérilip qaytidin tutulghanliqi we hetta uzun muddetlik késiwétilgenliki melum bolghan idi. Qoyup bérilishi radiyomiz ziyaritidin 10-15 kün kéyin'ge toghra kelgen exmet sulaymanning qismitidiki bu özgirishke némining tesir qilghanliqi hazirche melum emes. Ilgiri Uyghur közetküchiler, qanun bilen bashqurulmaywatqan bir dölettiki délolarda tasadipiy netijilerning her waqit bolup turudighanliqi, bolupmu irqiy qirghinchiliqni ijra qiliwatqan xitaydek bir dölette tutulush we qoyup bérilishning peqet yerlik emeldarlarning xahshi we peyli bilen alaqidar ikenlikini ilgiri sürüshken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet