Gérmaniye parlaméntigha Uyghur irqiy qirghinchiliqini étirap qildurush herikiti dawam qilmaqta

Ixtiyariy muxbirimiz ekrem
2022.10.13
Share on WhatsApp
Share on WhatsApp
Gérmaniye parlaméntigha Uyghur irqiy qirghinchiliqini étirap qildurush herikiti dawam qilmaqta D u q bashlighan gérmaniye parlamént binasi bilen gérmaniye bash ministirliqi binasining otturisidiki yolda 5 kün dawam qilidighan “Uyghur irqiy qirghinchiliqini namayan qilish” resim körgezmisi pa'aliyitidin körünüsh. 2022-Yili 13-öktebir.
RFA/Ekrem

Dunya Uyghur qurultiyi 9-öktebirdin étibaren gérmaniye parlamént binasi bilen gérmaniye bash ministirliki binasining otturisidiki yolda 5 kün dawam qilidighan “Uyghur irqiy qirghinchiliqini namayen qilish” resim körgezmisi pa'aliyitini bashlighan. “Shinjang saqchi höjjetliri” de ashkarilan'ghan Uyghur tutqunlarning süretliri hökümetning bu muhim ikki binasining otturisigha uzun sep sheklide tizilip, hökümet xadimliri we parlamént ezalirining diqqitini jelp qilghan. D u q rehberliri bügün, yeni 13-öktebir küni gérmaniye parlaméntida “Uyghur irqiy qirghinchiliqini étirap qildurush” pa'aliyetlirini bashlap diqqetni jelp qilghan.

D u q bashlighan gérmaniye parlamént binasi bilen gérmaniye bash ministirliqi binasining otturisidiki yolda 5 kün dawam qilidighan “Uyghur irqiy qirghinchiliqini namayan qilish” resim körgezmisi pa'aliyitidin körünüsh. 2022-Yili 13-öktebir.

Melum bolushiche, gérmaniye parlaménti 2021-yili xitayning Uyghurlar üstidin yürgüziwatqan basturushlirini “Insaniyetke qarshi jinayet” dep békitken bolsimu, emma uni “Irqiy qirghinchiliq” dep atimighan idi. Gérmaniye parlaméntigha “Uyghur irqiy qirghinchiliqi” ni étirap qildurush, d u q ning nöwettiki wezipiliridin birige aylan'ghan. Bu munasiwet bilen 12-öktebirdin bashlap d u q re'isi dolqun eysa yétekchilikidiki bir goruppa wekil bérlin'gha yétip kélip, gérmaniye parlaméntidiki pa'aliyetlirini bashlighan.

Bügün 13-öktebir bérlindin ziyaritimizni qobul qilghan dolqun eysa ependi parlaménttiki uchrishishlar toghrisida toxtilishtin ilgiri, bizge aldi bilen bu qétimqi pa'aliyetning asasiy meqsiti heqqide chüshenche bérip ötti. Uning bildürishiche, gérmaniye bash ministéri olaf sholiz 11-ayning birinchi heptisi tunji qétimliq xitay ziyaritini bashlaydighan bolup, uning shi jinping bilen bolghan uchrishishta “Uyghur irqiy qirghinchiliqi” mesilisini tilgha élishi üchün gérmaniye parlaméntida jiddiy heriket qilish zörürken. U sözide yene “Uyghur irqiy qirghinchiliqi” gha da'ir 250 parche resimning parlamént binasi aldida körgezme qilinip yaxshi tesir peyda qilghanliqini eskertti.

D u q bashlighan gérmaniye parlamént binasi bilen gérmaniye bash ministirliqi binasining otturisidiki yolda 5 kün dawam qilidighan “Uyghur irqiy qirghinchiliqini namayan qilish” resim körgezmisi pa'aliyitidin körünüsh. 2022-Yili 13-öktebir.

D u q berlin ishxanisining mudiri gheyur qurban ependi bérlindiki bu qétimqi pa'aliyetlerning teshkilligüchisi bolup, u bügün ziyaritimizni qobul qilghanda parlamént ichidiki pa'aliyetler hemde parlamént binasi bilen bash ministér binasi otturisidiki resim körgezmisi toghrisida melumat bérip ötti. U sözide, kishilerning bu qétimqi resim körgezmisige yuqiri baha bergenlikini tilgha aldi.

D u q rehberliri bu qétimqi pa'aliyetliri jeryanida, gérmaniye parlaméntida “Uyghur dostluq goruppisi” qurush mesilisi toghrisidimu bezi parlamént ezaliri bilen ortaq muzakiriler élip barghan. Ularning bérlindiki pa'aliyetliri bir hepte dawam qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.