Fransiye parlaméntining “Uyghur irqiy qirghinchiliqi” qararigha qarita inkaslar

Ixtiyariy muxbirimiz ekrem
2022-01-20
Share
Fransiye parlaméntining “Uyghur irqiy qirghinchiliqi” qararigha qarita inkaslar Ongdin: d u q re'isi dolqun eysa, “Uyghur irqiy qirghinchiliqi” qarar layihisini otturigha qoyghan parlamént ezasi oliwér fawré, yawropa Uyghur institutining mudiri dilnur reyhan we firansiyediki Uyghur akadémiyesining ijra'iye re'isi memtimin abbaslar firansiye parlaménti xitayning Uyghurlargha yürgüzüwatqan basturushini “Irqiy qirghinchiliq” dep élan qilghan murasimidin kéyin xatire sürette. 2022-Yili 20 yanwar, parizh.
RFA/Ekrem

2022-Yili 2-ayning 20-küni chüshtin burun fransiye paytexti parizhdin bir xushxewer tarqaldi. Fransiye parlaménti bügün “Uyghur irqiy qirghinchiliqi” ni itirap qilish-qilmasliqni awazgha qoyghan idi. Awaz bérishke qatnashqan 175 parlamént ezasidin 170 kishi awaz qatnashturghan bolup, 5 kishi awaz bérishtin waz kechken. Netijide, birge qarshi 169 parlamént ezasi “Uyghur irqiy qirghinchiliqi” ni étirap qilip awaz bergen. Mutleq üstün awaz bilen élin'ghan bu qarar muhajirettiki Uyghurlarni cheksiz söyündürgen. Fransiye parlamént binasi aldida bügün ettigendin béri namayish qilip xewer kütüp turghan Uyghurlarni téximu shatlandurghan.

Melum bolghinidek, fransiyede aktip pa'aliyet élip bériwatqan “Yawropa Uyghur inistituti” ning mudiri dilnur reyhan bashliq bir bölük Uyghur siyasiy pa'aliyetchiler, uzun mezgillerdin buyan yerlik fransuz aktiplirini heriketke keltürüp türlük teshwiqat pa'aliyetlirini qanat yaydurghan we fransiye parlaméntining “Uyghur irqiy qirghinchiliqi” ni étirap qilishi üchün pa'al térishchanliq körsetken idi. Bügün ularning bu ejri axiri méwe bergen.

“Uyghur irqiy qirghinchiliqi” fransiye parlaméntida bügün awazgha qoyulushtin burun, yeni 17-yanwar küni parlaméntta xitayning “Irqiy qirghinchiliqi” toghrisida guwahliq bérish yighini bolup ötken. Bu yighin'gha yawropadiki bir qisim lagér shahidliri bilen birge, d u q re'isi dolqun eysa ependimu qatnashqan. 3 Kündin buyan parizhda pa'aliyet élip bériwatqan dolqun eysa ependi bügün ziyaritimizni qobul qilghanda, fransiye parlaménti qobul qilghan “Uyghur irqiy qirghinchiliqi” qararining bir bösüsh bolghanliqini, buning pütün yawropa ittipaqigha eza döletlerge tesir körsitishige ümid bilen qaraydighanliqi tekitlidi.

Fransiye parlaméntining bügünki bu qararidin memnun bolghuchilar arisida lagér shahidliridin gülbahar xatiwaji, qelbinur sidiq we ömer bék'ali qatarliqlarmu bar bolup, gülbahar xatiwaji xanim bu heqte toxtalghanda, özining köp hayajanlan'ghanliqini we xushal bolghanliqini eskertti. Qelbinur sidiq xanim 17-yanwar ötküzülgen guwahliq bérish yighini heqqide qisqiche toxtilip ötkendin kéyin, bügünki fransiye parlaméntining bu “Uyghur irqiy qirghinchiliqi” qararigha bolghan söyünüshlirini ipade qildi. Ömer bék'ali bolsa bu xildiki qararlarning pütün yawropa döletliride qobul qilinidighanliqigha ishench bilen qaraydighanliqini bayan qildi.

Fransiye parlaméntining bügün “Uyghur irqiy qirghinchiliqi” qararini qobul qilishi, del fransiye prizdénti émmanu'él makronning yawropa ittipaqigha yéngila re'is bolghan bir mezgilige, shundaqla xitayda béyjing qishliq olimpik musabiqisining bashlinish harpisigha toghra kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet