Һәптилик хәвәрләр ( 14-20 - май)


2005-05-20
Share

Қәһриман ана рабийә қадир үчүн йәнә мурасим

Уйғурларниң қәһриман аниси рабийә қадир ханим америкиға кәлгәндин кейин, униң шәрипи үчүн бир қатар қизғин вә дағдуғилиқ күтүвәлиш мурасимлири өткүзүлди.

19-Май күни америка уйғурлири бирләшмиси вә хәлқара тибәт һәрикитиниң бирликтә тәшкиллиши билән, вашингтон шәһиридә рабийә қадир ханим үчүн мәхсус күтүвәлиш мурасими уюштурулди. Америка дөләт мәҗлисиниң юқири дәриҗилик рәһбирий әзалиридин том лантос, франк волф вә сабиқ ярдәмчи ташқи ишлар министири лорн крайнер қатарлиқ әрбаблар бу мурасимни қоллиди. Сабиқ ярдәмчи ташқи ишлар министири лорн крайнер әпәнди мурасимда сөз қилип, рабийә қадирниң паалийәтлиригә юқири баһа бәрди.

Бу мурасимға америкиниң дипломатийә вә инсан һәқлиригә мунасивәтлик хадимлири, тибәт паалийәтчилири, уйғурлар вә мухбирлардин болуп, 200 дин артуқ адәм қатнашти.

Йиғинда сөз қилған атақлиқ кишилик һоқуқ паалийәтчиси рабийә қадир ханим, америка һөкүмити вә бир қисим тәшкилатларниң уйғур вә тибәт қатарлиқ тәқдирдаш хәлқләрниң инсан һәқлиригә көңүл бөлуватқанлиқиға рәһмитини билдүрди.

Сәйшәнбә күни йәнә рабийә қадир ханим америка аял адвокатлар җәмийитиниң йиғиниға тәклип билән қатнашти, йиғин әһли униң инсан һәқлири, җүмлидин уйғур аяллириниң һоқуқлирини қолға кәлтүрүш йолида елип барған тиришчанлиқлириға юқири баһа бәрди.

Кандадики паалийәтләр

Өткән җүмә күни канада парламентида тунҗи қетим уйғурларниң нөвәттики вәзийити һәққидә муһакимә йиғини өткүзүлгән болуп, буниңға канада парламент азалири, алимлар вә 19 дөләтниң әлчиханилириниң вәкиллири иштирак қилди. Бу йиғинда хитай һөкүмитиниң уйғурларға қаратқан сиясийити, уйғур дияридики түрлүк мәсилиләр музакирә қилинди. Йәкшәнбә 15-май күни болса торонто университетидә уйғур мәсилиси бойичә илмий муһакимә йиғини өткүзүлди, йиғинда бир қисим алимлар вә дуня уйғур қурултийиниң рәиси әркин алип текин сөз қилди.

Өткән һәптидә йәнә әркин алиптекин рабийә қадир ханим билән көрүшүш үчүн америкиға йетип келип, униң билән көрүшүп, уйғурларниң инсан һәқлирини қоғдаш вә башқа мәсилиләр бойичә пикир алмаштурди һәмдә рабийә қадирни күтүвелиш мурасимиға қатнашти.

Өзбекистан вәқәлири

Өткән җүмә күни өзбекистанниң әндиҗан шәһиридә аммиви наразилиқ намайишлири йүз берип, намайишчи амма һөкүмәт әскәрлириниң оқ чиқиришиға дуч кәлди. Ениқсиз мәлуматларға қариғанда, әндиҗан вә униң әтрапидики вәқәләрдә 700 дин артуқ адәмниң өлгәнлики билдүрүлмәктә. Бирақ өзбекистан һөкүмити буни рәт қилмақта.

Өзбекистан һөкүмитиниң намайишчи аммиға қорал ишлитиши хәлқара җәмийәтниң қаттиқ наразилиқини қозғиған болуп, америка вә әнгилийә ташқи ишлар министирликлири кәримопни тәнқид қилди һәмдә уни демократик ислаһат елип беришқа чақирди.

Бирләшкән дөләтләр тәшкилати әндиҗанға тәкшүрүш хадимлирини әвәтип, вәқәни ениқлаш керәкликини изчил тәкитлимәктә.

Әндиҗан вәқәси мунасивити билән америка хәлсинки комитети өзбекистан һәққидә мәхсус гувалиқ бериш йиғини өткүзгән . Бу йиғинда америка қошма шитатлири явропа бихәтәрлики вә һәмкарлиқи комитетиниң рәиси киристопәр смит өзбекистандики вәзийәт һәққидә тохтилип,ислам кәримопниң америка билән һәмкарлишиш келишими түзүп, терроризимға ортақ қарши турушқа пүтүшкәнликини, лекин у җайдики вәзийәттә һазир өзгириш болуватқанлиқини көрсәтти.

У кәримопниң ғәрбниң өзбек җәмийитидә ислаһат елип бериш тәклипигә маслишиш үчүн пәқәт бир қанчила мустәқил инсан һоқуқини қоғдаш гуруппилиринила тизимлиғанлиқи һәмдә бирләшкән дөләтләр тәшкилатиниң тән җазаси бериш әһвалини ениқлаш оргининиң өзбекистанға берип, сақчиларниң өзлири халиғанчә қолға елиш вә түрмигә ташлаш әһвалини тәкшүришигә рухсәт қилғанлиқини көрсәтти.

Америка хитайни пулға болған контроллуқ мәсилисидә агаһландурди

Буш һөкүмити хитайни хәлқ пулини мәқсәтлик контроллуқ қиливелиши билән йәнә бир қетим әйиблиди, америка малийә министирлики өткән сәйшәнбә күни хитайға бесим ишлитип, хитайниң әгәр хәлқ пули сияситини өзгәртмисә, хитайниң иқтисадий җазаға тартилидиғанлиқини агаһландурди. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт