Франсийә парламентиниң “уйғур ирқий қирғинчилиқи” қарариға қарита инкаслар

Ихтиярий мухбиримиз әкрәм
2022-01-20
Share
Франсийә парламентиниң “уйғур ирқий қирғинчилиқи” қарариға қарита инкаслар Оңдин: д у қ рәиси долқун әйса, “уйғур ирқий қирғинчилиқи” қарар лайиһисини оттуриға қойған парламент әзаси оливер фавре, явропа уйғур институтиниң мудири дилнур рәйһан вә фирансийәдики уйғур академийәсиниң иҗраийә рәиси мәмтимин аббаслар фирансийә парламенти хитайниң уйғурларға йүргүзүватқан бастурушини “ирқий қирғинчилиқ” дәп елан қилған мурасимидин кейин хатирә сүрәттә. 2022-Йили 20 январ, париж.
RFA/Ekrem

2022-Йили 2-айниң 20-күни чүштин бурун франсийә пайтәхти париждин бир хушхәвәр тарқалди. Франсийә парламенти бүгүн “уйғур ирқий қирғинчилиқи” ни итирап қилиш-қилмаслиқни авазға қойған иди. Аваз беришкә қатнашқан 175 парламент әзасидин 170 киши аваз қатнаштурған болуп, 5 киши аваз бериштин ваз кәчкән. Нәтиҗидә, биргә қарши 169 парламент әзаси “уйғур ирқий қирғинчилиқи” ни етирап қилип аваз бәргән. Мутләқ үстүн аваз билән елинған бу қарар муһаҗирәттики уйғурларни чәксиз сөйүндүргән. Франсийә парламент бинаси алдида бүгүн әттигәндин бери намайиш қилип хәвәр күтүп турған уйғурларни техиму шатландурған.

Мәлум болғинидәк, франсийәдә актип паалийәт елип бериватқан “явропа уйғур иниститути” ниң мудири дилнур рәйһан башлиқ бир бөлүк уйғур сиясий паалийәтчиләр, узун мәзгилләрдин буян йәрлик франсуз актиплирини һәрикәткә кәлтүрүп түрлүк тәшвиқат паалийәтлирини қанат яйдурған вә франсийә парламентиниң “уйғур ирқий қирғинчилиқи” ни етирап қилиши үчүн паал теришчанлиқ көрсәткән иди. Бүгүн уларниң бу әҗри ахири мевә бәргән.

“уйғур ирқий қирғинчилиқи” франсийә парламентида бүгүн авазға қоюлуштин бурун, йәни 17-январ күни парламентта хитайниң “ирқий қирғинчилиқи” тоғрисида гуваһлиқ бериш йиғини болуп өткән. Бу йиғинға явропадики бир қисим лагер шаһидлири билән биргә, д у қ рәиси долқун әйса әпәндиму қатнашқан. 3 Күндин буян парижда паалийәт елип бериватқан долқун әйса әпәнди бүгүн зияритимизни қобул қилғанда, франсийә парламенти қобул қилған “уйғур ирқий қирғинчилиқи” қарариниң бир бөсүш болғанлиқини, буниң пүтүн явропа иттипақиға әза дөләтләргә тәсир көрситишигә үмид билән қарайдиғанлиқи тәкитлиди.

Франсийә парламентиниң бүгүнки бу қараридин мәмнун болғучилар арисида лагер шаһидлиридин гүлбаһар хативаҗи, қәлбинур сидиқ вә өмәр бекали қатарлиқларму бар болуп, гүлбаһар хативаҗи ханим бу һәқтә тохталғанда, өзиниң көп һаяҗанланғанлиқини вә хушал болғанлиқини әскәртти. Қәлбинур сидиқ ханим 17-январ өткүзүлгән гуваһлиқ бериш йиғини һәққидә қисқичә тохтилип өткәндин кейин, бүгүнки франсийә парламентиниң бу “уйғур ирқий қирғинчилиқи” қарариға болған сөйүнүшлирини ипадә қилди. Өмәр бекали болса бу хилдики қарарларниң пүтүн явропа дөләтлиридә қобул қилинидиғанлиқиға ишәнч билән қарайдиғанлиқини баян қилди.

Франсийә парламентиниң бүгүн “уйғур ирқий қирғинчилиқи” қарарини қобул қилиши, дәл франсийә призденти еммануел макронниң явропа иттипақиға йеңила рәис болған бир мәзгилигә, шундақла хитайда бейҗиң қишлиқ олимпик мусабиқисиниң башлиниш һарписиға тоғра кәлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт