Уйғур лагер шаһитлириниң портерити париждики көргәзмидә алқишқа еришкән

Ихтиярий мухбиримиз азиғ
2022-02-18
Share
Уйғур лагер шаһитлириниң портерити париждики көргәзмидә алқишқа еришкән Париждики көргәзмигә қоюлған уйғур лагер шаһитлириниң портерити. 2022-Йили феврал.
RFA/Azigh

Уйғур лагер шаһити турсунай зиявудунниң гигант портеритини франсийәниң 2-чоң шәһири марселдики телеком бинасиниң темиға сизған франсийәлик коча сәнәткари махн клокис (Mahn Kloix) ниң уйғурлар билән мунасивәтлик әсәрлири парижда ечилған “алтун сақланма” көргәзмисидә сетилған.

Рәссам махн клокис өз нөвитидә йәнә кишилик һоқуқ паалийәтчиси болуп, униң көпинчә иҗадийәтлиридә зиянкәшликкә вә адаләтсизликкә учриған кишиләрниң образи әкс-әттүрүлгән. Рәссам махн клокис елхәт арқилиқ зияритимизни қобул қилип, соаллимизға мундақ җаваб бәрди:

“мениңчә, уйғур мәсилиси һазирқи дунядики әң начар һаләттә туруватқан кишилик һоқуқ мәсилилириниң биридур. Хитай һөкүмити барлиқ йоқири техника вә адәм күчи байлиқидин пайдилинип, уйғурларға қарши кәң көләмлик бастуруш системисини яратти. Бу бир қара басқан чүшкә охшайду. Буниңға һечким сүкүт қилмаслиқи керәк.”

Махн клокисниң уйғур лагер шаһидлиридин турсунай зиявудун, меһригүл турсун, шундақла ойғур паалийәтчи асийә абдуләһәдләрниң портертини сизған рәсимлири париждики көргәзмидә алаһидә алқишқа еришкән. Көзәткүзиләрниң қаришичә, уйғур мәсилиси фирансийә җәмийитигә тонушлуқ бир мәсилигә айланмақта икән.

Яврупа уйғур ениституниң мәсули доктор дилнур рәйһан ханим зияритимизни қубул қилип, уйғур мәсилиси, җүмлидин уйғур җәмийити дуч кәлгән бу кирзисни сәнәт билән аңлитишниң интайин муһим икәнликини тәкитлиди. У мундақ деди: “һазир фирансийәдә сәнәт саһәсидикиләрниң уйғулар билән мунасивәтлик иҗадийәтлири көпләп оттуриға чиқиватиду. Бу әһвал уйғур мәсилисиниң фирансийә җәмийитигә сиңип кириватқанлиқини ипадиләйду.”

Махн клокисниң әсәрлиригә илһам болған уйғур лагер шаһидлиридин меһригүл турсун зияритимизни қубул қилип, өз көзқарашлирини биз билән ортақлашти.

Хитай һөкүмитиниң ирқи қирғинчилиқ сиясити түпәйли уйғур елидики милйонларчә уйғур вә башқа йәрлик хәлқләр еғир кишилик һоқуқ дәпсәндичиликигә учримақта. Рәссам махн клокис пүтүн дунядики кишиләрниң вә һәрқайсий дөләт һөкүмәтләрниң хитайниң бу вәһшийликигә қарши турушни үмид қилидиғанлиқини билдүрди.

Мәлумки, франсийә дунядики әң типик сәнәт дөлити. Тарихтин буян нурғунлиған сәнәткарлар өз әсәрлирини франсийәдә, болупму франсийә пайтәхти париждики сәнәт көргәзмилиридә дуняға намаян қилған. Рәссам махн клокисниң уйғур лагер шаһидлириниң портеритини сизип, франсийәдә оттуриға чиқириши, уйғурлар дуч келиватқан қирғинчилиқни сәнәт арқилиқ дуняға аңлитишниң бир йеңи йолини ачқан. Мутәхәссисләрму дуняниң һәрқайси җайлирида кишиләрниң уйғур мәсилисигә болған сәзгүрликини ашуруш үчүн сәнәтниң күчидин пайдилинишниң толиму муһимлиқини тәкитлимәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт