Японийәдә тунҗи қетим кәң-көләмлик гуваһлиқ бериш паалийити өткүзүлди

Ихтиярий мухбиримиз әркин тарим
2020-10-12
Share
nagawo-takashi-uyghur-guwahliq.jpg Японийә авам палатаси әзаси нагаву такаши әпәнди уйғурларниң һазирқи еғир әһвалини аңлитиш вә гуваһлиқ бериш паалийитидә сөз қилмақта. 2020-Йили 10-өктәбир, японийә.
RFA/Erkin Tarim

10-Өктәбир күни японийәниң осака шәһиридә парламент әзаси маруяма әпәнди вә японийә уйғур җәмийитиниң уюштуруши билән чоң көләмлик уйғурларниң һазирқи еғир әһвалини аңлитиш вә гуваһлиқ бериш паалийити өткүзүлгән.

Бу паалийәткә японийә авам палатаси әзаси нагаву такаши әпәнди, 12 нәпәр йәрлик парламент әзаси вә қошна шәһәрләрниң шәһәр башлиқлири иштирак қилған. Дуня уйғур қурултийиниң японийәдики вәкили вә японийә уйғур җәмийитиниң пәхрий рәиси илһам мәхмут әпәнди японийәдә өткүзүлгән тунҗи қетимлиқ гуваһлиқ бериш йиғининиң интайин үнүмлүк өткәнликини баян қилди.

Бу гуваһлиқ бериш илһам мәхмут әпәнди, японийә уйғур җәмийитиниң рәиси доктор абдукерим абдурахман әпәнди, муавин рәиси әхмәт летип әпәнди вә идарә һәйити әзаси хәлмәт розахун әпәндиләр иштирак қилған. Әхмәт летип әпәнди мәзкур йиғинда уйғурларниң һазирқи еғир вәзийити тоғрисида мәхсус доклат бәргән.

Хәлмәт рузахун әпәндиниң билдүрүшичә, йиғинда осака вә шу әтрапта туруватқан 6 нәпәр уйғур өз юртлиридики ата-анилири вә уруқ-туғқанлири болуп 100 дәк киши тоғрисида гуваһлиқ бәргән. Хәлмәт розахун әпәнди бу һәқтә бизгә мәлумат бәрди.

10-Өктәбир күни японийәниң осака шәһиридә өткүзүлгән мәзкур гуваһлиқ бериш йиғинда японийә авам палатаси әзаси нагаву такаши әпәндиму сөз қилип, японийә парламентидики «уйғур достлуқ гурупписи» ни тездин һәрикәткә өткүзүдиғанлиқи тоғрисида вәдә бәргән. Халмәт әпәнди бу һәқтиму мәлумат бәрди.

Илһам мәхмут әпәнди бу паалийәтниң мәзмун җәһәттин бай һәм шундақла японийәдики уйғурларниң лагерларға қамалға уруқ-туғқанлири тоғрилиқ тунҗи қетимлиқ гуваһлиқ бериш паалийити болғанлиқини, буниң японийәдә бундин кейинки миллий дәва ишлири үчүн зор әһмийәткә игә икәнликини билдүрди.

Хәлмәт розахун әпәнди 2017-йилидин тартип японийәдики уйғурларниң көпләп уйғурларға мунасивәтлик сиясий паалийәтләргә қатнишиватқанлиқини, бу паалийәтниңму японийәдә тунҗи қетим зор көләмдә өткүзүлгән бир гуваһлиқ бериш йиғини болғанлиқини, буниң японийәдики уйғурларниң японийә уйғур җәмийитиниң әтрапиға зич уюшуп паалийәт елип баралайдиғанлиқиниң бир испати икәнликини оттуриға қойди.

10-Өктәбир күни кәч саәт 7 дин 9 ғичә японийәниң осака шәһиридә өткүзүлгән японийә парламент әзалири вә көп санда японлар иштирак қилған тунҗи қетимлиқ гуваһлиқ бериш йиғиниң ахирида японлар уйғурларниң қолини тутуп туруп: «биз силәрни қоллаймиз, биз һәр даим силәрниң йениңларда» дегән. Хәлмәт розахун әпәнди бу тәсирлик көрүнүшләр һәққидиму мәлумат бәрди.

Японийә уйғур җәмийиитиниң рәһбәрлири японийәдики уйғурларниңму вәтәндики ата-ана вә уруқ-туғқанлириниң хитайниң җаза лагерлирида яки түрмилиридә икәнликини, бундин кейин бундақ гуваһлиқ бериш паалийәтлирини японийәниң һәр қайси җайлирида қанат яйдуридиғанлиқини тәкитләшти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.