Гугул ширкити хитайға “учар әҗдиһа” юмтали ишләп беришни тохтидиғанлиқини елан қилди
2019.06.21
“хәлқара тибәт тори” ниң хәвиридин мәлум болушичә, 19-июн күни гугулниң сан-франсискодики баш ширкитидә ечилған пайчилар йиғинида гугул ширкитиниң баш ледири кент валкер мухбирларниң соалиға җаваб берип, хитайға “учар әҗдиһа” юмталини ишләп бериш пиланниң әмәлдин қалдурулғанлиқини җакарлиған.
Хәвәрләрдин мәлум болушичә, 6-айниң 19-күни сан-франсискодики гугул ширкитиниң баш штабида йиғин ечиливатқан мәзгилдә чәтәлләрдики хитайға қарши өктичи тәшкилатлардин әркин тибәт тори, дуня уйғур қурултийи вә хәлқара истемалчиларниң һәқ-һоқуқлирини қоғдаш тәшкилатиниң чақириқи билән американиң сан-фарансиско, нйо-йорк, канаданиң торунто, франсийәниң париж, австралийәниң сидней қатарлиқ шәһәрләрдики гугул ширкәтлириниң алдида наразилиқ намайиши өткүзгән.
19-Июн күни чүштин кейин канаданиң торунто шәһиридики гугул ширкитиниң алдида наразилиқ намайиши елип берилған.
Мәлум болушичә, мәзкур наразилиқ паалийитигә канададики әркин тибәт оқуғучилар тәшкилати, канада шәрқий түркистан җәмийити вә хитай демократлири вәкиллиридин хәлқара қәләмкәшләр җәмийитиниң муавин башлиқи шең шө ханим шуниңдәк бир қисим паалийәтчиләр қатнашқан.
Канададики “әркин тибәт оқуғучилар тәшкилати” мәсули сонам тсо намайиш мәйданида гугул ширкити хитай үчүн ясап бериватқан “учар әҗдиһа” юмталиниң яман ақивитини агаһландуруп, нутуқ сөзлигән.
У сөзидә гугул ширкитини “хитай коммунист һөкүмитиниң қол чомиқиға айлинип қалмаслиқ” қа чақирған. У йәнә әгәр гугул ширкити хитайниң тәлипи бойичә “учар әҗдиһа” юмталини ишләп базарға салса хитай һөкүмити униңдин пайдилинип хитай һөкүмитигә қарши пикир еқимидикиләрни назарәт қилиш, тутқун қилиш, һәтта чегра атлап чәтәлләрдә хитайға қарши паалийәттә болуватқан тибәт, уйғур паалийәтчилири вә өктичиләргә қол созуши мумкинликини илгири сүргән. У йәнә хитай һөкүмитиниң бу юмталдин пайдилинип, өктичиләрниң учурлирини топлайдиғанлиқи, уларға һәр хил җинайи бәтнамларни артип уларни чегра атлап тутқун қилиши үчүн асанлиқ яритилидиғанлиқини баян қилған. У йәнә буниң пүткүл йәр шаридики инсанларниң интернет торидики әркин алақисиға тәһдит характерлик яман ақивәтләрни елип келидиғанлиқини агаһландурған.
Канадада шәрқий түркистан җәмийитиниң рәиси туйғун абдувели әпәнди зияритимизни қобул қилип, гугулниң канададики ширкитиниң алдида елип бериватқан наразилиқ намайиши һәққидә мәлумат бәрди. У бу қетимқи наразилиқ намайишини әркин тибәт тори, дуня уйғур қурултийи қатарлиқ тәшкилатларниң чақириқиға бинаән канададики әркин тибәт оқуғучилар тәшкилатиниң тәшкиллигәнликини билдүрди.
Канададики хитай демократлиридин хәлқара қәләмкәшләр җәмийитиниң муавин башлиқи шең шө ханим зияритимизни қобул қилди вә бу қетим өзлири елип бериватқан наразилиқ паалийити һәмдә униң мәқсити һәққидә тохталди.
Илгирики хәвәрләрдин мәлум болушичә, гугул ширкитиниң хитай ичидә гугул матори арқилиқ издәш техникисиға ярдәм беридиған “учар әҗдиһа” юмталини ясаш пилани 2018-йилиниң 7-вә 8-ай мәзгиллиридә ашкариланған. Гугул торидин мәлум болушичә, 2018-йил 9-айниң 27-күни гугулниң кейс әнрайт исимлик бир юқири дәриҗилик әмәлдари гугул ширкитиниң 2017-йил әтияздин башлап мәзкур пилан һәққидә ойлишиватқанлиқини билдүргән. Бултурдин буянқи хәлқара таратқуларниң хәвәрлиридә йәнә гугулниң ички қисмидики бир қисим хизмәтчиләр мәзкур пиланға наразилиқини билдүрүп, хизмитидин истепа бәргән.
Чәтәлләрдә паалийәт елип бериватқан уйғур, тибәт вә хитай демократчилириниң тәшкилатлири, хәлқарадики кишилик һоқуқ тәшкилатлириму наразилиқ баянатлар елан қилип, гугул ширкитини хитай һөкүмити билән һәмкарлашмаслиққа чақирған. Америка һөкүмәт органлири вә бир қисим әмәлдарларму 2018-йилиниң ахиридин башлап гугул ширкитини агаһландурған. “тибәт авази” ториниң 2018-йил 12-айниң 19-күнидики хәвиридә гугул ширкитиниң ишчи-хизмәтчилириниң наразилиқи сәвәбидин мәзкур пиланниң вақтинчә тохтитилғанлиқи хәвәр қилинған иди.