Һамбург шәһиридә хитайниң җаза лагерлириға қарши зор намайиш елип берилди

Ихтиярий мухбиримиз әкрәм
2020-01-20
Елхәт
Пикир
Share
Принт
Германийәниң һамбург шәһиридики мусулманлар вә германлар елип барған хитайға қарши көлими зор бирләшмә намайиштин көрүнүш. 2020-Йили 18-январ.
Германийәниң һамбург шәһиридики мусулманлар вә германлар елип барған хитайға қарши көлими зор бирләшмә намайиштин көрүнүш. 2020-Йили 18-январ.
RFA/Ekrem

18-январ германийәниң һамбург шәһиридики мусулманлар вә германлар хитайға қарши көлими зор бирләшмә намайиш елип барди.

12-январ күни германийәниң һамбург шәһиридики түркләр, түркмәнләр, әзарбәйҗанлиқлар, әрәбләр вә германлар бирлишип хитайниң уйғур диярида тәсис қилған җаза лагерлири түзүмигә, уйғурлар үстидин йүргүзүватқан етник вә мәдәнийәт қирғинчилиқлириға қарши нәччә миң кишилик зор намайиш елип барған иди. 18-январ күни улар йәнә бир қетим қозғилип чиқип, көлими зор бир намайиш билән һамбург шәһирини ләрзигә салди.

Игилишимизчә, һамбургдики түрк тәшкилатлири бу қетимқи намайиш үчүн өзлири бирқанчә миң данә шәрқий түркистанниң ай-юлтузлуқ көк байрақлирини түркийәдин яситип әкәлгән. Улар намайишта аз сандики түрк вә башқа дөләтләрниң байрақлирини көтәргәндин башқа, мутләқ көп қисми ай-юлтузлуқ көк байрақни көтүрүп намайиш қилған. Намайиш мәйданида түрк тәшкилатлириниң мәсуллири вә германийәдики кишилик һоқуқ тәшкилатлириниң рәһбәрлири нутуқлар сөзләп, хитайниң инсанийәткә қарши җинайәтлирини қаттиқ әйиблигән.

18-январ һамбургда өткүзүлгән намайишқа мюнхен шәһиридә яшайдиған бир бөлүк уйғурларму берип қатнашқан. Уйғур диний затлиридин абдуҗелил әмәт әпәнди бу намайишларни һамбургдики түрк вә әрәб тәшкилатлириниң уйғурларға һәссидарлиқ қилиш йүзисидин өзлири тәшкиллигәнликини тилға алди.

Мюнхенда яшайдиған уйғур зиялийлиридин елчин әпәндиму һамбургдики намайишқа берип қатнашқан болуп, у намайишчиларниң узун сәп түзүп һамбург кочилирида бирқанчә километир йол йүрүп, хитайға қарши җараңлиқ шоарларни товлаш арқилиқ хитайға болған ғәзәп-нәпрәтлирини ипадә қилғанлиқини тәкитлиди.

Намайишчилар «хитай, етник қирғинчилиқни тохтат, җаза лагерлирини дәрһал тақа, уйғурларға әркинлик, шәрқий түркистанға әркинлик!» дегәндәк шуарларни товлашқан. Мюнхендин берип бу намайишқа қатнашқан уйғур зиялийси һилалдин әпәнди намайишниң наһайити тәсирлик өткүзүлгәнликини баян қилди. Нәсруллаһ әпәндиму бу намайишниң өзлири күткәндин артуқ һәйвәтлик елип берилғанлиқини әскәртти.

Мәлум болғинидәк, хитайниң җаза лагерлири сиясити арқилиқ уйғурлар үстидин елип бериватқан етник вә мәдәнийәт қирғинчилиқлири тоғрисидики иҗтимаий таратқуларда тарқиливатқан һәр түрлүк учурлар ғәрб кишилириниң өзлүкидин қозғилип хитайға қарши турушиға түрткә болуватқан асаслиқ амилларға айланған. Болупму явропадики түрк тәшкилатлири вә башқа мусулман җамаити 2019-йили декабирдин буян өзлүкидин қозғилип көп қетим көлими зор болған намайишларни елип барған иди. Буниң ичидә германийәниң һәрқайси шәһәрлиридә елип берилған намайишларниң сани көп, тәсири күчлүк болди. Германийә мәтбуатлири бу намайишлар тоғрисида көпләп хәвәрләр елан қилди. Уйғур зиялийси үмид турсун әпәнди бу намайишларниң уйғурларға хәйирләр несип қилишини үмид қилидиғанлиқини билдүрди.

Д у қ рәһбәрлириниң билдүрүшичә, бу йил ичидә явропадики чоң дөләтләрдин германийә, әнглийә, фирансийә, италийә, шиветсийә, голландийә, норвегийә қатарлиқ бир қисим дөләтләрдә йәнә түрк вә башқа мусулман милләтләрниң һәмкарлиқида көлими зор болған бирләшмә намайишлар тәшкиллинидикән.

Пикирләр (0)
Share
Толуқ бәт