“Xéngda guruhi” ning qerz krizisi dawamlashmaqta

Ixtiyariy muxbirimiz azigh
2021-11-11
Share
“Xéngda guruhi” ning qerz krizisi dawamlashmaqta “Xéngda guruhi” binasining aldidiki namayishchilarni tosup turghan saqchilar. 2021-Yili 17-séntebir, shénjén.
REUTERS

Qerz krizisigha boghulghan “Xéngda guruhi” 10-ayda tölesh waqti toshqan tashqi qerzining ösmini töliyelmey, tölesh mudditi 30 künlük muddet bilen uzartilghanidi. Nöwette, “Xéngda guruhi” ning üch tashqi qerzining 148,1 milyon dollarliq ösümini tölesh waqti 10-noyabir küni toshqan.

“Nyu-york waqti” géziti we “Blomberg” agéntliqining xewiride “Xéngda guruhi” ning qerz ösümlirini töligenlikige a'it xewer élan qilin'ghan bolup, “Roytérs” agéntliqining xewiride bolsa qerz ösümini töliyelmigenliki éytilghan.

Xitaydiki eng chong öy-mülük shirketlirining biri bolghan “Xéngda guruhi” 9- we 10-aylarda mudditi toshqan qerz ösümlirini töliyelmigen idi.

“Xéngda guruhi” ning omumiy qimmiti 2.38 Tirilyon yüen bolup, nöwette mezkur shirketning omumiy qerzi xitayning ichki ishlepchiqirish omumiy qimmitining 2% ni igileydiken.

Amérikadiki Uyghur ziyaliyliridin iqtisadshunas qeyser mijit ependi ziyaritimizni qobul qilip, “Xéngda guruhi” ning kirzisqa pétip qilishining sewebliri we “Xéngda guruhi” ning qerz kirizisigha pétip qilishining xitay iqtisadigha körsitiwatqan tesiri toghrisida tepsiliy toxtilip ötti.

“Xéngda guruhi” ötken birnechche yildin buyan xitay hökümitining türlük basturushlirigha we cheklimilirige duch kéliwatqan bolup, 20-séntebirde mezkur shirketning nyu-york pay chéki baziridiki payliri zor derijide chüshüshke bashlighan. Netijide “Xéngda guruhi” 300 milyard amérika dolliri qerzge boghulup, xitay iqtisadigha éghir tehdit shekillendürgen. “Xitaygha meblegh sélip payda élish” ni merkez qilghan soda endizisi éghir krizisqa duch kelgen bolup, gherb pul-mu'amile apparatlirining xitaydiki pul-mu'amile sahesige bolghan ishinishi töwenleshke bashlighan. Mutexessisler bu qeder zor kölemdiki bir shirketning intayin az ösüm qerzlirini töliyelmeslikini, chong kölemdiki qerz krizisning yétip kélish aldida ikenlikining béshariti dep qarimaqta.

Xitay ishliri mutexessisi memettoxti atawulla ependi ziyaritimizni qobul qilip, xitayning öy-mülük saheside yüz bériwatqan krizisning xitaydiki siyasiy muqimliqqa we bixeterlikke tesir körsitidighanliqini éytti.

Nöwette “Xéngda guruhi” ning 171 banka we 121 pul mu'amile apparatigha qerzi bar bolup, xéngda guruhi qerzlirini töleshte meghlup bolsa, xitayda keng kölemde pul mu'amile krizisi yüz bérishi mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet