Heptilik xewerler ( 30 - iyundin - 6 - iyulghiche )


2007-07-06
Share

Rabiye qadir xanim aq sarayda ziyarette boldi

Dunya Uyghur qurultiyining bildürüshiche, 3-iyul küni dunya Uyghur qurultiyining re'isi rabiye qadir xanim aq sarayda prézidént bushning repiqisi lora bush xanimning ishxana mudiri anita mékbrayt bilen körüshüp, Uyghurlarning nöwettiki ehwali , xitay hökümitining Uyghurlargha qaratqan siyasiti heqqide melumat berdi. Söhbet jeryanida lora bush xanim ishxanigha kirip, rabiye qadir xanim bilen alahide körüshti.

Dunya Uyghur qurultiyi mes'ullirining ashkarilishiche, rabiye qadir xanim aq saraydiki söhbette, xitay hökümitining éshincha emgek küchlirini yötkesh siyasiti ramkisi ichide, Uyghur qizlirini ichkiri ölkilerge élip bérish siyasiti, Uyghur siyasiy mehbuslar mesilisi hem ularning jismaniy ziyankeshlikke uchrash ehwali, bolupmu, xitay da'irilirining Uyghurlarning pasportlirini yighiwélishi qatarliq Uyghurlar nöwette duch kéliwatqan muhim mesililerni otturigha qoyghan.

Bu rabiye qadir xanimning 6-iyun küni chéx jumhuriyitining paytexti pragada prézidént bush we lora bush xanim bilen uchrashqandin kéyin, ikkinchi qétim lora bush xanimni körüshi bolup hésablinidiken.

Amérikidiki Uyghurlar seyle pa'aliyiti ötküzdi

4-Iyul küni amérikining musteqilliq bayrimi küni munasiwiti bilen amérikining her qaysi ishtatliridin we kanada qatarliq ellerdin kelgen Uyghurlar, paytext washin'gton yénidiki wirjiniye ishtatidiki léyik akutnik seyligahigha yighilip, amérikining musteqilliq bayrimini hemde Uyghurlarning meniwi anisi rabiye qadir xanim bashchiliqidiki Uyghur teshkilatlirining qisqighina waqit ichide qolgha keltürgen netijilirini qutluqlidi.

Seyle pa'aliyitide d u q re'isi rabiye qadir we amérika Uyghurliri jemiyitining ezaliridin turdi ghoja qatarliqlar nutuq sözlep, bayramni tebriklidi hemde Uyghurlarni ittipaqliship küresh qilip, dewa pa'aliyetlirini qollashqa shuningdek öz milliy kimlikini saqlashqa chaqirdi.

Xitay pichanda xam néfit ambiri yasimaqchi

Xitay hökümiti Uyghur élining pichan nahiyiside xitay boyiche eng chong néfit saqlash ambiri yasimaqchi, merkizi agéntliqining uchurlirigha asaslan'ghanda, mezkur néfit zapisini saqlaydighan ambar üchün 6 milyard 500 milyon yüen meblegh sélin'ghan bolup, uning igiligen yer kölimi 2600 mo iken.

Bu ambar qurulushi bu yil 6 ‏- ayda resmiy ish bashlap kéler yili, yil axirghiche pütüp ishqa kirishtürülidiken.

Xitayning herbiy tereqqiyatigha awstraliyimu diqqet qilmaqta

Xitay herbiy tereqqiyatining süriti xitayning xoshinilirini endishige sélipla qalmay, yene asiya - tinch okyan rayonidiki yaponiye, awstraliye qatarliq döletlernimu jiddiyleshtürüp qoymaqta. Axirqi künlerde xitay herbiy tereqqiyatining sür'itidin bi'aram boluwatqan döletlerge qatarigha awstraliye qoshuldi.

Awstraliye bash ministiri jon xoward we awstraliyini ziyaret qilghan amérika herbiy qisimlirining yuqiri derijilik bir générali, xitayning herbiy kéngeymichilikige diqqet qiliwatqanliqini tekitligen we buni asiya - tinch okyan rayonining bixeterlikige paydisiz , muqimsiz amillar, dep qaraydighanliqini eskertken.

Amérikining tinch okyandiki déngiz armiyisining " bürküt bachkisi" belgilik awi'amatka piloti bu qétim awstraliyige kélip, amérika - awstraliye herbiy qisimlirining birleshme herbiy manéwirgha qatnashqan. Ularning birleshme herbiy manéwiri charshenbe küni axirlashqan bolup, ikki heptilik manéwirgha amérika 20 ming kishilik qoshun, awstraliye 7500 kishilik qoshun qatnashturghan.

Xitay hökümiti qirghizistandiki jasusluq herikitige qatnashqanliqini inkar qildi

Yéqinda, qirghizistan bixeterlik da'iriliri zhiparqul ariqowa isimlik qirghizistan dölet mejliside ishleydighan bir neper qirghizistan puqrasini xitaygha jasusluq qilghanliqi üchün qolgha alghandin kéyin, qirghizistan jama'etchilikide zor ghul-ghula qozghilip ketken.

Axiri bir qanche hepte ötkendin kéyin xitay diplomatiye da'iriliri buni inkar qilghan. Xitayning qirghizistandiki bash elchisi bundaq jasusluq qilmishini inkar qilghan bolup, arqidin qirghizistan bixeterlik da'irilirimu xitayning mundaq jasusluq qilmishigha qatnashmighanliqini körsetken.

Putin bilen bush uchrashti

Rusiye prézidénti wladimir putin 1-iyuldin 2-iyulghiche özining amérika qoshma ishtatlirigha qaratqan gheyri resmi ziyaritini élip bardi. Putin yekshenbe küni kechte meyin ishtatining atlantik okyan qirghiqigha jaylashqan kénnébunkport dep atalghan jayidiki prézidént jorj bushning xususiy turalghu jayigha yétip kélip, prézidént bush we uning dadisi chong bush hem ularning a'ile-tawabatliri bilen körüshti.

Rusiye metbu'atlirining yézishiche, wladimir putin tunji qétim jorj bushning kénnébunkporttiki öyide méhman bolghan chet el prézidénti bolush bilen birge bush a'ilisining uninggha bundaq illiq we yéqinchiliq körsitishi hemmila prézidéntlargha nésip bolmaydighan ish iken. Bu, krémil-aq saray munasiwetliride, ikki terep menpe'etlirige uyghun chüshenchilerning shekillinishide ehmiyetlik rol oynishi mumkin.

Aq saray bayanatchisi tony snow ikki rehberning bu qétimqi uchrishishi heqqide toxtilip," bu ikki dölet munasiwetlirining muhimliqini körsitidu shuningdek bundaq kengkushade sorunda ikki terepning kengkushade we semimiylik bilen zor mesililer heqqide muzakire élip baridighanliqini chüshendüridu" dep tekitligen.

Xewerlerdin qarighanda, putin bilen bush bashqurulidighan bombidin mudapi'e körüsh sistémisi, kosowa mesilisi, iran yadro pilani mesililiri boyiche ashkara söhbet bayan qilghan bolup, putin rakéta sistémisi mesiliside yawropa döletlirinimu qatnashturushtek yéngi teklip otturigha qoyghan. Iran mesiliside bolsa ortaqliq hasil qilghan.(Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet