Ezerbeyjan yüksilish partiyesi rehbiri: "Uyghurlargha élip bériliwatqan irqiy qirghinchiliqqa qarshi qolimizdin kelgenni qilimiz"

Ixtiyariy muxbirimiz erkin tarim
2021-02-11
Share
Ezerbeyjan yüksilish partiyesi rehbiri: D u q mu'awin re'isi doktor erkin ekrem ezerbeyjan yüksilish partiyesi re'isi anar esedli bilen. 2021-Yili féwral, türkiye.
RFA/Erkin Tarim

D u q rehberliri ezerbeyjan yüksilish partiyesi re'isi anar esedli bashchiliqidiki hey'et bilen uchriship türk dunyasidiki mesililer bolupmu, Uyghur mesilisini ezerbeyjan jama'etchilikige qandaq anglitish toghrisida muzakire élip bardi. Muzakire axirida ezerbeyjan yüksilish partiyesi re'isi anar esedli ependi, Uyghur mesilisining ezerbeyjan xelqining öz mesilisi ikenlikini, bügün xitayning Uyghurlargha élip bériwatqan irqiy qirghinchiliqqa kishilerning diqqitini tartish üchün qolidin kelgenni qilidighanliqini tekitlidi.

D u q rehberliri ezerbeyjan yüksilish partiyesi re'isi anar esedli bashchiliqidiki hey'et bilen uchrashti. 2021-Yili féwral, türkiye.

8-Féwral küni chüshtin kéyin enqerediki Uyghur institutida ötküzülgen uchrishishqa ezerbeyjan yüksilish partiyesi re'isi anar esedli ependi, mu'awin re'isi behrem ismayilof, élshat abdullayef we partiye re'isining meslihetchisi riza hey'et qatarliqlar ishtirak qildi.

Uchrishishta aldi bilen d u q mu'awin re'isi doktor erkin ekrem söz qilip, türkiye, ezerbeyjan we bashqa türkiy jumhuriyetler arisidiki hemkarliqni kücheytish kéreklikini, türkiy jumhuriyetlirining her qaysi ministir we idare-jem'iyetliri arisidiki hemkarliqni kücheytkende, türkiy jumhuriyetliri her jehettin küchlen'gende sherqiy türkistanliqlar, iraq türkmenliri, jenubiy ezerbeyjanliqlarning awazini xelq'aragha téximu yaxshi anglatqili bolidighanliqini bayan qildi. Doktor erkin ekrem ependi Uyghurlarning hazirqi éghir weziyiti, mezkur dewaning xelq'aradiki ehwali, dunya Uyghur qurultiyi we Uyghur tetqiqat institutining pa'aliyetliri toghrisida melumat berdi.

Ezerbeyjan yüksilish partiyesi re'isi anar esedli ependi bolsa Uyghurlarning hazirqi éghir weziyitidin xewerdar ikenlikini, Uyghur mesilisi bashta türk dunyasining mesililirini dunya jama'etchilikige anglitish bolupmu türkiy jumhuriyetliri jama'etchilikige anglitish üchün hemkarliqni kücheytish kéreklikini bayan qildi.

U, xitay dölitining sherqiy türkistanda élip bériwatqan irqiy qirghinchiliq siyasitini pash qilish üchün qolidin kelgenni qilidighanliqini tekitlep mundaq dédi: "Sherqiy türkistan ezerbeyjanda her da'im hemme kishining qelbidiki muhim bir mesilidur. Biz xitayning Uyghurlargha qarita élip bériwatqan irqiy qirghinchiliqigha köp qétim naraziliq bildürüp bayanat élan qilduq. Her qaysi téléwizyelerde sözlep xelqimizge bu heqte melumat berduq. Bizning nezirimizde sherqiy türkistan mesilisi, iraq türkmenliri mesilisi, bizning qarabagh mesilisi bilen oxshash. Bularning hemmisi bizning qelbimizdiki bir yara. Bu yarilarni saqaytish, dunya jama'etchilikining diqqitini xitay sherqiy türkistanda élip bériliwatqan irqiy qirghinchiliqqa tartish üchün qolimizdin kelgenni qilimiz".

Ezerbeyjan yüksilish partiyesi yéngi qurulghan siyasiy partiye bolup, partiye nizamnamiside türkiy jumhuriyetler we türkiy milletler otturisidiki hemkarliqni kücheytish üchün partiyeler otturisidiki hemkarliqni kücheytish, pikir ambiri qurush, shérik axbarat merkezliri qurush qatarliq témilargha orun bérilgen. D u q mu'awin re'isi doktor erkin ekrem ependi ezerbeyjan yüksilish partiyesi rehberlirining d u q we Uyghur tetqiqat instituti mes'ulliri bilen élip bérilghan uchrishi'ish heqqide bizge melumat berdi.

Uchrishish axirida anar esedli ependi ezerbeyjan yüksilish partiyesining bundin kéyin Uyghurlar heqqide qilmaqchi bolghan ishliri toghrisida melumat bérip mundaq dédi: "Ezerbeyjan yüksilish partiyesi milletchilik idiyesini ilgiri süridighan partiyedur. Shunga biz pa'aliyitimizni aldi bilen ezerbeyjan xelqige sherqiy türkistan toghrisida melumat bérish bilen bashlimaqchi. Chünki yash ewladlirimizning sherqiy türkistan toghrisida melumati yoq. Ulargha türk dunyasining bolupmu Uyghur türklirining ötmüshi, bügünki weziyiti we kélechiki toghrisida melumat bérishimiz kérek. Hemmimizge melum bolghinidek bizmu 75 yil sowét ittipaqining ishghali astida qalghan bir millet. Iran zulumi astida turuwatqan milyonlighan ezerbeyjanliq türk bar. Türkiy milletler dunyaning herqaysi jaylirigha tarqilip bölünüp ketken xelq. Shunga türkiy milletler otturisidiki hemkarliqni kücheytishimiz kérek. Biz ezerbeyjan yüksilish partiyesi bundin kéyin her xil yollar arqiliq sherqiy türkistanliqlarning awazi bolushqa tirishimiz".

Enqerediki Uyghur tetqiqat instituti mutexessisi éli memet ependi ziyaritimizni qobul qilip, uchrishishta nahayiti yaxshi pikirlerning chüshkenlikini otturigha qoydi.

Qisqartilghan nami "Ay partiyesi" bolghan "Ezerbeyjan yüksilish partiyesi" milletchilik idiyesini ilgiri süridighan partiye bolup, 2020-yili 7-ayning 16-küni qurulghan iken. Partiye rehberliri bu qétim türkiyege élip barghan ziyariti jeryanida türkiyediki her qaysi siyasiy partiyelerning rehberliri, parlamént ezaliri we türkiy milletlerning teshkilatliri bilen uchrashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet