Heptilik xewerler (15 - iyuldin 20 - iyulghiche)

Amérika xitay yémekliklirining bixeterlik mesilisini muzakire qildi

Charshenbe küni amérika dölet mejlisining kéngesh palatasi xitay tawarliri bolupmu xitayning yémek-ichmek bixeterlik mesililirini muzakire qilip, bush hökümitining bir qisim erbaplirining ispatlirini anglap ötti.

Nöwette, xitay yémekliklirining bixeterlik mesilisi éghir bolup, filippin qatarliq bir qisim döletler xitay yémekliklirining ölchemge yetmeydighanliqini élan qilghan shuningdek amérikimu bir qisim xitay yémeklirini chekligen idi.

Xelq'ara miqyada xitay mallirini cheklesh

Filipinning yémeklik bashqurush idarisi xitayda ishlen'gen 4 xil yémeklikte rak késilige giriptar qilidighan zeherlik madda barliqini bayqighan. Buning biri üzüm markiliq péchine, yene biri aq toshqan markiliq süt kempiti bolup, bular xitayda birnechche on yildin buyan uda ishliniwatqan hem bazargha séliniwatqan shuningdek chet' ellerge ékisport qiliniwatqan meshhur mehsulatlar hésablinidiken.

Amérika dölet mejliside xitayning yémek-ichmek mehsulatliri mesilisi muzakire qiliniwatqan künlerde qazaqistan bilen Uyghur éli arisidiki alataw éghizida ékisport qilinmaqchi bolghan xitay sodigerlirining 10 ming yéshikke yéqin chish pastisi, ölchemge yetmey qayturuwétilgen. Bundaq xitay tawarlirigha chek qoyush köp döletlerde emelge ashurulmaqta.

Xitay, istanbulda Uyghurche anglitish bashlidi

Türkiyining istanbul shehirini merkez qilghan marmara rayonigha tarqitish qilidighan yön fm radi'osi shinjang xelq radi'osining Uyghur tilidiki anglitishini ulap anglitishqa bashlighan.

Bu xitayning ottura we gherbiy asiyagha radi'o anglitish arqiliq xitayning tereqqiyatini teshwiq qilish pilanining bir qisimi bolup, ilgiri qirghizistan, özbékistanlargha anglitishlarni yolgha qoyghan idi. Bu pilanning türkiyide emelge éshishi her xil inkaslarni qozghidi.

7-Ayning 10-künidin 19-künigiche yene türkiyide türk dunyasi medeniyet bayrimi bolup ötken. Bu jeryanda yene türk dunyasi zhornalistlirining muhakime yighini ötküzülgen.

Pakistanda xitay puqraliri yene hujumgha uchridi

Peyshenbe küni pakistanning jenubidiki xub shehiride, xitay ishchilirini toshuwatqan bir aptomobil partlitiwétilgen. Bu partlashta hujumgha uchrighanlar arisidin az dégende 30 gha yéqin kishi qaza qilghan bolup, saqchilarning perez qilishiche , mezkur hujum xitay puqralirigha qaritilghan bolsimu, biraq partlashta ölgenlerning hemmisi pakistanliqlar iken.

Islam abadtiki qizil meschitni qorshash we hujum qilishning xitay béyjingning perwiz musherrepke bésim körsitishi bilen emelge ashurulghanliqi heqqidiki köz qarashlar pakistan metbu'atlirida körülgendin kéyin, islamiy radikal guruppilarning xitay puqraliridin öch élishqa kirishkenliki heqqide analizlar meydan'gha chiqmaqta hemde bu qétimqi özini öltürüwélish xaraktérliq partlashning shuning ipadisi ikenliki perez qilinmaqta.

Bügür kan rayonidiki apette 11 kishi iz - déreksiz yoqap ketken

18 ‏- Iyul küni chüshtin kéyin sa'et 4 etrapida, Uyghur élining bayin'ghulin aptonom oblasti bügür nahiyisidiki kömür kan rayonida yüz bergen kelkün apitide, kömür kan ‏- gé'ologiye idarisining 161 ‏- etriti 204 ‏- burghilash guruppisining 11 neper ishchisining yoqap ketkenlikini élan qildi.

Hazirghiche ularning iz-dériki heqqide uchur yoq. Emma, ularni izdeshler dawamlashmaqta.

Türkmenistan rehbiri xitayni ziyaret qildi

Türkmenistan prézidénti qurban'gül berdimuhemmedof 16-18- iyul künliri xitayda resmiy ziyarette bolup, xitay dölet re'isi xu jintaw qatarliqlar bilen körüshüp, ikki döletning siyasiy, iqtisadiy we énérgiye munasiwetlirige a'it bir qatar mesililer boyiche söhbet ötküzdi hemde muhim höjjetlerge qol qoydi.

Ikki dölet arisida 30 yilliq möhlet bilen her yili 30 milyard kub métir tebi'iy gaz yetküzüsh heqqide kélishim hasil qilindi . Bu kélishimge bina'en ikki dölet arisida tebi'iy gaz turubisi yasilishi mumkin iken. Xitay we türkmenistan rehberliri yene birleshme bayanat élan qilghan shuningdek Uyghur musteqilchilirini üch xil küch dep qarilap, ulargha ortaq zerbe bérishke pütüshken.

Indi'ana uniwérsitétida Uyghur muqami orundaldi

15 - Iyul küni yeni yekshenbe küni amérikidiki indi'ana uniwérsitétida "yipek yolidiki milletler" namida sen'et körüki ötküzüldi. Mezkur körekke Uyghurlargha wekil bolup amérikida yashawatqan Uyghur muqamchisi , özbékistanda xizmet körsetken artist sultan memet ependi teklip bilen qatniship Uyghur muqami we naxsha ‏- muzikilirini orundidi.

Bu sultan memet ependining tunji qétim indi'ana uniwérsitétidiki bu xil sen'et pa'aliyitige qatnishishi bolsimu, lékin bashqa jaylarda ötküzülgen her xil pa'aliyetlerge izchil qatniship, öz sen'et maharitini namayan qilghan. Indi'ana uniwérsitéti amérikidiki Uyghur tili we Uyghurshunasliq ügütilidighan aliy mekteplerning biridur. (Ümidwar)