Һәптилик хәвәрләр (15-21 - январ)


2005-01-21
Share

Уйғур дияридики партлашлар

Қурбан һейти йетип келип, һәммә мусулманлар шатлиққа чөмүватқан бу күнләрдә 20-январ күни уйғур дияриниң майтағ билән шихо арисидики чоң йолда кетиватқан бир минибус партлап, 12 кишиниң өлгәнлики хәвәр қилинди. Хитай ахбарат вастилири арқилиқ тарқитилған учурдин мәлум болушичә, бу кичик типтики аптобус пәйшәнбә күни чүш саәт 1:30 өткәндә партлиған болуп, 8 киши нәқ мәйданда ,төт киши дохтурханида қаза қилған. Учурларға қариғанда қаза қилғучилар асасән уйғурлар икән.

Буниңдин башқа йәнә охшаш бир күндә үрүмчи шәһириниң сәншихаңза районидики ават базарда партлаш йүз бәргән болуп, хитай даирилири бу партлашниң йол астиға ятқузулған газ турубисидин газ қечиштин келип чиққанлиқини билдүргән. Хәвәрдә көрситилишичә йолда кетиватқан икки киши қаза қилған бир қанчә киши яриланған.

Уйғурлар қурбан һейтни тәбриклиди

Қурбан һейти мунасивити билән вәтән ичи-сиртидики уйғурлар қурбан һейтни тәбриклиди. Чәт әлләрдики уйғур җамаитиниң вәкиллири вәтәндики уйғур қериндашлирини һейт билән қутлуқлап салам йоллиди. Дуня уйғур қурултийиниң рәиси әркин алиптекин әпәнди вә башқа әрбаблар вәтәнниң ичи-сиртидики уйғурларниң һейтини мубарәклиди.

Йәнә үч нәпәр хитай уйғур аптоном райониға муавин рәис болди

Өткән һәптидә уйғур аптоном районлуқ хәлқ қурултийиниң йиғин ахирлишип, йәнә үч нәпәр хитай әмәлдари уйғур аптоном райониниң муавин рәисликигә бекитилиш билән хитай муавин рәисләрниң сани бурунқидин ашурулғанлиқи һәққидә учур тарқалди. Хәвәрләргә қариғанда бу үч муавин рәисниң икки нәпири партком секритари ваң лечүәнниң юртдеши болуп, улар шәндоң өлкисидин икән. Бу мунасивәт билән чәтәлләрдики күзәткүчиләр хитай даирлириниң өзлири түзгән аптономийә қануниға хилаплиқ қилип, аталмиш шинҗаң уйғур аптоном районидики һәр дәриҗилик рәһбири һоқуқларни асасий җәһәттин хитайларниң қолиға тапшуриватқанлиқини, һәр қайси назарәт вә органлардики ишчи хизмәтчиләрниң мутләқ көп қисимини хитайлар игиләш билән биргә уйғур тилиниң әмәлдин қалдуруғанлиқини тәнқид қилди.

Түркийә телевизийисидә уйғурларға аит программа көрситилди

Түркийидики әң чоң дөләтлик телевизийә қанили т р т да 17-январ күни"мәрһаба дуня" сәһиписи бойичә мәхсус уйғурларниң тарихи, мәдәнийити вә һазирқи сиясий, иқтисадий әһвалиға аит программа тонуштурулди. Түркийидики әң чоң телевизийә қанилида уйғурларниң тонуштурилиши зор бир йеңилиқ болуп, бу техиму көп түркләрниң шәрқий түркистанни чүшиниши үчүн пайдилиқ икән.

Америкида приздентиниң қәсәм бериш мурасими өткүзилди

1-Айниң 20-күни америка призденти җеорҗи бушниң 2- қетимлиқ приздентлиқ вәзиписини тапшуривелиш қәсәмяд мурасими вашингтон шәһиридә өткүзилди. 500 Миннға йеқин адәм қатнашти дәп қариливатқан бу мурасимда буш инҗилға сол қолини қоюп туруп, америка алий сотиниң башлиқиға рәсми қәсәм берип, өзиниң америка хәлқиғә хизмәт қилидиғанлиқини билдүрди.

Буш йәнә қисқичә нутуқ сөзләп, америкиниң буниңдин кейинки ички-ташқи сияситиниң муддиаси һәққидә тохталди . Америкиниң 43-нөвәтлик призденти һесаблинидиған җеорҗи бушниң бу қетимқи вәзипә тапшуривелиш мурасими наһайити дағдуғилиқ өткүзүлгән болуп, көплигән сақчилар, бихәтәрлик хадимлири ишқа селинип, мурасимниң бихәтәрлики капаләткә игә қилинди.

Җав зияңға тәзийә билдүрүлди.

Өткән һәптидә хитайниң 1989-йилидики тянанмен оқуғучилар һәркитини қоллиғанлиқи үчүн вәзиписин қалдурулуп, нәзәрбәнд қилинған сабиқ хитай дөләт рәһбири җав зияң өлгәндин кейин, хәлқара йүзидә зор ғул-ғулилар шуниңдәк униңға нисбәтән баһалар елан қилинди. Хитай даирлириму униң үчүн дәпн мурасими өткүзидиғанлиқини билдүрди, бирақ вақти һәм шәкли һәққидә һеч немә демиди. Хитай демократлири җяв зияңниң демократийини қоғдаш йолида күрәш қилғанлиқини муәййәнләштүргән болсиму, лекин уйғурлар униң йәнила бир хитай милләтчиси сүпитидә уйғур оқуғучилар һәркитини бастурғанлиқини оттуриға қойди. Бу һәқтә дуня уйғур қурултийиниң баянатчиси дилшат решит мәхсус тохталди.

Сәккиз хитай ирақта гөрүгә елинди

Өткән һәптидә ирақта сәккиз нәпәр хитай ишчиси ирақтики қораллиқ гуруппилар тәрипидин гөрүгә еливелинди. 21- январ күни тарқитилған бир касетида қораллиқ адәмләр" хитай һөкүмитидин буниңдин кейин хитай пуқралирини ираққа әвәтмәслик һәққидә баянат елан қилиш "ни тәләп қилғанлиқи көрситилгән. Һазирчә хитай даирилири бу пуқралирини қутулдуруш үчүн һәркәт қиливатқан болсиму, лекин һазирчә униңдин хәвәр йоқ ,лекин хитай һөкүмити өз пуқралирини ираққа бармаслиққа дәвәт қилған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт