Gérmaniye we norwégiyelerde xitaygha qarshi namayish ötküzüldi

Ixtiyariy muxbirimiz ekrem
2020-10-01
Élxet
Pikir
Share
Print

Gérmaniyening myunxén shehiridiki xitay konsulxanisi bilen norwégiye paytexti oslodiki xitay elchixanisi aldida namayish ötküzüldi.

Dunya Uyghur qurultiyining teshebbusi bilen 1-öktebir küni dunyaning herqaysi jayliridiki Uyghurlar merkezliship olturaqlashqan sheherlerde xitay xelq jumhuriyiti qurulghanliqining we Uyghur diyarining kommunist xitay teripidin ishghal qilin'ghanliqining 71 yilliqi munasiwiti bilen xitaygha qarshi keng kölemlik namayishlar ötküzülgen. Jümlidin gérmaniyening myunxén shehiridimu xitay konsulxanisi aldida namayish élip bérilghan. Namayish sherqiy türkistaning istiqlal marshi bilen bashlan'ghan.

Namayishqa myunxén we uning etrapidiki sheherlerdin kelgen köp sandiki Uyghurlar ishtirak qilghandin sirt, bawariye parlaméntining rehberliridin markus réndibacher ependi we kishilik hoquq organlirining wekilliri, shundaqla birqisim tibetlikler, xongkongluqlar, teywenlikler we jenubiy mongghuliyeliklermu qatnashqan.

Namayish muqeddimiside d u q re'isi dolqun eysa ependi nutuq sözlep, xitayning sherqiy türkistan xelqi üstidin élip bériwatqan éghir zulum siyasitini qattiq eyibligen. Bawariye parlaméntining rehberliridin markus réndibacher ependi sözide Uyghurlarning siyasiy, iqtisadiy, medeniyet jehetlerdin, belki Uyghur bolghanliqi seweblikla irqiy jehettin qirghin qiliniwatqanliqini, dunyaning bu adaletsizlikke süküt qilmasliqi kéreklikini otturigha qoyghan.

"Yawropa sherqiy türkistan birliki" teshkilatining re'isi esqerjan ependi Uyghurche we gérmanche tillarda nutuq sözlep, nöwette sherqiy türkistanliqlar uchrawatqan éghir zulum toghrisida etrapliq melumat bergen. Namayishqa ishtirak qilghan d u q ning re'is wekili, "Sherqiy türkistan ölimalar birliki" ning mu'awin re'isi turghunjan alawudun ependi bu qétimqi namayish toghrisida öz tesiratlirini bayan qilip ötti.

1-Öktebir küni yene norwégiyening oslo shehiridiki xitay bash elchixanisi aldidimu namayish élip bérilghan. Namayishqa norwégiyening herqaysi sheherliridin kelgen Uyghur jama'iti qatnashqan. Norwégiye Uyghur komitétining re'isi, "Uyghur edliyesi arxip ambiri" ning mes'uli bextiyar ömer ependi bu heqte ziyaritimizni qobul qilip, bu qétimqi namayishning nahayiti janliq keypiyatta dawam qilghanliqini tekitlidi.

Toluq bet