Heptilik xewerler ( 9 - iyundin 15 - iyun'ghiche)


2007-06-15
Share

Xamas ghezze rayonini kontrol qildi

Jüme küni pelestindiki xamas teshkilatining qoralliq guruppiliri fatax teshkilatining üstidin ghalip kélip, ghezze rayonini pütünley kontrol qildi. Netijide, ikki partiye kürishide xamas özini ghelibe qazan'ghuchi dep élan qildi. Pelestin hökümitining re'isi maxmud abbas fatax we xamastin teshkillen'gen birleshme hökümetni bikar qildi.

Nöwette, pelestindiki ichki weziyet murekkepleshmekte. Bu weqelerning tereqqiyatigha amérika, isra'iliye we bashqa yawropa memliketliri yéqindin diqqet qilmaqta.

Amérika kommunistik tüzüm qurbanlirigha xatire abidisi tiklidi

12- Iyun küni amérika paytexti washin'gtonda, kommunizimning ziyankeshlikige uchrighanlarni eslesh üchün xatire abidisi tiklendi. Abidining yopuqini échish murasimigha amérika prézidénti jorj bush qatniship, kommunizimning ziyankeshlikige uchrap , hayatidin ayrilghan milyonlighan bigunah kishilerge matem bildürdi .

Amérika prézidénti jorj bush kommunizimning ziyankeshlikige uchrighan kishilerni xatirilesh abidisini tiklesh murasimida qilghan sözide "bügün washin'gtonda tiklen'gen bu abide kishilerning ghurur -iptixarini, es -xatirisini eslige keltürüsh, ziyankeshlikke uchrighan kishilerni estin chiqarmasliq rolini oynaydu", "kommunizm we térrorchilar choqum meghlup bolidu " dédi. U, pütün dunyada kommunizimning ziyankeshlikige uchrighan kishilerning 100 milyon etrapida ikenlikini bildürgen. Mezkur xatire heykili 1989-yilidiki tyen'enmén oqughuchiliri layihiligen" ayal erkinlik ilah"ining nusxisidur.

Amérikida mezkur abide tiklen'gendin kéyin xitay tashqi ishlar ministirliqining bayanatchisi chin'gang "biz amérika terepning söz -heriketlirige qattiq naraziliq bildürimiz we qarshi turimiz" déyish arqiliq prézidént bushning sözige naraziliq bildürgen. Shu künlerde yene amérika xitayni adem etkeschilik sodisi éghir döletler tizimlikige kirgüzdi . Adem etkeschilik sodisining ziyankeshlikke uchrighuchilar köpinche ayallar we balilarni asas qilghan bolup, bezi közetküchiler axirqi yillarda xitaydiki adem etkeschilirining diqqet nezirining Uyghur baliliri we ayallirigha chüshkenlikini bildürüshmekte .

B d t bala ishlemchi ishlitishni teltöküs yoq qilishqa chaqiriq qildi

6 ‏- Ayning 12 ‏- küni, birleshken döletler teshkilatining emgekchiler orgini bilen xelq'ara emgekchiler teshkilati birlikte, pütün dunyada bala ishlemchi ishlitishni 2016 ‏- yilidin burun teltöküs yoq qilish heqqide chaqiriq qildi.

Xelq'ara emgekchiler teshkilatining melum qilishiche, dunyada hazir 5 yashtin 14 yashqiche bolghan 126 milyon bala ishlemchi yéza -qishlaqlarda, zawutlarda chonglar bilen oxshash emgeklerge sélinip ékspilatatsiye qilinmaqta. Xitay, bala ishchilar köp ishlitilidighan memliketlerning biridur.

Yéqinda , xitayning shenshi ölkisining jingching we yünching rayonliridiki bir qara xumdanliqtin 217 neper qul ishchi qutuldurulghan bolup, bularning ichide 29 neper bala ishchi bar iken. Uning üstige bularning ichide az dégende bir neper Uyghur balining barliqi heqqide xewer tarqitildi.

Tümen deryasining süyi éghir derijide bulghan'ghan

Qeshqer sheher ichidin éqip ötidighan tümen deryasi , tarixtin béri qeshqerning bostanliqlirini sughurup, sheher muhitigha güzellik ata qilip kelgen, sheher ahalisining ussuzluqini qandurup, étiz-ériqlarni, bagh -waranlarni sughurup , qeshqerge güzellik we xushalliq béghishlap kelgen idi.

Uchurlardin qarighanda, qeshqer tümen deryasining süyi yéqinqi on nechche yildin buyan éghir derijide bulghan'ghan bolup, uninggha etraptiki zawut karxanilar, mektepler we bashqa orunlarning her xil meynetchilikliri tökülgen.

Tümen süyining bulghinish ehwali burunla otturigha qoyulghan bolsimu, lékin uning aldini élish we kontrol qilish tedbirliri yéterlik derijide élinmighan. Eslidiki shunche chong derya bügünki künde kichiklep bir östeng halitige kélip qalghan .

Ichki mongghulda saqchilar bilen puqralar arisida toqunush yüz berdi

Ichki mongghulning kökxot shehiride 8-iyun küni besh mingdin artuq puqra 500 yüzdin artuq saqchi bilen toqunushup qalghan bolup, netijide, az dégende 20 adem yarilan'ghan, 3 adem qolgha élin'ghan.

Xongkongdiki kishilik hoquq we démokratiye uchur merkizining peyshenbe küni bildürüshiche , bu weqe hökümetning ahalilerning yerlirini erzan bahada tartiwélishi sewebidin meydan'gha kelgen. Chünki, kökxotta bir kwadrat métir yerning bahasi 3500 yüen bolghan ehwal astida, hökümet aran 1300 yüen bérish arqiliq ahalilarning öy-jaylirini almaqchi bolghan. Xelq buninggha qoshulmighan.

"Esir sherqiy türkistan üchün" namliq kitabining dawami neshir qilindi

Sherqiy türkistan dawasining bayraqdari, merhum eysa yüsüp aliptékin ependining "esir sherqiy türkistan üchün" namliq kitabi 80-yillarda neshir qilin'ghan bolsa, mana emdi bu kitabning 2 - tomi bolghan "eysa yüsüp alip tékinning inqilab eslimiliri" yéqinda neshir qilindi.

Kitabqa eysa ependining 1949-yilidin kéyinki siyasiy dewa pa'aliyetliri, xelq'ara we türkiye xaraktérliq yighinlarda sözligen nutuqliri hem höjjet we xet-chekliri qatarliq qimmetlik matériyallar kirgüzülgen.

Bu kitab sherqiy türkistan siyasiy dewa tarixini tetqiq qilishta muhim paydilinish qimmitige igidur. (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet