Lagér shahiti gülzire awulqanqizi: "Ular bizge choshqa göshini 'tughqanlar tamiqi' dep mejburiy yégüzdi"

Muxbirimiz shöhret hoshur
2019-05-13
Élxet
Pikir
Share
Print
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Social Media

Qazaqistanliq lagér shahiti gülzire awulqanqizi ötken ayning 30-küni yutub qanilida lagérda körgenliri heqqide guwahliq bayanati élan qilghan idi. U bügün muxbirimizning ziyaritini qobul qilip, lagérlar heqqide yene bir türküm yéngi uchurlarni ashkarilidi. U lagér xadimlirining özige choshqa göshini "Tughqanlar tamiqi" yaki "Dostlar tamiqi" dep mejburiy yégüzgenlikini, choshqa göshi gélidin ötmey qusuwetken chéghida "Idiyengde mesile bar" dep eyibligenliki we "Ornungni yötkiwétimiz" dep tehdit salghanliqini bayan qildi.

Ghulja nahiyesining döngmehelle ayallar lagérida bir yérim yil turghan gülzire awulqanqizi lagérdiki mezgilde asasen gürüch bilen qizil qonaq (gawlyang) yégenliki, anda-sanda arilap güsh bérilgenliki, emma bérilgen göshler qatarida choshqa göshiningmu barliqini ashkarilidi. Uning déyishiche, lagér xadimliri uninggha choshqa göshi sélin'ghan tamaqlarni bezide "Tughqanlar tamiqi", bezide "Dostlar tamiqi" dep mejburiy yégüzgen. Xadimlar choshqa göshini bérishtin awwal milletler ittipaqliqining muhimliqi, chaghan mezgilliride xitaylar bilen bardi-keldi qilishning zörürlükini tekitlep, ularning lagérdiki mezgilde mana mushundaq munasiwetke özini teyyarlishi kéreklikini éytqan. Deslepte gülzire köngli éliship choshqa göshi sélin'ghan tamaqni qusuwetken. Bu chaghda xadimlar uni "Idiyengde mesile bar" dep tenqid qilghan we dawamliq qusuwetse ornini yötkiwétidighanliqini bildürüp tehdit salghan. Gülzire choshqa göshi sélin'ghan tamaqni amalsiz yégenlikini we asta-asta qusmaydighan bolghanliqini, lékin shuningdin kéyin ashqazini aghriydighan bolup qalghanliqini ashkarilidi.

Gülzirening déyishiche, lagérdikilerge göshlük tamaqlar her küni emes, arilap bérilgen. Köpinche hallarda quruq gürüch bilen qizil qonaq yégüzülgen. Lagérdiki oqutquchilar öyidin ekelgen nanlirini ulargha ich aghritip ötünüp bergen chaghdila, gülzire kaméradin özini qachurup we nanni alghinida püklep tiqip turup yégen. Gölzire yene lagérgha deslepte apirilghanda choshqa göshi bérilmigenliki, emma aylar ötkendin kéyin tamiqining barghanséri nacharlashqanliqi we choshqa göshige köndürülgenlikini éytti.

Ötken yili qeshqerdiki bir lagér saqchisi bilen ötküzgen söhbitimiz dawamida u lagérdikilerge choshqa göshi bérilidighan yaki bérilmeydighanliqi heqqidiki so'alimizgha jawab bermigen bolsimu, emma lagérdikilerning halal-haramni ayrish heqqining yoqluqini, néme berse shuni yéyishke mejbur ikenlikini ashkarilighan idi.

Gölzire özining choshqa göshini körse köngli éliship we ashqazini aghrip tursimu, uni ret qilalmighanliqi, eksiche tekshürgüchiler kelgende lagérning tamiqini yaxshi dep maxtighanliqi, choshqa göshi yégenlikini yoshurup, qoy we kala göshide béqiliwatqanliqini sözleshke mejbur bolghanliqini ashkarilidi.

Toluq bet