Heptilik xewerler (5-12- mart)xelqara xewerler

Ürümchidiki qassaplar ish tashlidi

Uyghur éli we ürümchi xewer torliridin peyshenbe küni bérilgen xewerlerge qarighanda, ürümchide 9 –mart bir kün ichide qoy we kala göshining bahasi 70-80٪ etrapida örlep, bir kilo qoy göshining bahasi 15 yüendin 22 yüen'ge, kala göshining bahasi 16 yüendin 22 yüen'ge chiqqan. Uning üstige xu'aling, tyenying qatarliq üch chong qushxanining hemmiside etigen sa'et 10 lardila gösh qalmighan. Xewerde körsitilishiche, baj organliri qushxana bajlirini we munasiwetlik chiqimlirini köpeytiwetkenliki üchün qassaplar naraziliq bildürüp ish tashlighan.

Ötken yili ürümchi da'iriliri ürümchidiki eng chong musulmanlar qushxanisini taqiwetkendin kéyin, 3000 din artuq qassap tarqap ketken idi.

Bir milyon 500 din artuq adem téxi téléwizor körelmeydu

Xitayning resmi xewerlirige qarighanda , Uyghur aptonom rayonluq radi'o-téléwiziye xizmet yighinidin ashkarilinishiche, hazir Uyghur élide bir milyon 500 mingdin artuq namrat yéza ahalisi téléwizor körelmeydiken we radi'o angliyalmaydiken.

Uyghur küzetküchilirining bildürüshiche, bu asasliqi Uyghur déhqanlirigha qaritilghan bolup, Uyghur déhqanlirining namratliq ehwali alahide gewdilik iken.

Xitay qazaqistan-xitay chégrisida xelqara sheher qurmaqchi

Ötken heptide béyjingda ötküzülgen xitay-qazaqistan yumulaq üstel yighinida xitay mutexessisliri bu ikki memliketning chégrisidiki qorghas etrapida xelqaraliq soda sheherchisi qurush teklipini otturigha qoyghan. Bundaq chégra soda baziri échishni messed qilghan hemkarliq mesilisi qazaqistan we xitay arisida ilgirimu muzakire qilin'ghandin sirt yene shangxey hemkarliq teshkilatining yighinidimu otturigha qoyulghan idi.

Xelqara xewerler

Jyang zémin wezipisidin qaldi

Xitayning sabiq dölet re'isi jyang zémin seyshenbe küni xitayning memliketlik xelq qurultiyida merkiziy herbiy ishlar komitétining re'isilik wezipisidin istipa berdi.

Bu jyang zéminning siyasiy sehnidin resmi chüshkenlikini körsitidiken. Jyang zémin 1989-yilidin étibaren 15 yil xitayning siyasiy we herbiy hoquqini tutqan idi.

Chet'ellerdiki falunggong murtliri we xitay démokratiyichiliri uni falunggongchilarni qirghin qilish , démokratiyige qarshi turush siyasiti yürgüzdi dep eyiblep, sotlashni otturigha qoyghan .

Teywen dölet mudapi'e ministiriliki xitayning "bölünüshek qarshi qanuni"ni eyiblidi

Teywen dölet mudapi'e ministirliki charshenbe küni "döletni parchilash qanuni"ning xitayning 5 yildin 10 yilghiche bolghan ariliqta teywenge hujum qilishqa hazirliq qiliwatqanliqini körsitidighanliqini bildürdi.

Teywen terep xitayning bu qanunining emeliyette teywenning musteqil bolushigha qarshi turush hemde teywen'ge herbiy hujum qilish üchün chiqirilghanliqini körsetti. Bu munasiwet bilen teywen terepmu "yütüwélishqa qarshi turush" qanuni layihisini otturigha qoyup, xitayning mezkur qanunigha taqabil turmaqchi bolghan.

Nöwette, amérika hökümitimu xitayning mezkur qanunining namuwapiq ikenlikini tektilep, teywen mesilisini ténch yol bilen hel qilishni teshebbus qilmaqta. Amérika xitayning "bölünüshke qarshi turush qanuni"ni chiqirishni qayta oylushush teklipini otturigha qoyghan bolsimu, biraq xitay uni ret qildi.

Chéchenistan rehbiri arislan meshedop öltürüldi

8-Mart küni rusiye da'iriliri musteqilchi chéchen rehbiri, chéchen ichkiriye jumhuriyitining prézidénti arislan meshedopning rusiye eskerliri teripidin öltürülgenlikini élan qildi.

10-Mart küni chéchenler meshedopning ornigha uning mu'awini we chéchenistan sheriyet sotining bashliqi abdul xelil seydullayéwni teyinligen. Shuningdek ularning rusiyige qarshi musteqilliq kürishini toxtatmaydighanliqini bildürgen.

Meshedopning ölümi munasiwiti bilen xitay hökümiti rusiye hökümitini qollaydighanliqini élan qilghan, emma amérika terep bolsa rusiyining chéchen mesilisini siyasiy yol bilen hel qilish teshebbusidin waz kechmeydighanliqini otturigha qoyghan, polsha hökümiti "meshedopning öltürüshni bir siyasiy dötlük hemde zor xataliq "dep bildürgen . Chünki, meshedop chéchen musteqilchiliri ichidiki mesilini siyasiy yol bilen hel qilish terepdari bolup, u rusiye da'iriliri bilen söhbet ötküzüshni otturigha qoyghan idi. (Ümidwar)