“Dunya” géziti gülbahar jélilowaning öyini közetken kishilerning xitay dölet xewpsizlik organlirigha tewe kishiler ikenlikini ashkarilighan

Firansiyede chiqidighan “Dunya” gézitining 18-may küni élan qilghan xewirige qarighanda, firansiye ichkiy xewpsizlik bash idarisi (DGSI) bilen parizh saqchi idarisi, 8-may küni gülbahar jililowani öz ichige alghan parizhdiki Uyghur siyasiy musapirlirigha qarita élip bérilghan “Qorqutush herikiti” de, xitay dölet xewpsizliki organlirigha tewe kishilerning qoli barliqini ashkarilighan.

Xewerde yene xitay dölet xewpsizliki xadimlirining ammiwi sorunlarda heriket qilghanliqi, ularning heriketlirige firansiye saqchiliri arilashqandin kéyinmu öz heriketlirini dawamlashturghanliqi eskertilgen.

Shi jinpingning yawropa ziyariti dawam qiliwatqan peytte, yeni 8-may küni parizh waqti 11 lerde kimliki namelum qara kiyimlik sekkiz kishi qara kichik aptomobil bilen lagér shahiti gülbahar jélilowa xanimning öyining aldigha kelgenidi. Ular gülbahar xanimning öyining qongghuriqini nechche qétim basqan we yan téléfonighimu nechche qétim téléfon qilghan. Eyni waqitta gülbahar xanim sirtqa chiqip ketken bolup, bu ehwalni bayqighan qoshniliri uni öyige qaytmasliqqa agahlandurghan.

Eyni waqitta gülbahar xanim arqa-arqidin yüz bergen parakendichilik tüpeyli keypiyati bek nachar bolghachqa so'allirimizgha jawab bérelmey qalghanidi. U bügün radiyomizning ziyaritini qobul qilip, 8-may küni özining béshigha kelgen ehwallarni tepsiliy anglatti.

Firansiyediki aktip pa'aliyetchi, yawropa Uyghur institutining mes'uli doktor dilnur reyhan xanim bu weqe heqqide ispat toplap sotqa erz qilishqa teyyarliniwatqan bolup, u bu heqte radiyomizgha qisqiche melumat berdi. U 8-may küni gülbahar xanimgha qilin'ghan parakendichilikning meqsiti heqqide saqchilarning ulargha téxi éniq bir jawab bermigenlikini bildürdi.

Gülbahar xanim “Dunya” géziti ashkarilighan uchurlardin öz izigha chüshken yochun ademlerning xitay dölet xewpsizliki idarisige tewe kishiler ikenlikini bilgen. Bu heqte toxtilip mundaq dédi: “Biz lagér shahitlirida xitayning Uyghurlargha yürgüzüwatqan jinayetliri toghriliq nurghun ispatlar bar. Shunga xitay bizni qorqutup guwahliq bergüzmeslikke tirishiwatidu.”

Dilnur xanimning éytishiche, firansiye hökümet terep bu weqege qarita héchqandaq inkas bildürmigen. U bu heqte toxtilip, “Makron hökümiti shi jinpingni renjitip qoymasliq üchün bu ishta jim turdi” dep qaraydighanliqini bildürdi.

Gülbahar xanimning éytishiche, uninggha natonush nomurlardin kélidighan téléfonlar yene dawamlishiwétiptu. U hazir sirtqa köp chiqmastin nahayiti éhtiyat bilen heriket qilidiken. U xitayning suyiqestliridin saqlinish üchün, bashqa lagér shahitliriningmu her da'im bixeterlikige diqqet qilishni tewsiye qildi.

Biz bu délo heqqide parizh sheherlik saqchi idarisi (préfecture de police de Paris) din melumat élish üchün yene élxet ewettuq, emma ular bizning ziyaret telipimizge yene jawab qayturmidi.