Heptilik xewerler (27 – yanwar – 2 – féwral)


2007.02.02
Share on WhatsApp
Share on WhatsApp

Rabiye qadir 2007 – yilliq nobél tinchliq mukapatining namziti boldi

Uyghur milliy herikitining rehbiri, dunya Uyghur qurultiyining re'isi rabiye qadir xanim 2007-yilliq nobél tinchliq mukapatining namzatliqigha körsitildi. Rabiye qadir xanim, amérikining sabiq mu'awin prézidénti al gore we finlandiyining sabiq prézidénti axsary qatarliq üch kishi bilen birge bu mukapatqa körsitilgen bolup, ularning 2007-yilliq namzatlar ichidiki eng küchlük namzatlardin ikenliki bildürülmekte. Rabiye xanim ötken yilimu nobél tinchliq namzatliqigha körsitilgen idi.

Rabiye qadir xanimgha türkiyide insan heqliri mukapati bérildi

Türkiye insan heqliri we mezlumlar hemkarliq jemiyiti 27 – yanwar küni türkiyining istanbul shehiride insan heqliri kéchiliki ötküzüp, rabiye qadirgha "insan heqliri mukapati" bergenlikini élan qildi. Bu mukapatni türkiyidiki sherqiy türkistan medeniyet hemkarliq teshkilatining mes'uli xeyrullah efendigil ependi istanbulgha bérip, rabiye qadir xanimgha wakaliten tapshurup aldi.

Bu rabiye qadir xanimning norwigiyidiki rafto mukapatidin kéyin alghan ikkinchi qétimliq xelq'araliq mukapat bolup hésablinidiken. Xewerlerge qarighanda, yene gollandiye xelq'ara kechürüm teshkilati teripidin neshir qilinidighan ayliq zhurnalning bu yilliq tunji sanida gollandiyide 2007-yili tarqitilidighan milliy pochta latariyisi tonushturulghan bolup, rabiye qadir xanim milli pochta latariyisining enenisige asasen, bu yilliq latariyining "amet simwoli" qilip tallan'ghan.

Hüseyin jélilning ayali amérika mesul da'iriliri bilen uchrashti

Özbékistan hökümiti teripidin xitaygha tutup bérilgen kanada puqrasi hüseyin jélilning ayali kamile xanim amérika xelq'ara diniy erkinlik komitétining alahide teklipi bilen amérikigha kélip 31‏- yanwar küni amérika dölet mejliside kishilik hoquq we diniy erkinlikning xitaydiki weziyiti hemde amérika hökümitining xitaygha qaratqan siyasiti heqqide ötküzülgen yighin'gha qatniship, Uyghurlarning ehwali heqqide guwahliqtin ötti.

Kamile xanim yene peyshenbe küni amérika tashqi ishlar ministirlikining bir qisim xadimliri we amérika dölet mejlis ezaliri bilen uchriship, yoldishi hüseyin jélil mesilisi heqqide pikir almashturdi. U yene erkin asiya radi'osining ziyaritini qobul, özining pa'aliyetliri heqqide toxtaldi.

Uchurlargha qarighanda, kanada hökümiti izchil türde hüseyin jélilni qutuldurush üchün heriket qilmaqta. Bu mesile kanadaningla emes, belki xelq'ara jemiyetning diqqitini tartqan nuqtigha aylan'ghan.

Wang léchüen Uyghur élide turushluq esker we saqchilarni mukapatlidi

"Tengritagh torining" xewiridin melum bolushiche, Uyghur aptonom rayoni partkom sékritari wang léchüen, aptonom rayon re'isi ismayil tiliwaldi hem mu'awini jappar hebibulla we herbiy rayonning rehberliri xitay azadliq armiyisining Uyghur élide turushluq quruqluq armiye, hawa qisimliri we aptonom rayonluq jama'et xewpsizlik nazariti meshiq bazilirigha bérip, ofitsér- esker hemde saqchilardin hal sorap, ularning wekillirini qobul qilghan shuningdek ularni pul bilen mukapatlighan.

Wang léchüen ilgiridinla öz sözide xitay armiye we saqchi qisimlirining atalmish "üch xil küch"ke zerbe bérip, muqimliqni qoghdashta tayanch küchlük rolini oynap kelgenlikini medhiyiligen idi.

Murat nasiropning xanimi istansimizning téléfon ziyariti qobul qildi

Rusiyining moskwa shehiride yashap ijad qilghan hem meshhur bolup tonulghan naxshichi we kompozitor murat nasiropning tuyuqsiz ölümi heqqide rusiye we musteqil döletler hem dostluqi elliride dawamliq türlük köz qarashlar élan qilinip turmaqta. Murat nasiropning ayali nataliye xanim murat nasiropning "özini öltürüwalghanliqigha" a'it tarqalghan uchurlarni ret qildi. U murat nasiropning hayatliqni, öz a'ilisini we öz millitini söygen wetenperwer ikenlikini, uning köpligen pilanliri barliqini tekitlep, uni "zeherlik chékimlik sewebidin özini öltüriwaldi" déyishning toghra emeslikini körsetti.

Dunya Uyghur qurultiyi axbarat yighini ötküzdi

2007 – Yili 31 – yanwar küni dunya Uyghur qurultiyi we gérmaniyidiki bawariye yéshillar partiyisining orunlashturushi bilen, dunya Uyghur qurultiyining gérmaniyidiki bash shitabida dunya Uyghur qurultiyi merkizi orgini, yawropa sherqiy türkistan birliki teshkilati we sherqiy türkistan informatsiye merkizi qatarliq orunlarning sahipxanliqida "5 – féwral ghulja weqesi" ning 10 yilliqini xatirilesh yüzisidin axbarat élan qilish yighini ötküzüldi.

Dunya Uyghur qurultiyi yene 5- féwral ghulja weqesining 10 yilliqini xatirilesh yüzisidin dunyaning her qaysi jayliridiki Uyghur teshkilatlirini xitay konsulxaniliri aldida namayish ötküzüshke hemde xatirilesh pa'aliyetliri élip bérishqa chaqirghan.

Chégrisiz muxbirlar teshkilati xitayning axbarat erkinlikini basturush qilmishini qattiq eyiblidi

Chégrisiz muxbirlar teshkilati peyshenbe küni, xitay hökümitining axbarat erkinlikini basturush qilmishliri, bolupmu muxbirlarni qamap qoyush shuningdek intérnét tor betlirige qaratqan kontrolluqlirini qattiq eyiblidi. Buningdin ilgiri chégrisiz muxbirlar teshkilati xitayni ziyaret qilip, türmidiki 80 nechche xitay muxbirini qoyup bérishni telep qilghan bolsimu, emma ret qilinishqa uchrighan.

Enqerede musteqilliqning 15 yilida türk jumhuriyetliri namliq yighin chaqirildi

Türkiye ottura asiya türkiy jumhuriyetliri sowét ittipaqidin ayrilip, musteqilliq élan qilghandin kéyin tunji qétim bu döletlerning musteqilliqini etirap qilghan idi. Mana buninggha hazir 15 yil bolup qaldi. Türkiyining paytexti enqerede "musteqilliqning 15 - yilida türkiy jumhuriyetliri" dégen témida yighini chaqirildi. Yighin'gha sabiq tashqi ishlar mu'awin ministiri, jumhuriyet partiyisi mu'awin bashliqi onur öymen qatarliqlar qatnashti we söz qildi. Enqerediki ixtiyari muxbirimizning uchur bérishiche, bu yighinda musteqil türkiy jumhuriyetliridin bashqa Uyghur mesilisimu nuqtiliq halda tilgha élindi. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.