Һәптилик хәвәрләр (5-12- март)хәлқара хәвәрләр


2005-03-11
Share

Үрүмчидики қассаплар иш ташлиди

Уйғур ели вә үрүмчи хәвәр торлиридин пәйшәнбә күни берилгән хәвәрләргә қариғанда, үрүмчидә 9 –март бир күн ичидә қой вә кала гөшиниң баһаси 70-80٪ әтрапида өрләп, бир кило қой гөшиниң баһаси 15 йүәндин 22 йүәнгә, кала гөшиниң баһаси 16 йүәндин 22 йүәнгә чиққан. Униң үстигә хуалиң, тйәнйиң қатарлиқ үч чоң қушханиниң һәммисидә әтигән саәт 10 лардила гөш қалмиған. Хәвәрдә көрситилишичә, баҗ органлири қушхана баҗлирини вә мунасивәтлик чиқимлирини көпәйтивәткәнлики үчүн қассаплар наразилиқ билдүрүп иш ташлиған.

Өткән йили үрүмчи даирилири үрүмчидики әң чоң мусулманлар қушханисини тақивәткәндин кейин, 3000 дин артуқ қассап тарқап кәткән иди.

Бир милйон 500 дин артуқ адәм техи телевизор көрәлмәйду

Хитайниң рәсми хәвәрлиригә қариғанда , уйғур аптоном районлуқ радио-телевизийә хизмәт йиғинидин ашкарилинишичә, һазир уйғур елидә бир милйон 500 миңдин артуқ намрат йеза аһалиси телевизор көрәлмәйдикән вә радио аңлиялмайдикән.

Уйғур күзәткүчилириниң билдүрүшичә, бу асаслиқи уйғур деһқанлириға қаритилған болуп, уйғур деһқанлириниң намратлиқ әһвали алаһидә гәвдилик икән.

Хитай қазақистан-хитай чегрисида хәлқара шәһәр қурмақчи

Өткән һәптидә бейҗиңда өткүзүлгән хитай-қазақистан юмулақ үстәл йиғинида хитай мутәхәссислири бу икки мәмликәтниң чегрисидики қорғас әтрапида хәлқаралиқ сода шәһәрчиси қуруш тәклипини оттуриға қойған. Бундақ чегра сода базири ечишни мәссәд қилған һәмкарлиқ мәсилиси қазақистан вә хитай арисида илгириму музакирә қилинғандин сирт йәнә шаңхәй һәмкарлиқ тәшкилатиниң йиғинидиму оттуриға қоюлған иди.

Хәлқара хәвәрләр

Җяң земин вәзиписидин қалди

Хитайниң сабиқ дөләт рәиси җяң земин сәйшәнбә күни хитайниң мәмликәтлик хәлқ қурултийида мәркизий һәрбий ишлар комитетиниң рәисилик вәзиписидин истипа бәрди.

Бу җяң земинниң сиясий сәһнидин рәсми чүшкәнликини көрситидикән. Җяң земин 1989-йилидин етибарән 15 йил хитайниң сиясий вә һәрбий һоқуқини тутқан иди.

Чәтәлләрдики фалуңгоң муртлири вә хитай демократийичилири уни фалуңгоңчиларни қирғин қилиш , демократийигә қарши туруш сиясити йүргүзди дәп әйибләп, сотлашни оттуриға қойған .

Тәйвән дөләт мудапиә министирилики хитайниң "бөлүнүшәк қарши қануни"ни әйиблиди

Тәйвән дөләт мудапиә министирлики чаршәнбә күни "дөләтни парчилаш қануни"ниң хитайниң 5 йилдин 10 йилғичә болған арилиқта тәйвәңә һуҗум қилишқа һазирлиқ қиливатқанлиқини көрситидиғанлиқини билдүрди.

Тәйвән тәрәп хитайниң бу қануниниң әмәлийәттә тәйвәнниң мустәқил болушиға қарши туруш һәмдә тәйвәнгә һәрбий һуҗум қилиш үчүн чиқирилғанлиқини көрсәтти. Бу мунасивәт билән тәйвән тәрәпму "йүтүвелишқа қарши туруш" қануни лайиһисини оттуриға қоюп, хитайниң мәзкур қануниға тақабил турмақчи болған.

Нөвәттә, америка һөкүмитиму хитайниң мәзкур қануниниң намувапиқ икәнликини тәктиләп, тәйвән мәсилисини тенч йол билән һәл қилишни тәшәббус қилмақта. Америка хитайниң "бөлүнүшкә қарши туруш қануни"ни чиқиришни қайта ойлушуш тәклипини оттуриға қойған болсиму, бирақ хитай уни рәт қилди.

Чечәнистан рәһбири арислан мәшәдоп өлтүрүлди

8-Март күни русийә даирилири мустәқилчи чечән рәһбири, чечән ичкирийә җумһурийитиниң президенти арислан мәшәдопниң русийә әскәрлири тәрипидин өлтүрүлгәнликини елан қилди.

10-Март күни чечәнләр мәшәдопниң орниға униң муавини вә чечәнистан шәрийәт сотиниң башлиқи абдул хәлил сәйдуллайевни тәйинлигән. Шуниңдәк уларниң русийигә қарши мустәқиллиқ күришини тохтатмайдиғанлиқини билдүргән.

Мәшәдопниң өлүми мунасивити билән хитай һөкүмити русийә һөкүмитини қоллайдиғанлиқини елан қилған, әмма америка тәрәп болса русийиниң чечән мәсилисини сиясий йол билән һәл қилиш тәшәббусидин ваз кәчмәйдиғанлиқини оттуриға қойған, полша һөкүмити "мәшәдопниң өлтүрүшни бир сиясий дөтлүк һәмдә зор хаталиқ "дәп билдүргән . Чүнки, мәшәдоп чечән мустәқилчилири ичидики мәсилини сиясий йол билән һәл қилиш тәрәпдари болуп, у русийә даирилири билән сөһбәт өткүзүшни оттуриға қойған иди. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт