Герман тиллиқ таратқуларда хитайниң таҗавузчилиқ қара нийити паш қилинған хәвәр-мақалиләр көпләп елан қилинмақта

Ихтиярий мухбиримиз әкрәм
2020-07-17
Share
guma-qarshiliq-herbiy-1.jpg Хотән вилайәтлик һөкүмәт "террорлуқ, зораванлиқ" қа даир йип учи билән тәминлигәнләрни 5 милйон сомғичә мукапатлайдиғанлиқини җакарлаш йиғини. 2017-Йили 22-феврал.
ts.cn

Хитайниң таҗавузчилиқ қәдимини бесиватқанлиқи тоғрисидики тәһлилләр германийә мәтбуатлирида давам тилға елинмақта.

17-Июл германийәдә нәшрдин чиқидиған "шветзингер" намлиқ сәһәр гезитида "таҗавузчилиқ вә бастуруш" намлиқ бир мақалә елан қилинди. Мақалида уйғур дияридики ирқий қирғинчилиқ, тибәттики бастуруш вә хоңкоң демократийисиниң бәрбат қилинишиниң хитайниң таҗавузчилиқ қара нийити билән мунасивәтлик икәнлики илгири сүрүлгән иди.

Мақалида мундақ дейилиду: "шәһәрлик һөкүмәтниң башлиқи стефан даллингер рәһбәрликидики вәкилләр өмикиниң алдинқи йили хитайда елип барған зияритини хатиримиздин айримаслиқимиз лазим. Улар хитай билән тохтамлар түзүп вә достанә келишимларни имзалап, бир йилдин кейинла хитай сияситиниң таҗавузчилиқ характери барғансери рошән намаян болушқа башлиди. Тибәттики мустәмликичиликниң бесими барғансери күчәймәктә, аз санлиқ мусулман милләт болған уйғурлар үстидин елип бериливатқан нопус қирғинчилиқи һелиһәм давам қилмақта. Һималая тағлиридики һиндистан, бутан, непални өз ичигә алған районларға хитай көпләп әскәр йөткимәктә. Тәйвәнгә болған тәһдит ашмақта, хитайниң җәнубий хитай деңизиға кеңийиш көлими техиму зораймақта, мана буларниң һәммиси асиядики бир таҗавузчилиқ уруши сияситидин бишарәтләр бәрмәктә."

Мақалида хитай һакимийитиниң асия қитәсидә бесиватқан таҗавузчилиқ қәдәмлири биләнла чәклинип қалмиғанлиқи, қолини аллиқачан африқа қитәсигиму узитип болғанлиқи, униң дуняға һөкүмранлиқ қилиш қара нийитигә игә икәнлики илгири сүрүлүп, мундақ баян қилиниду: "җәнубий африқа иккинчи долқунда хитайниң мустәмликисигә киришкә башлиди, бу дөләтләрдики тәбиий байлиқларни қезип елишқа капаләтлик қилиш үчүн хитай һакимийити фирансийәниң сабиқ мустәмликиси болған җибуте районида әскәр турғузди. Никарагуада ‹хитайчә панама қанили' қезилишқа башлиди. Әмма явропа йәнила хитай рәһбәрлириниң муһим нишани иди. 2019-Йили 9-айдин башлап хитай сақчилири хитай саяһәтчилирини қоғдаш намида явропа дөлити болған сербийәниң белгирад шәһиригә киришкә башлиди."

Мақалида явропадики бирқисим муһим деңиз портлириниң игидарчилиқ һоқуқиниң мутләқ көп қисим пай нисбитиниң хитайниң қолиға өтүп кәткәнлики, муһим техника ширкәтлири вә завутларни хитайларниң ‹мәбләғ селиш' усули билән өз илкигә елип болғанлиқи, хитайларниң бундақ иқтисадий кеңәймичиликиниң кәлгүсидә явропа дөләтлиридә еғир мәвҗутлуқ тәһдити пәйда қилидиғанлиқи оттуриға қоюлуп, мундақ дейилиду: "игилик һоқуқиниң көп қисми хитайларға тәвә болған явропадики бәзи деңиз портлири әмәлийәттә башқа бир пилантқа айлинип болди. явропа дөләтлири кәлгүсидә бейҗиңниң буйруқини иҗра қилишқа мәҗбурлиниду. Хитай һакимийити бәзи қурулушлар вә истратегийәлик ул әслиһәлиригә қәдәр йеқинлишишқа урунупла қалмай, явропаниң телефон системилириға қәдәр сиңип кирди. явропаниң санаити сетивелинип кишилик һоқуқ вә муһит бихәтәрлик тәлиби болмиған хитайға йөткәп кетилмәктә."

Мақалә пүтүн явропа әллиригә қарита күчлүк агаһландурушқа толған мундақ җүмлиләр билән ахирлишиду: "баден-вүрттәмбергтин тәшкилләнгән бир иқтисад вәкилләр өмики бүгүн хитайға учушқа иҗазәт берилгән тунҗи айропиланға чиқип олтурди. Булар хитай билән болған һәмкарлиқтин бүгүнгә қәдәр немигә еришти? мениң һазирға қәдәр есимгә алалиғиним ‹маска' болди. Әгәр явропа иттипақи сәгәкликини сақлап қалалмиса, кәлгүсидә явропалиқлар аддий қол һүнәр боюмлиринила ишләп чиқириду, хитай болса пүтүн дуняни әхләт билән толдуруветиду вә юқири техникиларни иликидә тутиду."

Мәзкур мақалә германийәниң баден-вүрттемберг өлкисидики йешиллар партийисиниң әзаси, еппелхайим райониниң юқири дәриҗилик иҗтимаий мулазимәт хадими мартин грам әпәнди тәрипидин йезилған болуп, биз әсәр һәққидә униң билән сөһбәт елип беришқа теришқан болсақму, телефон арқилиқ алақилишиш мумкин болмиди.

"хитай дуняға тәһдит", "хитайниң ‹бир бәлвағ бир йол' истратегийәлик пиланиниң арқисиға таҗавузчилиқ қара нийити йошурунған", "хитайниң уйғурларни, тибәтләрни, хоңкоңлуқларни бастуруштики мәқсити таҗавузчилиқ қара нийити үчүн земин һазирлаш" дәйдиған пикир еқиминиң бәтбуатларда даим тәкрарлинип турушиниң дуняниң хитайға болған қаришида өзгириш һасил қилишқа пайдилиқ икәнликини илгири сүргән германийәдики уйғур зиялийси әнвәр әһмәт әпәнди бу һәқтә тохталғанда, уйғурлар мәсилисиниңму бу хил пикир еқими даирисидин кәң орун елип келиватқанлиқини тилға алди.

"шәрқий түркистан өлималар бирлики" ниң муавин рәиси, д у қ ниң рәис вәкили турғунҗан алавудун әпәнди бу хусуста пикир баян қилғанда, һазир америкадин қалса германийә мәтбуатлирида хитайниң қара нийитигә аит хәвәрләрниң көпләп елан қилиниватқанлиқини, бу мақалиләрниң германийә һөкүмитигә хитай сияситини җиддий рәвиштә көздин көчүрүш нуқтисидин күчлүк бесим пәйда қиливатқанлиқини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт