Lagér shahiti gülzire awulqan qizi tughqanlirining sotlan'ghanliqini bildürdi

Muxbirimiz méhriban
2019-08-23
Share
Arslan-Sersanbek.jpg Lagér shahiti gülzire awulqan xanimning érining tékes nahiyisidiki lagérgha qamalghan newre akisi sersanbék ekber.
Photo: RFA

Qazaqistanda menggülük turush ruxsiti, yeni yéshil kartisi bar gülzire awulqan qizi 2017-yili 7-ayning 19-künidin 2018-yil 10-ayning 17-künigiche xitayning ghuljidiki lagérida 15 ay yatqan, kéyin ghuljidiki melum lagér ichige qurulghan peley zawutida mejburiy emgekke sélin'ghan waqitni qoshqanda lagérda 2 yildin artuq tutup turulghan.

Gülzire awulqan qizi 2018-yili yil axiri xitay lagéridin qoyup bérilip, qazaqistan'gha qaytip kelgendin kéyin, ijtima'iy tor béketliri we erkin asiya radiyosi qatarliq taratqulargha lagérlarning ichki ehwalini ashkarilighanidi. U yene ghuljidin ayrilishtin ilgiri xitay da'irilirining özini agahlandurup, eger lagérda körgenlirini ashkarilisa aqiwitige özi ige bolidighanliqi heqqide wediname yazdurup andin qoyup bergenlikinimu bildürgen. Gülzire awulqan qizi bu yil 7-ayning 16-küni radiyomiz ziyaritini qobul qilghinida, xitay saqchilirining uning ghuljidiki uruq-tughqanliri arqiliq dawamliq téléfon qildurup, lagérlar heqqidiki uchurlarni yene ashkarilisa yurtidiki tughqanlirini solaydighanliqi heqqide tehdit salghanliqinimu bildürgenidi. 

Bügün, yeni 23-awghust küni, gülzire xanim radiyomiz Uyghur bölümige téléfon qilip, xitay da'irilirining uning ghuljidiki uruq-tughqanliridin ikkiylenni lagér ichide yépiq sot échip höküm élan qilghanliqi heqqide yéqinda uchur alghanliqini bildürdi.

Uning bildürüshiche, u yéqinda bashqilar yetküzgen melumattin, da'irilerning uning érining tékes nahiyisidiki lagérgha qamalghan newre akisi sersanbék ekber we mongghulküre nahiyisidiki lagérgha qamalghan taghisi xanza sélimghoja üstidin sot échip, sersanbék ekberge bir yilliq, taghisi xanza sélimghojigha 17 yilliq qamaq jazasi höküm qilghanliqidin xewer tapqan.

Gülzire xanimning bildürüshiche, saqchi da'iriliri uning ghuljidiki tughqanliri üstidin lagér ichidila échilghan yépiq sotning hökümini ghuljidiki tughqanlirigha aghzaki shekilde yetküzgen. Emma sotning höküm qeghizi tughqanlirining qoligha bérilmigen.

Sersanbék ekber oghlining qazaqistan grazhdani bolghan ayali gülnur qoshdöwlet xanimmu ziyaritimizni qobul qilip, qazaqistanda yashash ruxsetnamisi bar sersanbék ekber oghli 2017-yili 10-ayning 25-küni qazaqistandin ghuljigha qaytqinida, tutqun qilinip tughulghan yurti tékestiki lagérgha qamalghanliqi we uningdin kéyin özining érini yoqlash üchün birqanche qétim tékeske barghanliqi heqqidiki tepsilatlarni anglatti.

Uning bayanidin melum bolushiche, bu a'ile qazaqistan'gha köchüp kélishtin ilgiri, yeni 2000-yillarning deslepki mezgilide uning éri sersanbék ekber tékes nahiyisining baqaliq qishliqida partkom sékrétarliq wezipiside bolghan. Saqchilar uni chégrada tutqun qilghinida, uning qazaqistan'gha köchüp yerlishishi we a'ilisini béqish üchün qazaqistan bilen xitay otturisida qatnap tijaret qilishini uning "Dölettin yüz örüshidiki jinayi pakitliri" qilip körsetken. 

Gülnur xanim yene éri sersanbék ekber oghli tékes lagérigha qamalghan mezgilide, özining uni qutquzush üchün 2017-yil 11-aydin 2018-yil10-aygha qeder ilgiri-axir töt qétim tékes nahiyisige bérip, lagérdiki érini yoqlighanliqini bildürdi.

Uning bildürüshiche, éri sersanbékni qutquzush üchün ikki yildin buyan köp tirishchanliq körsetken bolsimu, emma da'irilerning uni lagér ichidila mexpiy sotlap türmige élip kétishi, sersanbékning lagérdin qoyup bérilishini ümid ichide kütüwatqan bu bir a'ile kishilirini éghir ghem we qattiq azabqa qoyghan.

Gülzire xanimning bildürüshiche, 17 yilliq qamaq jazasigha höküm qilin'ghan taghisi xanza sélimghojining besh waq namaz oquydighan teqwadar kishi bolghanliqi we ikki qizini musulmanlarning qa'idisi boyiche urunup yürüshke dewet qilghanliqi uning jinayi pakiti qilip körsitilgen. 

Gülzire xanimning bayanidin melum bolushiche, da'iriler sersanbék ekber oghli we xanza sélimghoja üstidin 2019-yil yéngi yildila sot achqan bolsimu, emma saqchilar ularning tughqanliridin sot échilghanliqi heqqidiki xewerni ularning qazaqistandiki tughqanlirigha, bolupmu xelq'ara taratqularning ziyaritini qobul qiliwatqan gülzire awulqan'gha yetküzmeslikni telep qilghan iken.

Yuqiriqi awaz ulinishidin söhbetning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet