Гүлбаһар җелилованиң өйиниң алдида пәйда болған қара рәңлик машина вә қара кийимлик адәмләрниң кимлики диққәт қозғимақта

Вашингтондин мухбиримиз нуриман тәйярлиди
2024.05.09
qara-van-kishiler Гүлбаһар җелилова ханимниң өйиниң алдида тохтитип қоюлған қара рәңлик машина вә униң әтрапида турған қара кийимлик адәмләр. 2024-Йили 8-май, париж
Дилнур рәйһан

Хитай рәиси ши җинпиң 5-май күни явропа зиярити үчүн фирансийәгә йетип барған болуп, явропадики 6-майдин 10-майғичә давамлишидиған үч дөләт зияритиниң тунҗи бекити фирансийә болғаниди. 5-Май күни париждики әң мәшһур орунларниң бири болған “мадөлән” (Place de la Madeleine) мәйданида фирансийәдә яшайдиған уйғурлар вә уйғурларни қоллайдиған фирансийәликләр намайиш өткүзгән; намайишқа лагер шаһитлиридин гүлбаһар җелилова вә гүлбаһар хативаҗи ханимларму қатнашқаниди.

Явропа уйғур институтниң мәсули дилнур рәйһан ханим 5-май күнидики намайишқа хитай милләтчилириниң нәччә гуруппиға бөлүнүп һәр хил шәкилдә тосқунлуқ қилишқа урунғанлиқини билдүргәниди. Униң ейтишичә, кимлики намәлум болған, йүзлиригә маска тақивалған бир түркүм қара тәнлик яшлар қоллирида дуня уйғур қурултийи рәиси долқун әйсаниң вә өзиниң қара бәлгә урулған рәсимини көтүрүп, намайиш мәйданиға бөсүп киргәнликини ейтқан. Намайиш түгигәндин кейин, дилнур вә лагер шаһитлири фирансийәдики даңлиқ ахбарат қаналлириниң зиярәтлирини қобул қилған. Улар фирансийә пирезиденти макронниң милйонлиған уйғурларни лагерларға қамиған ши җинпңни күтүвелишини өзлиригә қилған һақарәт дәп һес қилғанлиқини билдүргән.

Ши җинпиңниң явропа зиярити давам қиливатқан пәйттә, йәни 8-май күни париж вақти 11 ләрдә кимлики намәлум қара кийимлик сәккиз киши қара кичик аптомобил билән лагер шаһити гүлбаһар җилилова ханимниң өйиниң алдиға кәлгән. Улар гүлбаһар ханимниң өйиниң қоңғуриқини нәччә қетим басқан вә ян телефониғиму нәччә қетим телефон қилған. Әйни вақитта гүлбаһар ханим сиртқа чиқип кәткән болуп, бу әһвални байқиған қошнилири уни өйигә қайтмаслиққа агаһландурған.

Биз бу һәқтә тәпсилий мәлуматқа еришиш үчүн гүлбаһар ханим билән алақиләштуқ. Гүлбаһар ханим бихәтәр бир җайға йөткәлгән болуп, ишәнчлик кишиләр тәрипидин қоғдиливетипту. Лекин арқа-арқидин йүз бәргән паракәндичилик түпәйли кәйпияти бәк начар болғачқа соаллиримизға җаваб берәлмәй қалди. Шуңа гүлбаһар ханимниң йенида баштин-ахир турған дилнур рәйһан ханим у күни йүз бәргән әһваллар һәққидә тәпсилий мәлумат бәрди.

Уйғур мәсилисини фирансийәдә күнтәртипкә әкелиштә муһим рол ойнаватқан явропа парламентиниң әзаси рафаил гилукисмән өзиниң X һесабида, гүлбаһар ханимниң өйиниң алдида тохтитип қоюлған қара рәңлик машина вә униң әтрапида турған қара кийимлик адәмләрниң рәсимини елан қилип, мундақ дәп язған: “һазир парижда мундақ вәқә йүз бериватиду: қара машинидики хитайлар хитай лагерлиридин һаят қалған гүлбаһар җелиловани издәватиду. Улар униң ишикиниң қоңғуриқини басмақта. У йошурунувелиши керәк. Бу (хитай) һакимийәтниң бизниң туприқимизда яшаватқан кишиләргә зиянкәшлик қилишиға қандақсиға йол қойдуқ? бунчә аҗиз болушни қачан тохтитимиз? ”

5-Май күни елип берилған намайиштиму, кимлики намәлум болған, йүзлиригә маска тақивалған бир түркүм қара тәнлик яшларниң намайишқа бөсүп киргәнликини тилға алғанидуқ. Мәлум болушичә, уларниң қоллирида көтүрүвалған йүзигә қара бәлгә урулған рәсимләрниң арисида әң көп болғини дуня уйғур қурултийи рәиси долқун әйсаниң рәсими иди.

Долқун әйса әпәнди хитайниң муһаҗирәттики уйғурларға түрлүк шәкилләрдә елип бериватқан паракәндичилики һәққидә радийомизға сөз қилип, хитайниң чегра һалқиған бастурушиниң шәклиниң өзгириватқанлиқини тәкитлиди. У йәнә дуняниң һәр қайси җайлиридики паалийәтчиләрни хитайниң җисманий зиянкәшликидин агаһ болушқа чақирди.

Дилнур рәйһан ханимниң билдүрүшичә, у вә униңға охшаш паалийәтчиләр хитай истихбарати тәрипидин орунлаштурулған һәр хил шәкилдики паракәндичиликкә даим учрап туридикән. Зияритимиз җәрянида, у хитай тәшвиқати чапланған бир машининиң йеқинқи бир нәччә айдин өзи нәгә барса шу йәрдә пәйда болуп қалидиғанлиқини тилға алди.

Дилнур ханим ахирида қара рәңлик машина билән гүлбаһар ханимниң өйиниң алдиғичә кәлгән қара кийимлик адәмләр һәққидә биваситә сотқа әрз қилиш үчүн адвокат билән көрүшүватқанлиқини билдүрди. Униң ейтишичә, сақчилар бу һәқтә уларға ениқ бир мәлумат бәрмигән, пәқәт тәкшүрүшниң давам қиливатқанлиқини билдүргән.

Биз бу дело һәққидә париж шәһәрлик сақчи идариси (préfecture de police de Paris) дин мәлумат елиш үчүн елхәт әвәттуқ, әмма улар зиярәт тәлипимизгә техи җаваб қайтурмиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.