Ghulja nahiyesidiki pénsiyonér pexirdin xélilning wirus yuqumi diyagnozi bilen doxturxanida ikenliki ashkarilandi

Muxbirimiz shöhret hoshur
2020-02-20
Élxet
Pikir
Share
Print
Xitay doxtur we saqchilarning a'ililerge bérip wirus yuqumini tekshürüwatqan körünüsh. 2020-19-Féwral, altay.
Xitay doxtur we saqchilarning a'ililerge bérip wirus yuqumini tekshürüwatqan körünüsh. 2020-19-Féwral, altay.
AFP

Muxbirimizning ijtima'iy taratqulardiki xewer yip uchlirigha asasen élip barghan éniqlashliri dawamida ghulja nahiyesining mazar yézisida olturushluq pénsiyege chiqqan 78 yashliq oqutquchi pexridin xélilning wuxen wirusi bilen yuqumlan'ghanliq diyagnozi qoyulup, ghulja shehiride dawaliniwatqanliqi, uning ayali, ikkinchi oghli we kélinining yuqum gumandari süpitide alahide tekshürülüwatqanliqi, mushu sewebtin bular bilen alaqe qilghan barliq uruq-tughqan, qolum-qoshnilirining ghulja nahiyeside karantin qiliniwatqanliqi, döngmazar, mazar we qash yézisidiki ahalilerning öyliri péchetlen'genliki ashkarilandi.

Yéqinda ijtima'iy taratqularda ghulja nahiyesining döngmazar yézisida Uyghurlardin 4 kishining wuxen wirusi bilen yuqumlan'ghanliqi, bu bayqalghandin kéyin döngmazarning qattiq qamal qilin'ghanliqi we pütün öylerge péchet sélin'ghanliqi xewer qilin'ghan idi. Biz bu uchurning toghriliqini éniqlash üchün ghulja nahiyesige téléfon qilduq. Rozimetyüzi yézisidiki bir ahale mazar yézisida wuxen wirusi yuqum gumandaridin bir er-ayalning bayqalghanliqi heqqide kent kadirlirining özlirige uqturush qilghanliqi we yéqinda döngmazar we mazar yézisigha barghan-barmighanliqi heqqide melumat sorighanliqini bayan qildi. Döngmazardiki bir ahale bayqalghan yuqumdarning mazar yézisidin ikenliki, pénsiyege chiqqan bir oqutquchi ikenliki we Uyghur ikenlikini tilgha aldi. Mazar yéza aramehellidiki bir ahale yuqumdarning shéx mehellidin ikenliki we ismining pexirdin ikenlikini melum qildi. Shéx mehellisidiki ahaliler bolsa özlirining péchetlen'genkini bayan qilish bilen birlikte pénsiyonér pexirdin xélilning ghulja shehiride doxturxanida, uning ayali reyhan'gül, ikkinchi oghli abduselim we kélini xalide memetning ghulja nahiyeside doxturxanida ikenlikini bayan qildi. Bular yene pexirdin xélilning barliq uruq-tughqanliri, qolum-qoshniliri we aramehellidiki bir ölüm petisige uning bilen birlikte qatnashqan barliq kishilerning ghulja nahiyesige ekitilip, karantin qilin'ghanliqini melum qildi.

Ahaliler kent kadirliridin anglighanlirigha asasen pexirdin xélilning yuqumdar, ayali, kélini we oghlining yuqum gumandari ikenlikini ilgiri sürdi. Mazar yézisidiki bir kent sékrétari bulardin pexridin xélilning yuqumdar ikenlikidin xewiri barliqini bayan qilish bilen birlikte qalghanlirining ehwali heqqide jiddiy qutquzush qomandanliq ishtabidin melumat élishimizni tewsiye qildi. Emma mezkur shtab xadimliri bu heqte melumat bérishni ilgirikige oxshashla ret qildi.

Toluq bet