Heptilik xewerler (18-24- may)

Rabiye qadir londonda

Ataqliq kishilik hoquq pa'aliyetchisi, Uyghurlarning meniwi anisi rabiye qadir xanim en'giliyidiki kishilik hoquq teshkilatliri bilen Uyghur mesilisi heqqide söhbet ötküzüsh üchün ,xelqara kechürüm teshkilatining teklipi bilen 21-iyun küni london shehirige yétip kélip, u jaydiki Uyghur jama'iti, kishilik hoquq pa'aliyetchilirining qizghin qarshi élishigha érishti. Rabiye qadir shu künidin buyan Uyghurlar üchün nahayiti muhim ehmiyetlik pa'aliyetlerni élip bardi.

Uning bir qatar pa'aliyetliri ichide alahide ehmiyetlik ishlarning biri shuki, 23-iyun küni xelqara kechürüm teshkilatining bash katipliqi, xelqara kechürüm teshkilati sherqiy asiya-xitay bölümi qatarliq orunlarning kütüwélishi bolup, rabiye xanim bu orunlarning bashliqliri we xadimliri bilen körüshüp, Uyghur mesilisi heqqide toxtalghan shuningdek u yene xelqaradiki ataqliq metbu'atlardin hésaplinidighan b b ch agéntliqining muxbirining ziyaritini qobul qilghan. .

Londonda Uyghur naxsha-muzikiliri yangridi

Ötken heptining 21-22-künliri xelqara panahlan'ghuchilar küni munasiwiti bilen en'giliyining paytexti londonning sheher merkizide her qaysi milletlerning xatirilesh pa'aliyiti bolup ötti . En'giliye Uyghur jemiyitining teshkillishi bilen Uyghurche naxsha-muzika nomurliri körsitildi we resimler körgezme qilindi.

Uyghur ressami xelqara körgezme pa'aliyitide altun mukapat aldi

Qazaqistanliq Uyghur ressami abdukérim eysa yéqinda fransiyining kant shehiride ötküzülgen amérika, rusiye, fransiye, en'gliye qatarliq 32 dölettin kelgen 200 ge yéqin ataqliq ressamning eserlirining mexsus körgezmisige qatnashqan . Ottura asiya jumhuriyetliridin qazaqistan'gha wakaliten bu pa'aliyetke ishtirak qilghan abdukérim eysaning" aq kümüsh rengdiki yolwaslar qara reng ichide" namliq resimi bahalashqa qoyulup, altun mukapatqa sazawer bolghan.

Amérika xitayning pilanliq tughut siyasitini tenqid qilmaqta

Amérika hökümiti b d t nopus idarisidin xitay hökümiti pilanliq tughutta ishlitiwatqan mejburlash we mejburi bala qirdurush hemde puqralarni bir perzentlik bolushqa qistap jazalash siyasitini özgertmigiche, xitayda élip bériliwatqan a'ile pilani programmisini tonglitishni telep qilghan.

Emma, b d t amérikining bu telipini asassiz dep qarap, uni ret qilmaqta. Hazir amérika siyaset saheside xitayning pilanliq tughut siyasitige bolghan tenqidler künsayin ashmaqta. Téxi yéqindila amérika dölet mejliside xitayning pilanliq tughut siyasiti mesiliside ispat bérish yighini échilghan bolup, ataqliq kishilik hoquq pa'aliyetchisi rabiye qadir xanim xitayning Uyghurlargha qaratqan pilanliq tughut siyasitini eyibligen idi.

B d t özbékistan musapirlirini qoghdashni telep qildi

Charshenbe küni b d t bash katipi kofi annan qirghizistan hökümitidin özbékistandin qéchip qirghizistan'gha kélip panahliniwatqan özbék musapirlirini qoghdap, ularni özbékistan'gha qayturup bermeslikini telep qildi hemde özbékistan hökümitinimu musapirlar mesiliside qirghizistan'gha bésim ishletmeslikke chaqirdi.

Xitay qazaq saqchilirini terbiyileydu

Rusiye itartass agéntliqining melumatidin qarighanda, qazaqistan ichki ishlar ministiri xitay jama'et xewpsizliki ministirliki bilen térrorizm, diniy esebiylik we bölgünchilikke qarshi turushta shundaqla zeherlik chékimlik eskeschilikige qarshi küreshte ikki dölet hemkarliqini ashurush heqqide söhbet ötküzgen. Xewerdin qarighanda xitay qazaqistanning ichki ishlar qisimlirini terbiyilep bérishke qoshulghan. Démek buningdin kéyin qazaq saqchiliri xitayda terbiye alidiken.

Afghanistanda 64 neper taliban jengchisi öltürülgen

Ötken charshenbe küni afghanistanning jenubidiki rayonda amérika we afghanistan qisimliri birlikte herbiy heriket élip bérip, 64 neper taliban jengchisini öltürgen.

Xitay, siyasiy panahliq tiligen emeldarni eyiblidi

Xitayning tyenjin shehiridin qéchip chiqip awstraliyide siyasiy panahliq tiligen xitay jama'et xewpsizlik ministirlikining yuqiri derijilik emeldari xaw féngjün, xitayning 1999-yili 6-ayning 10-küni falünggong ezalirini basturush üchün qurghan "610- nomurluq ishxanisi"ning pütün mexpiyetlikini ashkarilighan. Bu sewebtin xitay hökümitini uni "partiyige qarshi chiqqan eksil inqilabchi" dep atighan . Buningdin ilgiri yene bir neper xitay diplomati chet'ellerdiki xitay jasusliri heqqide mexpiyetlikni pash qilidighanliqini bildürgen idi. (Ümidwar)