Лагер шаһиди гүлзирә авулқанқизи: «лагерға тәкшүргүчиләр келиштин бурун чачлиримизни боятқузди»

Мухбиримиз шөһрәт һошур
2019-05-01
Елхәт
Пикир
Share
Принт
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Social Media

Өткән йилниң ахири уйғур районидики йиғивелиш лагеридин қоюветилгән вә нөвәттә қазақистанда яшаватқан гүлзирә авулқанқизи түнүгүн, йәни 29‏-апрел күни ютуб қанилида тунҗи қетим гуваһлиқ баянати елан қилди. У баянатида икки йилдин артуқ ятқан ғулҗа наһийисидики бир лагерниң ички әһваллири һәққидә тәпсилий мәлумат бәрди. Гүлзирә өрқанниң паш қилишичә, һәр қетим лагерға тәкшүргүчиләр кәлгәндә лагердикиләр өз әһвали һәққидә ялған сөзләшкә мәҗбурланған. Оқутқучилар өйлиридин тәштәклик гүлләрни елип келип лагерни вақитлиқ безигән. Һәтта лагердики бир қисим аялларниң чачлири боялған.

Һөрмәтлик радио аңлиғучилар, лагер шаһидлиридин өмәр бекали, меһригүл турсун, гүлбаһар җелилова вә сайрагүл сайитқанлардин кейин йәнә бир гуваһчи оттуриға чиқти. Түнүгүн ютубта гуваһлиқ баянати елан қилған 5‏-гуваһчи гүлзирә авулқанқизиниң паш қилишичә, лагерларни тәкшүрүшкә һәр қетим адәм кәлгәндә улар күлүп турушқа, тәкшүргүчиләргә тәбәссум билән беқишқа мәҗбурланған. Улар бу орунда түрмә һаятини баштин кәчүрүватқан болсиму, лекин өзиниң кәспий тәрбийә көрүватқанлиқи вә бу орундин рази икәнликини дейишкә буйрулған. Лагерда улар қуруқ гүрүч вә хемир билән озуқлиниватқан болсиму, һәр күни қой вә кала гөшидә беқиливатқанлиқини дейишкә зорланған. Гүлзирә авулқанқизиниң дейишичә, һәтта даириләр тутқунларниң роһий кәйпияти вә тәқи-турқини тамамән пәрқлиқ көрситиш үчүн тәкшүргүчиләргә көрүнидиған аялларниң чечини бойиған. 

Хитай даирилири йеқиндин буян хәлқара җамаәт пикриниң бесими билән бир қисим тәкшүрүш өмәклириниң уйғур районидики лагерлар үстидә тәкшүрүш елип беришиға йол қойған. Әмма районға барған тәкшүргүчиләр, кишилик һоқуқ тәшкилатлириниң доклатидикидин пәрқлиқ мәнзирә билән учрашқан болуп, тәкшүргүчиләр бу йәрдә әркин-азадә яшаватқан вә өз әһвалидин мәмнунлуқини бәс-бәстә баян қилған, нахша ейтип вә уссул ойнаватқан 22 яш билән 40 яш арисидики кәсип өгиниватқан аталмиш «бәхтлик яшлар» ни көргән иди.

Шаһит гүлзирә авулқанқизи бу гуваһлиқ баянатида юқириқи мәнзириниң сахта икәнликини паш қилипла қалмастин, бәлки йәнә хитай даирилириниң лагер һәққидә дөләт ичидики тәшвиқатиниңму сахтилиқини паш қилди. Мәлум болушичә, 2017‏-йили 7‏-айниң 17‏-күни лагерға әкирип кетилгән гүлзирә авулқанқизи 2018‏-йили 10‏-айда лагердин қоюп берилгән. У қоюп берилгәндин кейинму қазақистанға кетишигә дәрһал йол қоймиған. У ғулҗида өткүзүлгән байрақ чиқириш йиғинлирида өзиниң лагердики кәчмиши һәққидә сахта доклат беришқа мәҗбур болған. У доклатида өзи еғир азаб чәккән бу лагерларни махтиған. Ши җинпиң вә хитай компартийисигә рәһмәт ейтқан. 

Гүлзирәниң йәнә паш қилишичә, даириләр лагердики тутқунларниң аилә-тавабиатидинму тутқунларниң һәқиқий әһвалини йошурған. Тутқунлар аилиси билән учраштурулидиған чағда учришиш орниға койза-кишән билән апирип әкелингән, пәқәт аилә-тавабиатиниң көз алдидила улардики койза-кишән еливетилгән вә көрситилмигән. 

Илгирики ениқлашлиримиздин мәлум болушичә, хитай даирилири йиғивелиш лагерлириға адәм топлиғанда аилиләрдин аввал яшларни, андин дадиларни, униңдин кейин аниларни елип кәткән. Башта әкетилгәнлири қалған аилә әзалириниңму әкетилишини тәхмин қилмиған. Бу нөвәт гүлзирәниң паш қилишичә, даириләр кишиләрни лагерға топлиғанда һазирқидәк ениқсиз бир муддәттә әмәс, пәқәт 15 яки 20 күнлүк мөһләт билән елип кәткән. Гүлзирәму 15 күн мөһләт билән әкитилип, қазақистандики аилә тавабиатиниң һәрикәт қилиши билән 2 йилдин кейин қоюп берилгән. 

«Ата юрт» тәшкилатиниң 15‏-апрел күни ютубта елан қилған бир сөһбәт хатирисидин мәлум болушичә, нөвәттә қазақистанда яшаватқан йәнә лагер шаһити бәхтигүл көшәнбай ғулҗа текәстики лагерға алдап апирилған, йәни сақчилар униңға пәқәт бәдән тәкшүрүшкә елип маңғанлиқини уқтуруп, униңдин кейин лагерға әкетилидиғанлиқини уқтурмиған. 

Гүлзирәниң гуваһлиқ баянатидин мәлум болушичә, гүлзирә әсли ғулҗа наһийисидин болуп, у йолдиши вә қизи билән бирликтә 2014‏-йили қазақистанға көчүп кәлгән. У 2017 ‏-йили 7‏-айда юртиға қайтқанда ғулҗа наһийисидики лагерға соливелинған. Гүлзирә баянатида өзиниң ғулҗа наһийисиниң бейсәнпо дегән йеридики лагерда турғанлиқини тилға алған. Биз өткән йили ғулҗа наһийисидики бир йиғивелиш лагери хадимини зиярәт қилған вақтимизда у өзиниң бейсәнпо, йәни шимали тағ қаптили дейилидиған бир җайдики лагерда хизмәт қилидиғанлиқини паш қилған иди.

Пикирләр (0)
Share
Толуқ бәт