Anglighuchidin inkas: "Ghuljida tutqunlar sotsiz késilmekte, soti échilghan enwer tursun 'teleylik' lerdin biri"

Muxbirimiz shöhret hoshur
2019-10-10
Élxet
Pikir
Share
Print
Tutqun qilin'ghan taksim soda sariyining diréktori enwer tursun'ghoja ependi.
Tutqun qilin'ghan taksim soda sariyining diréktori enwer tursun'ghoja ependi.
Photo: RFA

8‏-Öktebir küni ghulja shehiridiki tutqun enwer tursunning sotlan'ghanliqi heqqide radiyomizgha uchur yollighan, weziyettin xewerdar kishi ghuljida lagérdiki tutqunlarning zor bir qismining sotsiz késiliwatqanliqini, enwer tursunning sheklen soti échilghan az sandiki 'teleylik' tutqunlardin biri ikenlikini ilgiri sürgen.

Muxbirimizning bu heqtiki éniqlashliri dawamida chapchal nahiyesining jaghistay yézisidiki aka-uka abliz jami we ablikim jamilarning sotsizla késiwétilgenliki we nöwette shixo türmiside ikenliki ashkarilandi.

Weziyettin xewerdar bireylenning ghulja lagérliridiki zor bir türküm tutqunlarning sotsizla késiliwatqanliqi, enwer tursunning sheklen bolsimu sot échilghan az sandiki 'teleylik' tutqunlardin biri ikenlikini melum qilghan idi.

Biz enwer tursunning sotida némiler déyilgenlikini éniqlashqa tirishtuq. Asasiy qatlam kadirliridin j. X. Xadimlirighiche bolghan barliq alaqidar kishiler enwer tursunning soti heqqide gep qilishtin özlirini qachurdi.

Inkasta enwer tursunning chet'eldiki birqanche dölette qérindashliri we uruq-tughqanlirining barliqini, ular chet'elde qérindashliri toghriliq aktip pa'aliyet qilghanliqi üchünla enwer tursun üstidin sot échilghanliqi ilgiri sürülgen idi.

Derweqe, enwer tursunning kanada we norwégiyediki qérindashliri b d t gha mektup yollap, xitayning bigunah akisi we jiyenini sewebsiz tutqun qilghanliqi üstidin shikayet qilghan. Ular yene akisi bilen jiyenining ehwali heqqide mexsus widiyoluq guwahliq bayanati tarqatqan.

Biz ghuljida lagérlardiki tutqunlarning sotsiz késiliwatqanliqi heqqidiki uchurning toghra-xataliqini aydinglashturush üchün ghuljining chapchal nahiyesige téléfon qilduq. Jaghistayliq bir ayallar mudiri öz tewelikidiki 60 we 63 yashliq aka-uka abliz jami bilen ablikim jamilarning sotsizla késiwétilgenliki, ularning qoligha héchqandaq bir hökümname bérilmigenliki, hetta kent kadirliri bilen a'ile tawabi'atlirining ularning qanche yilliq késilgenlikidinmu xewersizlikini éytti. Melum bolushiche, abliz jami nöwette shixo türmiside, ablikim jami bolsa toqquztaradiki bir türmide jaza mudditini ötimektiken.

Yene melum bolushiche, ablikim jami 10 yillarning aldida ottura asiyada tijaret qilghanliqi üchün, abliz jamining bolsa téléfonidin chataq chiqqanliqi üchün tutqun qilin'ghan iken.

Lagérdiki tutqunlar üstidin sotsiz höküm chiqiwatqanliq ehwali ilgiri xoten we qeshqerge qarita élip barghan téléfon ziyaretlirimizdimu ashkarilan'ghan idi. Yéngisarliq bir qoghdash xadimi akisining jaza késimini kent kadirliridin tapshuruwalghanliqini bayan qilghan bolsa, peyziwatliq bir saqchi xadimi yanchuqida teyyar sot hökümliri barliqi, peqet uninggha mehkumlarning ismini toldurush arqiliqla jaza hökümini chiqiridighanliqini bayan qilghan idi.

Melum bolushiche, lagérdiki mana bu xil sotsiz hökümlerge xitay jaza matériyallirida "Kücheytip terbiyelesh" dep nam bérilgen.

Toluq bet