Һәптилик хәвәрләр ( 9 - июндин 15 - июнғичә)


2007-06-15
Share

Хамас ғәззә районини контрол қилди

Җүмә күни пәләстиндики хамас тәшкилатиниң қораллиқ гуруппилири фатах тәшкилатиниң үстидин ғалип келип, ғәззә районини пүтүнләй контрол қилди. Нәтиҗидә, икки партийә күришидә хамас өзини ғәлибә қазанғучи дәп елан қилди. Пәләстин һөкүмитиниң рәиси махмуд аббас фатах вә хамастин тәшкилләнгән бирләшмә һөкүмәтни бикар қилди.

Нөвәттә, пәләстиндики ички вәзийәт мурәккәпләшмәктә. Бу вәқәләрниң тәрәққиятиға америка, исраилийә вә башқа явропа мәмликәтлири йеқиндин диққәт қилмақта.

Америка коммунистик түзүм қурбанлириға хатирә абидиси тиклиди

12- Июн күни америка пайтәхти вашингтонда, коммунизимниң зиянкәшликигә учриғанларни әсләш үчүн хатирә абидиси тикләнди. Абидиниң йопуқини ечиш мурасимиға америка президенти җорҗ буш қатнишип, коммунизимниң зиянкәшликигә учрап , һаятидин айрилған милйонлиған бигунаһ кишиләргә матәм билдүрди .

Америка президенти җорҗ буш коммунизимниң зиянкәшликигә учриған кишиләрни хатириләш абидисини тикләш мурасимида қилған сөзидә "бүгүн вашингтонда тикләнгән бу абидә кишиләрниң ғурур -иптихарини, әс -хатирисини әслигә кәлтүрүш, зиянкәшликкә учриған кишиләрни әстин чиқармаслиқ ролини ойнайду", "коммунизм вә террорчилар чоқум мәғлуп болиду " деди. У, пүтүн дуняда коммунизимниң зиянкәшликигә учриған кишиләрниң 100 милйон әтрапида икәнликини билдүргән. Мәзкур хатирә һәйкили 1989-йилидики тйәнәнмен оқуғучилири лайиһилигән" аял әркинлик илаһ"иниң нусхисидур.

Америкида мәзкур абидә тикләнгәндин кейин хитай ташқи ишлар министирлиқиниң баянатчиси чингаң "биз америка тәрәпниң сөз -һәрикәтлиригә қаттиқ наразилиқ билдүримиз вә қарши туримиз" дейиш арқилиқ президент бушниң сөзигә наразилиқ билдүргән. Шу күнләрдә йәнә америка хитайни адәм әткәсчилик содиси еғир дөләтләр тизимликигә киргүзди . Адәм әткәсчилик содисиниң зиянкәшликкә учриғучилар көпинчә аяллар вә балиларни асас қилған болуп, бәзи көзәткүчиләр ахирқи йилларда хитайдики адәм әткәсчилириниң диққәт нәзириниң уйғур балилири вә аяллириға чүшкәнликини билдүрүшмәктә .

Б д т бала ишләмчи ишлитишни тәлтөкүс йоқ қилишқа чақириқ қилди

6 ‏- Айниң 12 ‏- күни, бирләшкән дөләтләр тәшкилатиниң әмгәкчиләр оргини билән хәлқара әмгәкчиләр тәшкилати бирликтә, пүтүн дуняда бала ишләмчи ишлитишни 2016 ‏- йилидин бурун тәлтөкүс йоқ қилиш һәққидә чақириқ қилди.

Хәлқара әмгәкчиләр тәшкилатиниң мәлум қилишичә, дуняда һазир 5 яштин 14 яшқичә болған 126 милйон бала ишләмчи йеза -қишлақларда, завутларда чоңлар билән охшаш әмгәкләргә селинип експилататсийә қилинмақта. Хитай, бала ишчилар көп ишлитилидиған мәмликәтләрниң биридур.

Йеқинда , хитайниң шәнши өлкисиниң җиңчиң вә йүнчиң районлиридики бир қара хумданлиқтин 217 нәпәр қул ишчи қутулдурулған болуп, буларниң ичидә 29 нәпәр бала ишчи бар икән. Униң үстигә буларниң ичидә аз дегәндә бир нәпәр уйғур балиниң барлиқи һәққидә хәвәр тарқитилди.

Түмән дәрясиниң сүйи еғир дәриҗидә булғанған

Қәшқәр шәһәр ичидин еқип өтидиған түмән дәряси , тарихтин бери қәшқәрниң бостанлиқлирини суғуруп, шәһәр муһитиға гүзәллик ата қилип кәлгән, шәһәр аһалисиниң уссузлуқини қандуруп, етиз-ериқларни, бағ -варанларни суғуруп , қәшқәргә гүзәллик вә хушаллиқ беғишлап кәлгән иди.

Учурлардин қариғанда, қәшқәр түмән дәрясиниң сүйи йеқинқи он нәччә йилдин буян еғир дәриҗидә булғанған болуп, униңға әтраптики завут карханилар, мәктәпләр вә башқа орунларниң һәр хил мәйнәтчиликлири төкүлгән.

Түмән сүйиниң булғиниш әһвали бурунла оттуриға қоюлған болсиму, лекин униң алдини елиш вә контрол қилиш тәдбирлири йетәрлик дәриҗидә елинмиған. Әслидики шунчә чоң дәря бүгүнки күндә кичикләп бир өстәң һалитигә келип қалған .

Ички моңғулда сақчилар билән пуқралар арисида тоқунуш йүз бәрди

Ички моңғулниң көкхот шәһиридә 8-июн күни бәш миңдин артуқ пуқра 500 йүздин артуқ сақчи билән тоқунушуп қалған болуп, нәтиҗидә, аз дегәндә 20 адәм яриланған, 3 адәм қолға елинған.

Хоңкоңдики кишилик һоқуқ вә демократийә учур мәркизиниң пәйшәнбә күни билдүрүшичә , бу вәқә һөкүмәтниң аһалиләрниң йәрлирини әрзан баһада тартивелиши сәвәбидин мәйданға кәлгән. Чүнки, көкхотта бир квадрат метир йәрниң баһаси 3500 йүән болған әһвал астида, һөкүмәт аран 1300 йүән бериш арқилиқ аһалиларниң өй-җайлирини алмақчи болған. Хәлқ буниңға қошулмиған.

"Әсир шәрқий түркистан үчүн" намлиқ китабиниң давами нәшир қилинди

Шәрқий түркистан давасиниң байрақдари, мәрһум әйса йүсүп алиптекин әпәндиниң "әсир шәрқий түркистан үчүн" намлиқ китаби 80-йилларда нәшир қилинған болса, мана әмди бу китабниң 2 - томи болған "әйса йүсүп алип текинниң инқилаб әслимилири" йеқинда нәшир қилинди.

Китабқа әйса әпәндиниң 1949-йилидин кейинки сиясий дәва паалийәтлири, хәлқара вә түркийә характерлиқ йиғинларда сөзлигән нутуқлири һәм һөҗҗәт вә хәт-чәклири қатарлиқ қиммәтлик материяллар киргүзүлгән.

Бу китаб шәрқий түркистан сиясий дәва тарихини тәтқиқ қилишта муһим пайдилиниш қиммитигә игидур. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт