Уйғурларни асас қилған көчмәнләрниң тәһдиткә учришиниң алдини елиш тәклип лайиһәси голландийә парламентиниң қараридин өткән

Мухбиримиз меһрибан
2021-10-14
Share
Уйғурларни асас қилған көчмәнләрниң тәһдиткә учришиниң алдини елиш тәклип лайиһәси голландийә парламентиниң қараридин өткән Уйғурларни асас қилған көчмәнләрниң тәһдиткә учришиниң алдини елиш тәклип лайиһисини сунған голландийә парламент әзаси рубен брекелманс(Ruben Brekelmans) әпәнди голландийә парламентида. 2021-Йили 31-март.
Ruben Brekelmans ependining Facebook hésabatidin élin’ghan

Уйғурларни асас қилған көчмәнләрниң тәһдиткә учришиниң алдини елиш тәклип лайиһәси 12-өктәбир күни голландийә парламентиниң қараридин өткән.

Мәлум болушичә, "парламент әзаси брекелманниң голландийәдики көчмәнләрниң чәт әл һөкүмәтлириниң тәһдидигә учраш әһвали голландийәниң кишилик һоқуқ сияситидин орун елиш һәққидики тәклип лайиһәси" дегән намдики бу тәклип лайиһәси, голландийә парламент әзаси рубен брекелман тәрипидин сунулған икән.

Мәзкур тәклип лайиһәси голландийә парламентиниң тор бетидә рәсмий елан қилинған. Мәзкур лайиһәниң мәзмунидин мәлум болушичә, униңда голландийәдә яшаватқан уйғурлар вә башқа көчмәнләрни хитай җасуслири яки башқа мустәбит дөләтләрниң бесимлири һәм тәһдитилиридин қоғдаш оттуриға қоюлған. Униңда уйғур қатарлиқ көчмәнләрниң тәһдиткә учраш мәсилисини дөләтниң кишилик һоқуқ сиясити бойичә мәхсус һөҗҗәт чиқирип, буни голландийәниң йиллиқ кишилик һоқуқ доклатиға киргүзүш қатарлиқ мәзмунлар оттуриға қоюлған.

Игилинишичә, голландийәдики уйғур тәшкилатлиридин "голландийә уйғур кишилик һоқуқ фонди" голландийәдики уйғурларниң хитай һөкүмитиниң түрлүк тәһдитлиригә учраш әһвали һәққидә голландийә һөкүмити вә бир қисим сиясий партийәләрниң рәһбәрлири билән көрүшүп, бу мәсилини һәл қилиш йоллири үстидә пикирләшкән икән.

"голландийә уйғур кишилик һоқуқ фонди" дин әхмәтҗан қасим радийомиз зияритини қобул қилип, голландийә парламент әзаси рубен брекелман тәрипидин оттуриға қоюлған бу тәклип лайиһәсиниң вуҗутқа чиқиши һәққидә мәлумат бәрди.

Әхмәтҗан қасимниң билдүрүшичә, бу тәклип лайиһәсини оттуриға қойған парламент әзаси рубен брекелман әпәнди голландийә ташқий ишлар министерлиқиниң хитай вә асия әллири ишлириға мәсул хадими икән.

Голландийәдики уйғур паалийәтчилиридин асийә уйғур ханимму зияритимизни қобул қилип, мәзкур тәклип лайиһәсиниң кәлгүсидә голландийәдә яшаватқан уйғурларниң шәхсий бихәтәрлики вә хатирҗәмликигә елип келидиған капалити, шуниңдәк әмәлий үнүми һәққидә тохталди.

Асийә ханим мундақ деди: "бу тәклип лайиһәсиниң голландийә парламентида қарардин өтүши, голландийәдики уйғурларниң, болупму уйғур сиясий актиплириниң хитай һөкүмитиниң һәр хил һуҗум-тәһдитлиригә учраш әһвалиға қарита голландийә дөлитиниң арлишидиғанлиқидин дерәк бериду."

Йоқуриқи аваз улинишидин тәпсилатини аңлиғайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт