Һәптилик хәвәрләр ( 30 - июндин - 6 - июлғичә )


2007-07-06
Share

Рабийә қадир ханим ақ сарайда зиярәттә болди

Дуня уйғур қурултийиниң билдүрүшичә, 3-июл күни дуня уйғур қурултийиниң рәиси рабийә қадир ханим ақ сарайда президент бушниң рәпиқиси лора буш ханимниң ишхана мудири анита мекбрайт билән көрүшүп, уйғурларниң нөвәттики әһвали , хитай һөкүмитиниң уйғурларға қаратқан сиясити һәққидә мәлумат бәрди. Сөһбәт җәрянида лора буш ханим ишханиға кирип, рабийә қадир ханим билән алаһидә көрүшти.

Дуня уйғур қурултийи мәсуллириниң ашкарилишичә, рабийә қадир ханим ақ сарайдики сөһбәттә, хитай һөкүмитиниң ешинча әмгәк күчлирини йөткәш сиясити рамкиси ичидә, уйғур қизлирини ичкири өлкиләргә елип бериш сиясити, уйғур сиясий мәһбуслар мәсилиси һәм уларниң җисманий зиянкәшликкә учраш әһвали, болупму, хитай даирилириниң уйғурларниң паспортлирини йиғивелиши қатарлиқ уйғурлар нөвәттә дуч келиватқан муһим мәсилиләрни оттуриға қойған.

Бу рабийә қадир ханимниң 6-июн күни чех җумһурийитиниң пайтәхти прагада президент буш вә лора буш ханим билән учрашқандин кейин, иккинчи қетим лора буш ханимни көрүши болуп һесаблинидикән.

Америкидики уйғурлар сәйлә паалийити өткүзди

4-Июл күни америкиниң мустәқиллиқ байрими күни мунасивити билән америкиниң һәр қайси иштатлиридин вә канада қатарлиқ әлләрдин кәлгән уйғурлар, пайтәхт вашингтон йенидики вирҗинийә иштатидики лейик акутник сәйлигаһиға йиғилип, америкиниң мустәқиллиқ байримини һәмдә уйғурларниң мәниви аниси рабийә қадир ханим башчилиқидики уйғур тәшкилатлириниң қисқиғина вақит ичидә қолға кәлтүргән нәтиҗилирини қутлуқлиди.

Сәйлә паалийитидә д у қ рәиси рабийә қадир вә америка уйғурлири җәмийитиниң әзалиридин турди ғоҗа қатарлиқлар нутуқ сөзләп, байрамни тәбриклиди һәмдә уйғурларни иттипақлишип күрәш қилип, дәва паалийәтлирини қоллашқа шуниңдәк өз миллий кимликини сақлашқа чақирди.

Хитай пичанда хам нефит амбири ясимақчи

Хитай һөкүмити уйғур елиниң пичан наһийисидә хитай бойичә әң чоң нефит сақлаш амбири ясимақчи, мәркизи агентлиқиниң учурлириға асасланғанда, мәзкур нефит записини сақлайдиған амбар үчүн 6 милярд 500 милйон йүән мәбләғ селинған болуп, униң игилигән йәр көлими 2600 мо икән.

Бу амбар қурулуши бу йил 6 ‏- айда рәсмий иш башлап келәр йили, йил ахирғичә пүтүп ишқа кириштүрүлидикән.

Хитайниң һәрбий тәрәққиятиға австралийиму диққәт қилмақта

Хитай һәрбий тәрәққиятиниң сүрити хитайниң хошинилирини әндишигә селипла қалмай, йәнә асия - тинч окян районидики японийә, австралийә қатарлиқ дөләтләрниму җиддийләштүрүп қоймақта. Ахирқи күнләрдә хитай һәрбий тәрәққиятиниң сүритидин биарам болуватқан дөләтләргә қатариға австралийә қошулди.

Австралийә баш министири җон ховард вә австралийини зиярәт қилған америка һәрбий қисимлириниң юқири дәриҗилик бир генерали, хитайниң һәрбий кеңәймичиликигә диққәт қиливатқанлиқини тәкитлигән вә буни асия - тинч окян райониниң бихәтәрликигә пайдисиз , муқимсиз амиллар, дәп қарайдиғанлиқини әскәрткән.

Америкиниң тинч окяндики деңиз армийисиниң " бүркүт бачкиси" бәлгилик авиаматка пилоти бу қетим австралийигә келип, америка - австралийә һәрбий қисимлириниң бирләшмә һәрбий маневирға қатнашқан. Уларниң бирләшмә һәрбий маневири чаршәнбә күни ахирлашқан болуп, икки һәптилик маневирға америка 20 миң кишилик қошун, австралийә 7500 кишилик қошун қатнаштурған.

Хитай һөкүмити қирғизистандики җасуслуқ һәрикитигә қатнашқанлиқини инкар қилди

Йеқинда, қирғизистан бихәтәрлик даирилири зһипарқул ариқова исимлик қирғизистан дөләт мәҗлисидә ишләйдиған бир нәпәр қирғизистан пуқрасини хитайға җасуслуқ қилғанлиқи үчүн қолға алғандин кейин, қирғизистан җамаәтчиликидә зор ғул-ғула қозғилип кәткән.

Ахири бир қанчә һәптә өткәндин кейин хитай дипломатийә даирилири буни инкар қилған. Хитайниң қирғизистандики баш әлчиси бундақ җасуслуқ қилмишини инкар қилған болуп, арқидин қирғизистан бихәтәрлик даирилириму хитайниң мундақ җасуслуқ қилмишиға қатнашмиғанлиқини көрсәткән.

Путин билән буш учрашти

Русийә президенти владимир путин 1-июлдин 2-июлғичә өзиниң америка қошма иштатлириға қаратқан ғәйри рәсми зияритини елип барди. Путин йәкшәнбә күни кәчтә мәйин иштатиниң атлантик окян қирғиқиға җайлашқан кеннебункпорт дәп аталған җайидики президент җорҗ бушниң хусусий туралғу җайиға йетип келип, президент буш вә униң дадиси чоң буш һәм уларниң аилә-тавабатлири билән көрүшти.

Русийә мәтбуатлириниң йезишичә, владимир путин тунҗи қетим җорҗ бушниң кеннебункпорттики өйидә меһман болған чәт әл президенти болуш билән биргә буш аилисиниң униңға бундақ иллиқ вә йеқинчилиқ көрситиши һәммила президентларға несип болмайдиған иш икән. Бу, кремил-ақ сарай мунасивәтлиридә, икки тәрәп мәнпәәтлиригә уйғун чүшәнчиләрниң шәкиллинишидә әһмийәтлик рол ойниши мумкин.

Ақ сарай баянатчиси тонй снов икки рәһбәрниң бу қетимқи учришиши һәққидә тохтилип," бу икки дөләт мунасивәтлириниң муһимлиқини көрситиду шуниңдәк бундақ кәңкушадә сорунда икки тәрәпниң кәңкушадә вә сәмимийлик билән зор мәсилиләр һәққидә музакирә елип баридиғанлиқини чүшәндүриду" дәп тәкитлигән.

Хәвәрләрдин қариғанда, путин билән буш башқурулидиған бомбидин мудапиә көрүш системиси, косова мәсилиси, иран ядро пилани мәсилилири бойичә ашкара сөһбәт баян қилған болуп, путин ракета системиси мәсилисидә явропа дөләтлириниму қатнаштуруштәк йеңи тәклип оттуриға қойған. Иран мәсилисидә болса ортақлиқ һасил қилған.(Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт