Gollandiye muxbirining Uyghurlar heqqidiki qisqa filimi zor tesir qozghidi

Muxbirimiz méhriban
2020-10-26
Share
NOS-Gollandiye.jpg Gollandiye döletlik téléwiziyesi n o s yeni gollandiye radiyo fondining béyjingdiki muxbiri shorddén da'as ependim.
Social Media

Yéqinda gollandiye döletlik téléwiziyesi n o s yeni gollandiye radiyo fondining xewer qanilida, gollandiyening béyjingdiki muxbiri shorddén da'as teripidin ishlen'gen Uyghurlar heqqidiki 8 minutluq qisqa höjjetlik filim bérildi.

Xitay hökümitining teklipi bilen Uyghur diyarida ziyarette bolghan gollandiye muxbiri ishligen bu qisqa filim gollandiye taratqulirida we ijtima'iy taratqularda hembehirlinip zor tesir qozghidi. 

Muxbir shorddén da'as teripidin ishlen'gen 8 minutluq qisqa filimde, muxbirning Uyghur rayonida filim ishlesh jeryanida yoluqqan tosqunluqlar we öz közi bilen körgen heqiqiy ehwallar eks ettürülgen. U ziyaret jeryanidiki saqchilarning nazariti, tosqunluqi, u sin'gha éliwalghan yéngidin quruluwatqan lagérlar heqqidiki körünüshler, poyiz istansisida saqchilarning nazaritide oqush namida yiraq seperge élip méngilghan Uyghurlar, Uyghurlarning muxbirning ziyaret qilishini qorqunch ichide ret qilghanliqi, emma rayondiki xitay sayahetchilirining bolsa, hemme yerni saqchilar qaplighan Uyghur diyari weziyitidin cheksiz memnunliqi, xitay puqralirining özini bixeter hés qilghanliqini eynen süretke alghan. Xitay hökümitining rayonda yürgüzgen qattiq nazaret sistémisini qollap éytqan sözlermu filimgha kirgüzülgen.

Melum bolushiche, mezkur filimni ishligüchi gollandiye muxbiri shorddén da'asning Uyghur rayoni ziyariti xitay tashqi ishlar ministiri wang yining bu yil 8-ayning 25-künidin 9-ayning 1-künige qeder yawropadiki gérmaniye, italiye, gollandiye, fransiye we norwégiye qatarliq 5 dölettiki ziyaritidinn kéyin élip bérilghan. Xitay bash ministiri wang yining yawropa muxbirlirini Uyghur rayonida ziyaret qilip xewer ishlise bolidighanliqi heqqide qilghan sözliri eyni chaghdiki yawropa taratqulirida xewer qilin'ghanidi.

Gollandiyediki Uyghur pa'aliyetchiliridin asiye Uyghur xanim ziyaritimizni qobul qilip, muxbirning özining Uyghur rayonida uchrighan tosqunluqlar we körgen ehwallar arqiliq, Uyghur rayonining, xitay tashqi ishlar ministiri wang yining gollandiye ziyariti mezgilide éytqanliri we xitay hökümet teshwiqatigha pütünley oxshimaydighan ré'alliqini pakitlar arqiliq yorutup bergenlikini bildürdi. 

Asiye xanimning qarishiche, mezkur filim tarqitilghandin kéyin xitay hökümitining Uyghur rayoni teshwiqati meqsitide orunlashturulghan bu qétimqi ziyaretning ünümi xitay hökümiti kütkenning tamamen eksiche bolghan. 

Asiye xanim sözide, mezkur filimning xitayning yawropada yaxshi obrazini tiklesh üchün Uyghurlar heqqide élip barghan bir qatar yalghan teshwiqatigha ejellik zerbe bergenlikini bildürdi. 

Asiye xanim yene xitay tashqi ishlar ministiri wang yining bu yil 8-ayning axiri yawropadiki 5 dölette élip barghan ziyaritining meqsidi we uning ziyaritining yawropada qarshi élinmighan netije bilen axirlashqanliqini bildürdi. Uning qarishiche mezkur filimning gollandiyede qoyulushi bilen gollandiyede xitay hökümitining Uyghurlargha qaratqan irqiy qirghinchiliq siyasitige bolghan tonush yenimu kücheygen. 

Ziyaritimiz axirida asiye xanim yene, gollandiye döletlik téléwiziyeside qoyulghan Uyghur weziyiti heqqidiki filimning bu derijide tesir qozghishining ehmiyiti heqqide toxtaldi. 

U Uyghur teshkilatliri we her bir Uyghurning Uyghurlar uchrawatqan zulumni öz dölitidiki hökümet organliri we xelqige anglitishning zor ünüm béridighanliqini tekitlep, gollandiyediki Uyghur teshkilatliri we Uyghurlarning bu jehette köp tirishchanliq körsitiwatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.