Һәптилик хәвәрләр (12- 18- март)


2005-03-18
Share

Рабийә қадир америкиға йетип кәлди

Атақлиқ уйғур кишилик һоқуқ вә җамаәт паалийәтчиси рабийә қадир ханим хитай һөкүмити тәрипидин қоюп берилип, америка бирләшмә һава йоллириниң йолучилар айропилани билән 17-апрел күни кәч саәт 5 тин 30 минут өткәндә алди билән америкиниң чикаго шәһиригә йетип кәлди. У, чикаго шәһиридә әркин асия радио истансимизниң мухбириниң зияритини қобул қилип, барлиқ уруқ-туққан, дост ярәнлири һәм хәлқиғә хитап қилип, өзиниң әркинликкә еришкәнликини һәмдә америка һөкүмитигә рәһмәт ейтидиғанлиқини билдүрди.

Рабийә қадир ханим америкиға маңдуриветилиштин икки күн илгири үрүмчидики балилири билән көрүштүрүлгән болсиму, лекин уларға әһвални ейталмиған икән.

Рабийә қадир ханимниң қоюп берилиши мунасивити билән униң мәңгүлүк һәмраһи сидиқ һаҗи рузи әпәнди мәхсус баянат елан қилип, хитай даирилириниң рабийә қадир ханимни қоюп бериш сәвәбиниң қандақтур, уларниң кәңчиллик қилғанлиқи әмәсликини, бәлки буниң уйғур хәлқиниң ғәлбиси икәнликини тәкитлиди шуниңдәк америка һөкүмитигә рәһмәт ейтти.

Вашингтондики уйғурлар рабийә қадирни күтүвалди

17-Апрел күни кәч саәт 10 лар әтрапида вашингтон шәһири әтрапидики вирҗиния, марйланд шитатидики уйғурлар вә америкилиқ инсан һоқуқи паалийәтчилири шундақла уйғурларниң достлиридин болуп 200 гә йеқин адәм реган хәлқаралиқ айродромида рабийә қадирни қарши алди. Шәрқий түркистанниң көк байрақчилири вә гүлләрни көтәргән кишиләр рабийә қадирниң америка ташқи ишлар министириликиниң мәхсус вәкиллири билән бирликтә иштин чиқишиға гүлдүрас алқишларни яңритишти һәмдә "рабийә қадир!, рабийә қадир!" дәп товлишип, өз қизғинлиқлирини вә һөрмәтлирини билдүрүшти.

Рабийә қадир нәқ мәйданда нәччилигән хәлқаралиқ чоң хәвәр агентлиқлириниң мухбирлириниң зияритини қобул қилип, өз тәсиратлирини баян қилди.

Аҗайип юқири һаяҗанлиқ мәнзирә хели узунғичә давамлашти, тәсирләнгән уйғурлар көз яшлирини ақтуруп, рабийә қадирға өзлирини етишип, худди өз анисини көргәндәк қучақлашти.

Рабийә қадир һәққидики инкаслар

Рабийә қадирниң хитай даирилири тәрипидин қоюп берилгәнлики мунасивити билән америка ташқи ишлар министирлики вә америка һөкүмити инкас қайтурди.

Ақ сарай баянатчиси скот макәлән "биз рабийә қадирниң қоюп берилишини қарши алимиз, гәрчә хитайда бу җәһәттә бәзи илгириләшләр болсиму, лекин биз йәнила хитайниң инсан һоқуқи әһвалиға диққәт қилимиз" деди.

Узундин буян инсан һоқуқи вә рабийә қадирни қоюп бериш мәсилисидә хитай һөкүмитини әйибләп келиватқан хәлқара кәчүрүм тәшкилатиму баянат елан қилип, хитайниң рабийә қадирни қоюп беришиниң мәсилиниң ахирлашқанлиқини көрсәтмәйдиғанлиқини, чүнки йәнә көплигән уйғур сиясий паалийәтчилириниң техи түрмиләрдә йетиватқанлиқини шәрһилиди.

Дуня уйғур қурултийиму бу мунасивәт билән мәхсус баянат елан қилип, бу мәсилигә көңүл бөлгән америка һөкүмити, америка дөләт мәҗлисигә рәһмәт ейтидиғанлиқини шуниңдәк рабийә қадирни қарши алидиғанлиқини билдүрди.

Рабийә қадирниң қоюп берилип, сақ-саламәт америкиға йетип кәлгәнлики һәққидики хәвәр дуня мәтбуатлири үчүн әң йеңи вә қизғин хәвәр болуп һесапланди. Америкидики "вашингтон почтиси." Вашингтон вақти" қатарлиқ нәччилигән атақлиқ гезитлар һәмдә "с н н " қатарлиқ телевизийә истансилири рабийә қадир вә уйғур мәсилиси һәққидә мәхсус учур тарқатти. Буниңдин башқа йәнә б б с, ройтерис вә башқа хәлқаралиқ агентлиқлар һәмдә һәр қайси дөләтләрниң учур агентлиқлириму рабийә қадирни мәркәз қилған һалда уйғурлар һәққидә мақалиларни басти.

Америка кишилик һоқуқ мәсилисидә хитайни әйибләш лайиһисини сунмайду

Америка бирләшмә ахбарат агентлиқиниң учуриға қариғанда америка җәнвәдә ечиливатқан б д т кишилик һоқуқ комитетиниң йиллиқ йиғинида, хитайниң кишилик һоқуқ әһвалини әйибләш лайиһисини сунмаслиқни қарар қилған. Бирақ, мунасивәтлик әрбаблар америкиниң буниңдин кейинму давамлиқ түрдә хитайниң кишилик һоқуқ вәзийитигә диққәт қилидиғанлиқини билдүрди.

Америка дөләт мәҗлиси авам палатаси чаршәнбә күни қарар мақуллап, америка һөкүмитидин хитайниң "дөләтни парчилашқа қарши қануни"ға интайин әһмийәт беришни тәләп қилди. Буниңдин сирт йән авам палата әзалири америка һөкүмитини мәхсус хадим тәйинләп, хитайниң "дөләтни парчилашқа қарши қануни" вә тәйвәңә қаратқан һәрбий тәһдидини күчәйтиши һәққидики әндишилирини хитай һөкүмитигә йәткүзүшкә чақирған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт