Xelq'ara kechürüm teshkilati "Ürümchi réstorani" da jaza lagérliri toghrisida söhbet uyushturghan

Ixtiyariy muxbirimiz ekrem
2019-06-19
Élxet
Pikir
Share
Print
Gollandiyening rottérdam shehiridiki "Ürümchi réstorani" nida ötküzülgen xelq'ara kechürüm teshkilatining yighinidin bir körünüsh. 2019-Yili 17-iyun. Rottérdam, gollandiye.
Gollandiyening rottérdam shehiridiki "Ürümchi réstorani" nida ötküzülgen xelq'ara kechürüm teshkilatining yighinidin bir körünüsh. 2019-Yili 17-iyun. Rottérdam, gollandiye.
RFA/Ekrem

Gollandiyening rottérdam shehiridin kelgen melumatlargha asaslan'ghanda, xelq'ara kechürüm teshkilati rottérdam shöbisining yashlar bölümi 17-iyun küni chüshtin kéyin "Ürümchi réstorani" da sherqiy türkistandiki jaza lagérliri toghrisida mexsus söhbet yighini uyushturghan.

D u q medeniyet bölümining mudiri, rottérdamdiki "Ürümchi réstorani" ning xojayini zeynidin ependi öz nöwitide yene xelq'ara kechürüm teshkilatiningmu ezasi bolup, u bu qétimqi jaza lagérliri söhbet yighinigha sahibxaniliq qilghan. 

Bu qétimqi yighin'gha xelq'ara kechürüm teshkilatining teklipi bilen amistérdamdiki dam meydanida bir yildin buyan jaza lagérlirigha qarshi yekke halda namayish qilip nam chiqarghan abdurehim ghéni ependimu qatnashqan bolup, u bu heqte toxtalghanda, yighin ehlining özi dawamlashturup kéliwatqan hem resim körgezmisi xaraktéridiki namayish hem imza toplash pa'aliyitige bekrek qiziqqanliqini tilgha aldi.

Bu qétimqi jaza lagérliri toghrisidiki söhbet yighinigha Uyghurlarning tarixi we bügünki weziyitini yaxshi bilidighan gollandiyediki bir Uyghur yashmu teklip qilin'ghan. U yighin ehlige Uyghurlarning ötmüshi we nöwettiki échinishliq ehwali toghrisida bir sa'etke yéqin doklat bergen. U, yashlarning "Biz jaza lagérlirigha qarshi qandaq yardem qilalaymiz?" dégen so'allirigha qarita öz teshebbuslirini otturigha qoyup ötken. 

Zeynidin tursun ependining bayan qilishiche, xelq'ara kechürüm teshkilatining gollandiye shöbisi yéqinqi mezgillerdin buyan jaza lagérlirigha qarshi doklatlar hazirlap gollandiye hökümiti hem yawropa parlaméntigha sunuwatqan bolup, ular aldimizdiki künlerde bu xizmitini yene dawamlashturidiken. Zeynidin tursun ependi sözide, Uyghurlar we jaza lagérliri mesilisini köprek chet'elliklerge anglitishning zörürlükini tekitlidi.

"Ürümchi réstorani" bundin 4 yil ilgiri yawropadiki eng chong port sheherliridin biri bolghan gollandiyening rottérdam shehiride zeynidin tursun ependi teripidin échilghan bolup, bu 4 yil jeryanida u xelq'ara kechürüm teshkilati bilen hemkarliship "Sherqiy türkistan mesilisi" toghrisida bu réstoranda köp qétim türlük ilmiy yighilish pa'aliyetlirini uyushturup kelgen. 25-May küni bu réstoran rottérdam sheher merkizide 200 kishilik heqsiz lengmen arqiliq jaza lagérliri mesilisini yerlik xelqqe anglitishqa tirishqan idi.

Melum bolghinidek, zeynidin tursun ependi her yili "5-Iyul ürümchi weqesi", "5-Féwral ghulja weqesi", "5-Aprél barin weqesi" qatarliq qanliq weqelerning yil xatirisini rottérdamdiki ochuq meydanda gülchembirek tizip xatirilep, Uyghur jama'itining hörmitige sazawer bolghan gollandiyediki Uyghur siyasiy aktipliridin biridur.

Toluq bet