Sitokholmdiki ejdadlar mirasidin zoqlan'ghan Uyghur yashlirining xushalliqi

Myunxéndin ixtiyariy muxbirimiz ekrem teyyarlidi
2024.03.20
mata-rextlerge-gul-besish-1.jpg “Uyghur sergezchilik hüniri bilen terbiyilesh kursi” da Uyghur yashlirining mata rextlerge tebi'iy boyaqlar bilen gül bésish hünirini öginish mehsulatidin körünüsh. 2024-Yili, mart, sitokholm, shiwétsiye.
RFA/Ekrem

Melumatlargha asaslan'ghanda, az dégende 2000 yilliq tarixqa ige ikenliki ilgiri sürülüwatqan Uyghurlarning mata rextlerge tebi'iy boyaqlar bilen gül bésishtin ibaret qedimiy sergezchilik hüniri bügün'ge kelgende bir tereptin xitayning assimilyatsiye siyasitining bésimi, yene bir tereptin yuqiri téxnologiyening riqabiti seweblik Uyghur diyarida asasen yoqilish girdabigha bérip qalghan. 2016-Yili jaza lagérliri qurulghandin buyan Uyghur neqqashchiliqi bilen bézelgen minglighan medeniy yadikarliqlar Uyghur diyarida weyran qilip tashlan'ghan'gha oxshash, Uyghur sergezchilik hünirimu ziyankeshlikke uchrawatqan milliy kimlikning bir terkibi qismi süpitide tehdit astida qalghan.

Emma shiwétsiyediki bir bölek Uyghur yashliri ana wetinide yoqilishqa yüz tutqan bu medeniyet yaldamisini siymasini aldinqi hepte sitokholm shehiride ötküzülgen “Uyghur sergezchilik hüniri bilen terbiyelesh kursi” da öz közliri bilen körüsh pursitige érishken. Uyghur yashliri ejdadlardin miras qalghan bu en'eniwi hünerni neq meydanda körüpla qalmay, yene özliri qol sélip ishlep öginish arqiliq bezi netijilerni yaritishqa, özliri yaratqan ijadiyetlerning güzellikidin zoqlinishqa muyesser bolup köp shadlan'ghan.

“Uyghur sergezchilik hüniri bilen terbiyilesh kursi” da Uyghur yashlirining mata rextlerge tebi'iy boyaqlar bilen gül bésish hünirini öginish mehsulatidin körünüsh. 2024-Yili, mart, sitokholm, shiwétsiye.

Shiwétsiye paytexti sitokholmdiki “Shiwétsiye Uyghur medeniyet, tenterbiye uyushmisi”, “Shiwétsiye yash Uyghurlar uyushmisi”, “Shiwétsiye mehmud kashigheri ana til mektipi” birlikte uyushturghan bu kursqa sergezchilik hüniridin melumati bolghan bir ustaz yétekchilikke teklip qilin'ghan. Kursqa qatnashqan Uyghur yashliri sergezchilikning tarixi we Uyghur medeniyiti toghrisida melumatlargha érishipla qalmay, en'eniwi hüner bilen zamaniwi téxnologiye birleshtürülgen Uyghur sergezchilikidin ders alghan hem neq meydanda piraktika qilghan. Uyghur sergezchilikige qiziqqan bir qisim shiwétsiyeliklermu bu pa'aliyetke ishtirak qilghan.

Mezkur kursni teshkilleshke qatnashqan “Shiwétsiye Uyghur medeniyet, tenterbiye uyushmisi” ning ezaliridin elining bildürüshiche, bu xildiki özgiche pa'aliyetlerni ötküzüshtiki meqset, shiwétsiyede tughulup chong bolghan Uyghur perzentlirige Uyghur medeniyiti, tarixi we en'enilirini ögitish, ularning qelbide ana wetini toghrisida chüshenche peyda qilish iken. Bu kursqa qatnashqan yene bir Uyghur qizimu Uyghur sergezchiliki toghrisida érishken bilimliridin özining köp memnun bolghanliqini ipade qildi.

Shiwétsiyede ösüp yétilgen Uyghur qizliridin mahide bu heqte toxtalghanda, özige oxshash chet elde yétilgen Uyghur perzentliri üchün bu kursning Uyghur en'eniwi hüner-sen'itini öginishning qimmetlik bir pursiti bolghanliqini, bu hünerdin paydilinip özliri bésip chiqarghan türlük buyumlardin iptixarlan'ghanliqini we uni hazirgha qeder pexirlinish ichide ishlitip kéliwatqanliqini tilgha aldi. Kursqa ishtirak qilghan yene bir Uyghur qizimu bu xildiki pa'aliyetlerning bekla qiziqarliq bolidighanliqini, bundin kéyin köprek mushundaq jelp qilish küchi yuqiri pa'aliyetlerning teshkillinip turushini ümid qilidighanliqini tekitlidi.

“Uyghur sergezchilik hüniri bilen terbiyilesh kursi” da Uyghur yashlirining mata rextlerge tebi'iy boyaqlar bilen gül bésish hünirini öginish mehsulatidin körünüsh. 2024-Yili, mart, sitokholm, shiwétsiye.

Uyghur medeniyitining bir qismi bolghan Uyghur sergezchilik hünirining ana wetinidin tolimu yiraqta bolghan shiwétsiyedek bir dölette qaytidin tirilishi we namayan bolushi muhajirettiki Uyghurlarning yuqiri bahasigha érishken. Ijtima'iy taratqularda pikir bayan qilghuchilar, chet elde Uyghur ana tilini saqlap qélish yolida ejir singdürüwatqan pidakarlarning mana mushuninggha oxshash en'eniwi medeniyet iznalirini qoghdash we yashitishtek emeliy pa'aliyetlergimu belgilik éghirliq bérishining intayin muhimliqini tekitleshken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.