Һәптилик хәвәрләр ( 30- април 6-май)


2005-05-06
Share

Уйғур вәкиллири хәлқара йиғинда

4-Май күни италийиниң тағлиқ рета шәһиридә италийә рети муһаҗирлар җәмийити, италийә тәнһәрикәтчиләр бирләшмиси, финландийә қизил крест җәмийити вә дуня уйғур қурултийи қатарлиқ алтә тәшкилат бирлишип, "тосақлардин өтүш" дегән темида муһакимә йиғини ачқан. Бу паалийәттә дуня уйғур қурултийиниң баш катипи долқун әйса уйғурларниң нөвәттә учраватқан түрлүк мәсилилири шуниңдәк уйғур мәдәнийитиниң йоқитилишқа қарап йүзләндүриливатқанлиқини оттуриға қойди.

Түркийидә уйғурларниң кишилик һоқуқ мәсилиси һәққидә йиғин ечилди

Түркийиниң әнқәрә шәһиридә 30-апрел вә 1-май күнлири түрк дуняси кишилик һоқуқ җәмийити вә дуня уйғур қурултийи бирлишип, "шәрқий түркистандики кишилик һоқуқ мәсилилири" дегән темида муһакимә йиғини ачқан. Буниңға дуня уйғур қурултийи рәиси әркин алиптекин вә пәхри рәиси генерал реза бекин қатарлиқлар һәмдә йәнә туркийиниң атақлиқ сиясийонлири, җәмийәт башлиқлири иштирак қилип, сөз қилған.

Йиғинда әнгилийиниң атақлиқ язғучиси, " хитайниң ғәрбидики вәһши өлкә" намлиқ китабниң аптори кристиян тәйләр әпәнди "шәрқий түркистан вә хитай "дегән темида доклат бәргән. У хитайниң уйғурларға қаритиватқан сиясәтлирини тәнқид қилған.

Қирғизистан уйғур содигәрлириниң өстүрүлүш әһвалини ениқлимақчи

Қирғизистан әдлийә оргиниң башлиқи өткән һәптидә қирғизистанни зиярәт қилған америка уйғурлири җәмийитиниң вәкили билән көрүшкәндә, өткән йили қирғизистанниң нарен областида йүз бәргән уйғур елиға маңған аптобусни көйдүрүп, униңдики уйғур содигәрлирини өлтүрүш вәқәсини давамлиқ ениқлайдиғанлиқини билдүргән.

Қирғизистан әдлийә хадиминиң ашкарилишичә, бу аптобустики 19 җәсәт уйғурларниң болуп, хитай шопурни өз ичигә алған 5 адәмниң из дерики йоқ икән. Әйни вақитта бу дело давамлиқ тәкшүрүлүш елип берилмиған болуп, ақайев һөкүмити кона адити бойичә бу аптобусни аталмиш шәрқий түркистан террорчилириниң садир қилғанлиқини елан қилип, уйғур хәлқиниң наразилиқини қозғиған иди. Қирғизистан даирилири бешкәктә йүз бәргән бир қатар вәқәләрниң сирлиқ икәнликини билдүрмәктә.

Тәйвән хәлқпәрвәр партийиси рәһбири хитайни зиярәт қилған

Тәйвәндики "хәлқпәрвәрләр партийиси" ниң рәиси соң чуйү хитайни зиярәт қилған. У алди билән шиән қатарлиқ җайларда болғандин кейин, йәнә бейҗиң , шаңхәй қатарлиқ шәһәрләрни зиярәт қилишни алдин пилан қилған. Соң чуйү, хауң хе дәряси бойидики хитайларниң әҗдади һесабланған хуаңдиниң қәбрисигә берип, тавап қилиш паалийити өткүзгән.

Соң чуйү, хитай гоминдаң партийисиниң рәиси лян җандин кейинки хитайни зиярәт қилған иккинчи партийә рәһбири болуп, буларниң чоң қуруқлуқни тушму-туштин зиярәт қилип, хитай компартийә рәһбири ху җинтав билән көрүшиши хәлқара җәмийәтниң диққитини қозғиған.Әмма, гоминдаң партийисиниң рәиси лянҗанниң зияритидин кейин тәйвән иттипақ партийиси лян җанни әйибләп, униң үстидин тәйвән алий сотиға әриз сунған һәмдә униң қанунға хилаплиқ қилғанлиқини көрсәткән.

Әл қаидәниң үчинчи номурлуқ адими қолға чүшкән

Пакистан даирилири өткән һәптидә әл-қаидә тәшкилатиниң юқири дәриҗилик рәһбирини қолға чүшүргәнликини билдурди. Абу фараҗ әл либиб исимлик бу адәм мәзкур тәшкилатниң 3- дәриҗилик рәһбири болуп, униң осама бин ладенниң нәгә йошурунғанлиқини билиши мумкинлики пәрәз қилинмақта.

Вейтнам баш министири америкини зиярәт қилмақчи

Хәвәрләргә қариғанда америка билән ветнам дипломатик мунасивәт орнатқан он йилдин буян бу икки дөләтниң мунасивәтлири үзлүксиз яхшилинишқа башлиған, йеқинда ветнам баш миниситири мәхсус америкини зиярәт қилидиғанлиқини елан қилған болуп, күзәткүчиләр буни ветнамниң хитайниң тәһдитигә тақабил туруш үчүн таллиған йол болуши мумкин дәп қаримақта. Бу йил америка билән ветнам арисидики урушниң ахирлашқанлиқиниң 30 йиллиқи болуп һесаблиниду. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт