Һәптилик хәвәрләр (18-24- май)


2005-06-24
Share

Рабийә қадир лондонда

Атақлиқ кишилик һоқуқ паалийәтчиси, уйғурларниң мәниви аниси рабийә қадир ханим әнгилийидики кишилик һоқуқ тәшкилатлири билән уйғур мәсилиси һәққидә сөһбәт өткүзүш үчүн ,хәлқара кәчүрүм тәшкилатиниң тәклипи билән 21-июн күни лондон шәһиригә йетип келип, у җайдики уйғур җамаити, кишилик һоқуқ паалийәтчилириниң қизғин қарши елишиға еришти. Рабийә қадир шу күнидин буян уйғурлар үчүн наһайити муһим әһмийәтлик паалийәтләрни елип барди.

Униң бир қатар паалийәтлири ичидә алаһидә әһмийәтлик ишларниң бири шуки, 23-июн күни хәлқара кәчүрүм тәшкилатиниң баш катиплиқи, хәлқара кәчүрүм тәшкилати шәрқий асия-хитай бөлүми қатарлиқ орунларниң күтүвелиши болуп, рабийә ханим бу орунларниң башлиқлири вә хадимлири билән көрүшүп, уйғур мәсилиси һәққидә тохталған шуниңдәк у йәнә хәлқарадики атақлиқ мәтбуатлардин һесаплинидиған б б ч агентлиқиниң мухбириниң зияритини қобул қилған. .

Лондонда уйғур нахша-музикилири яңриди

Өткән һәптиниң 21-22-күнлири хәлқара панаһланғучилар күни мунасивити билән әнгилийиниң пайтәхти лондонниң шәһәр мәркизидә һәр қайси милләтләрниң хатириләш паалийити болуп өтти . Әнгилийә уйғур җәмийитиниң тәшкиллиши билән уйғурчә нахша-музика номурлири көрситилди вә рәсимләр көргәзмә қилинди.

Уйғур рәссами хәлқара көргәзмә паалийитидә алтун мукапат алди

Қазақистанлиқ уйғур рәссами абдукерим әйса йеқинда франсийиниң кант шәһиридә өткүзүлгән америка, русийә, франсийә, әнглийә қатарлиқ 32 дөләттин кәлгән 200 гә йеқин атақлиқ рәссамниң әсәрлириниң мәхсус көргәзмисигә қатнашқан . Оттура асия җумһурийәтлиридин қазақистанға вакалитән бу паалийәткә иштирак қилған абдукерим әйсаниң" ақ күмүш рәңдики йолваслар қара рәң ичидә" намлиқ рәсими баһалашқа қоюлуп, алтун мукапатқа сазавәр болған.

Америка хитайниң пиланлиқ туғут сияситини тәнқид қилмақта

Америка һөкүмити б д т нопус идарисидин хитай һөкүмити пиланлиқ туғутта ишлитиватқан мәҗбурлаш вә мәҗбури бала қирдуруш һәмдә пуқраларни бир пәрзәнтлик болушқа қистап җазалаш сияситини өзгәртмигичә, хитайда елип бериливатқан аилә пилани программисини тоңлитишни тәләп қилған.

Әмма, б д т америкиниң бу тәлипини асассиз дәп қарап, уни рәт қилмақта. Һазир америка сиясәт саһәсидә хитайниң пиланлиқ туғут сияситигә болған тәнқидләр күнсайин ашмақта. Техи йеқиндила америка дөләт мәҗлисидә хитайниң пиланлиқ туғут сиясити мәсилисидә испат бериш йиғини ечилған болуп, атақлиқ кишилик һоқуқ паалийәтчиси рабийә қадир ханим хитайниң уйғурларға қаратқан пиланлиқ туғут сияситини әйиблигән иди.

Б д т өзбекистан мусапирлирини қоғдашни тәләп қилди

Чаршәнбә күни б д т баш катипи кофи аннан қирғизистан һөкүмитидин өзбекистандин қечип қирғизистанға келип панаһлиниватқан өзбек мусапирлирини қоғдап, уларни өзбекистанға қайтуруп бәрмәсликини тәләп қилди һәмдә өзбекистан һөкүмитиниму мусапирлар мәсилисидә қирғизистанға бесим ишләтмәсликкә чақирди.

Хитай қазақ сақчилирини тәрбийиләйду

Русийә итартасс агентлиқиниң мәлуматидин қариғанда, қазақистан ички ишлар министири хитай җамаәт хәвпсизлики министирлики билән терроризм, диний әсәбийлик вә бөлгүнчиликкә қарши турушта шундақла зәһәрлик чекимлик әскәсчиликигә қарши күрәштә икки дөләт һәмкарлиқини ашуруш һәққидә сөһбәт өткүзгән. Хәвәрдин қариғанда хитай қазақистанниң ички ишлар қисимлирини тәрбийиләп беришкә қошулған. Демәк буниңдин кейин қазақ сақчилири хитайда тәрбийә алидикән.

Афғанистанда 64 нәпәр талибан җәңчиси өлтүрүлгән

Өткән чаршәнбә күни афғанистанниң җәнубидики районда америка вә афғанистан қисимлири бирликтә һәрбий һәрикәт елип берип, 64 нәпәр талибан җәңчисини өлтүргән.

Хитай, сиясий панаһлиқ тилигән әмәлдарни әйиблиди

Хитайниң тйәнҗин шәһиридин қечип чиқип австралийидә сиясий панаһлиқ тилигән хитай җамаәт хәвпсизлик министирликиниң юқири дәриҗилик әмәлдари хав феңҗүн, хитайниң 1999-йили 6-айниң 10-күни фалүңгоң әзалирини бастуруш үчүн қурған "610- номурлуқ ишханиси"ниң пүтүн мәхпийәтликини ашкарилиған. Бу сәвәбтин хитай һөкүмитини уни "партийигә қарши чиққан әксил инқилабчи" дәп атиған . Буниңдин илгири йәнә бир нәпәр хитай дипломати чәтәлләрдики хитай җасуслири һәққидә мәхпийәтликни паш қилидиғанлиқини билдүргән иди. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт