Ghuljadiki méhmanxanilar karantin ornigha aylandurulghan we asasliq Uyghur doxturlar seplen'gen

Muxbirimiz gülchéhre
2020-03-30
Élxet
Pikir
Share
Print
Uyghur diyarida da'iriler élip bériwatqan wirustin mudapi'elinish teshwiqatidin körünüsh. 2020-Yili yanwar.
Uyghur diyarida da'iriler élip bériwatqan wirustin mudapi'elinish teshwiqatidin körünüsh. 2020-Yili yanwar.
Social Media

Melum bir anglighuchimizning ötken hepte axiri uchur yetküzüshiche, ghulja shehiridiki Uyghur milliy tébabet doxturxanisini öz ichige alghan barliq doxturxanilardiki asasliq Uyghur doxtur, séstra hemde dawalash xadimliri ötken ayning axiridin bashlap, ili oblastliq hökümetning yuqumlinishni tizginlesh jiddiy xizmitige maslishish qarari boyiche karantin qilin'ghan orunlarda kéche kündüz xizmet qilishqa orunlashturulghan, inkastin mélim bolushiche, ular hazirgha qeder a'ilisige qaytmighan.

Biz bu uchurgha asasen ghulja sheherlik milliy tébabet doxturxanisigha téléfon qilip ehwal igiliduq.

Ghulja milliy tébabet doxturxanisining peqet partkom ishxanisigha téléfon ulandi. Téléfonni alghan bir xitay xadim bizning: "Bu doxturxanidimu korona wirusi yuqumdarlirini dawalamdu?" dégen so'alimizgha: "Doxturxanimizmu yéngi tiptiki öpke yallughi yuqumdarlirini tekshürüsh dawalash orni qilip békitilgen doxturxana, emma doxturxanimizda hazir birmu yuqumdar yoq, ular hemmisi karantin qilin'ghan méhmanxanilarda, doxturlarmu shu méhmanxanilarda" dep jawab berdi.

Biz yene: "Undaqta qaysi méhmanxanilarda karantin qiliniwatidu?" dep soriduq. U jawaben: "Karantin qiliniwatqan méhmanxanilar bek jiq, ularning qaysiliqinimu bilmeymen, ishqilip hemme doxtur xadimlirimiz yuqum kontrol xizmitini bashqurush merkizining orunlashturushi bilen karantin orunlirigha teqsim qilinip xizmet qiliwatidu. Buningdin artuqini menmu bilmeymen" dédi.

Ghulja sheherlik Uyghur milliy tébabet doxturxanisining tor bétidin, mezkur doxturxanining doxtur we dawalash xadimliri sanining 97 neper ikenliki melum.

Biz radiyomizgha kelgen inkastiki "Peqet Uyghur doxturlar karantin qilin'ghan jaylargha mejburiy seplen'gen" dégen uchurni delillesh üchün yene ghulja sheherlik "Junggoche dawalash doxturxanisi" gha téléfon qilduq. Bu doxturxanining dawalash bölümidin téléfonni alghan bir xitay doxtur, bu doxturxanining tajsiman öpke yallughi yuqumini tekshürüsh orni qatarida emesliki, yuqum tizginlesh xizmitige bu doxturxanining xadimliri qatnashturulmighanliqini we Uyghur tébabet doxturxanisi nuqtiliq yuqum tizginlesh doxturxanisining biri ikenlikini éytti.

U yene "Karantin orni qilip békitilgen méhmanxanilardiki yuqum kontrol qilish xizmitige junggoche dawalash doxturxanisidin doxturlar seplenmidi" dédi.

Ghulja sheherlik hökümetning yuqum tizginlesh merkizi bash shtabi teshwiqat ishxanisidin téléfon ziyaritimizge jawab bergen xadim, qaysi méhmanxanilarning karantin orni qilip békitilgenlikini sorighinimizda, bu so'alimizgha biwasite jawab bermey "Yéngi tiptiki öpke yallughi hazir omumyüzlük kontrol qilinip boldi, bolmisa kochilargha ademler chiqamti? hemme ishlar normal" dédi.

Undaqta néme üchün doxturlar hazirghiche öylirige qaytmay ishlewatidu? dégen so'alimizgha bolsa: ""Yuqum ehwali tügigen bilen bashqa xizmetler barde, bashqisini yuqiridin sorang, men bilmeymen" depla téléfoni qoydi we téléfonimiz qayta ulanmidi.

Ghuljadiki méhmanxanilargha téléfon qilip ehwal igilesh jeryanida ghulja iqtisadiy tereqqiyat rayonigha qurulghan 4 yultuzluq méhmanxana bolghan jénjyang méhmanxanisining pütünley karantin orni qilin'ghanliqi ashkarilandi.

Méhmanxana mulazimet xadimliridin biri so'allirimizgha jawab berdi.

Biz uningdin ghulja Uyghur doxturxanisidin kelgen doxturlarni izdeydighanliqimizni éytqanda u "Bizde doxturlar jiq qaysisini izdeysiz?" dep soridi.

Bizning "Munche jiq doxtur bir méhmanxanigha seplen'gen bolsa bimarlar, yuqumdarlar qanche?" dep sorighan so'alimizgha u derhal jiddiy éhtiyat bilen jawab bérip, : "Bu mutleq mexpiyetlik, buni sorap néme qilisiz? doxturni izdimekchi bolsingiz ularni doxturxanidin yaki mehelle komitéti arqiliq izdeng. Biz chaqirip bérelmeymiz" dédi.

"Néme üchün doxturlarni öyge qaytqili ruxset qilmaysiler?" dep soriduq

U, "Bu, biz köngül bölidighan ish emes, bu dégen hökümetning buyruqi, bizmu oxshash öyge qaytqumiz bar, qaytalmaywatimiz" dédi.

"Yuqum kontrol qilindi dewatqan'ghu yene némishqa öyge qaytalmaysiler?" dégen so'alimizgha u "Bu so'allarni sorimang, buni sizge déyishke bolmaydu dédimghu, kimdinla sorisang oxshash, jawab bermeydu" dédi.

"Undaqta méhmanxanigha kirishke bolamdu ?" dep soriduq.

U intayin taqetsizlen'gen halda "Elwette kirgüzmeymiz" dep téléfonni qoyuwetti.

Bu méhmanxanigha bir aydin buyan zadi qanchilik bimar we doxturlarning qamalghanliqi namelum, bu méhmanxana 2017-yili 8-ayda mulazimet bashlighan, 12 qewetlik bar aliy méhmanxana bolup jem'iy 100 din artuq yataqqa ige iken.

Buning aldida atushtiki yashing méhmanxanisida 99 neper wuxenlikning karantin qilin'ghanliqi radiyomiz muxbirlirining shu jaygha qaratqan téléfon ziyaretliri arqiliq ashkara qilin'ghanidi.

Uyghur aptonom rayoni sehiye tarmaqlirining 30-mart élan qilghan yuqum ehwali doklatida ghulja Uyghur diyaridiki yuqum ehwali ürümchidin qalsa ikkinchi orunda bolup, di'agnoz qoyulghan yuqumdar 18, dawalap saqayghini 18, ölgen san 0 dep yézilghan. Shundaqla yerlik da'iriler yuqum ehwalining ünümlük kontrol qilinip, yéngi yuqumdarlarning bayqalmighanliqi, bir aydin buyan yuqumning tarqilishtin toxtighanliqini ilgiri sürgen.

Uyghur aptonom rayonluq sehiye da'irilirining ötken hepte élan qilishiche, hazirgha qeder Uyghur aptonom rayonida wirustin yuqumlinip ölgenler 2 neper bolup, jem'iy 44 neper yuqumdar doxturxanida dawalanmaqtiken. Emma Uyghur aptonom rayoni da'irilirining mezkur sanliq melumati közetküchilerni qayil qilalmighan.

"Nyu-york pochtisi géziti" we "Wal strét zhurnili" ning xewer qilishiche xitay da'iriliri korona wirusidin 2019-yili dékabirdila xewer tapqan bolsimu, bu wirus heqqidiki uchur we delil-ispatlarni buyruq chüshürüp basturup qoyghan.

3-Yanwar xitay döletlik sehiye komitéti bu heqtiki uchurlarni kontrol qilish we delil-ispatlarni yoqitish heqqide buyruq chüshürgen.

Amérika awam palatasi ezasi marko rubiyo ötken jüme küni élan qilghan bayanatidimu, xitayning yuqumlan'ghuchilarning heqiqiy sanini mexpiy tutqanliqi we xitayning heqiqiy san mesilide yalghanchiliq qilghanliqini tekitligenidi.

Toluq bet