Heptilik xewerler (27dékabirdin 2-yanwarghiche)

Muxbirimiz qutlan
2015-01-02
Share
erkin-asiya-radiosi.jpg Erkin asiya radi'osi Uyghur bölümi heptilik xewerliri
Photo: RFA

Amérikadiki Uyghur jama'iti jem bolup 2015-yilni kütüwaldi

31-Dékabir küni kechqurun amérikidiki Uyghur jama'iti paytext washin'gton etrapida jem bolup 2015-yilini daghdughiliq kütüwaldi.

Bu qétimliq yéngi yilni kütüwélish pa'aliyitini amérika Uyghur birleshmisi uyushturdi. Mezkur pa'aliyetke washin'gton etrapida olturaqlashqan Uyghur jama'iti we amérikining bashqa shtatliridin kelgen Uyghurlar qatnashti.

Mezkur pa'aliyet bashlinishi bilen dunya Uyghur qurultiyining re'isi rabiye qadir xanim tebrik sözi sözlidi. U sözide amérikidiki we Uyghurlar wetinini öz ichige alghan pütün dunyadiki Uyghurlarning yéngi yilini tebriklidi.

Pa'aliyet dawamida Uyghur sen'iti boyiche mol mezmunluq programmilar körsitilip, amérikida ösüp-yétiliwatqan yash ewlad Uyghurlargha milliy medeniyet we milliy kimlik qediriyetliri hés qilduruldi.

Kelpin weqesi heqqide torgha uchur yollighan bir Uyghur 17 yilliq qamaqqa höküm qilin'ghan

Igilishimizche, da'iriler uchturpan nahiyiside olturushluq bir Uyghur yashni kelpinde naheq étiwétilgen 17 yashliq abdulbasitning ölüm xewirini ündidargha yollighanliqi seweblik 17 yilliq qamaq jazasigha höküm qilghan.

Melum bolushiche, eyni waqitta kelpin xelqidin bashqa aqsu, uchturpan we bashqa qoshna nahiyelerdiki Uyghur yashlirimu abdulbasitning naheq ölümige küchlük inkas qayturghan.

Radi'omizning xewer tépishiche, uchturpanda olturushluq bir Uyghur yash bu weqe heqqide ündidargha uchur yollighan. U bu uchurida Uyghurlarning bundaq naheqchilikke yene süküt qilmasliqqa chaqirghan.

Aridin uzun ötmey bu kishi uchturpanda tutqun qilin'ghanliqi we 17 yilliq muddetlik qamaq jazasigha höküm qilin'ghanliqi melum.

3 Yashliq abdulla tayland doxturxanisida 45 kün yalghuz yétip qaza qilghan

3 Yashliq abdullaning tubérkulyoz késelliki bilen taylandtiki melum bir doxturxanida qaza qilishi muhajirettiki Uyghur jama'etchilikide küchlük inkas peyda qildi.

Bu xewer eng deslep "Bangkok waqit géziti" de élan qilin'ghandin kéyin, ehwaldin xewerdar kishiler radi'omiz ziyaritini qobul qilip, bu weqening tepsilati heqqide uchur berdi.

Melum bolushiche, 3 yashliq abdulla 10 aydin buyan taylandtiki tutup turush ornida éghir künlerni béshidin ötküzgen we tubérkulyoz késilige giriptar bolghan. U doxturxanigha élip bérilghandin kéyin ata-anisi yaki bashqa héchqandaq uruq-tughqini bolmighan shara'itta 45 kün yétip, tenha halda alemdin ötken.

Abdullaning méyiti hazir taylandtiki melum doxturxanining jeset saqlash tonglatqusida turmaqta iken.

Rabiye qadir xanim xitay hökümitini d u q bilen söhbet ötküzüp, Uyghur mesilisini tinch usulda hel qilishqa chaqirdi

Dunya Uyghur qurultiyining re'isi rabiye qadir xanim "Amérika awazi" we "Erkin asiya radi'osi" da söhbet élan qilip, xitay hökümitini sherqiy türkistan mesilisi boyiche söhbetke kélishke we uni tinchliq bilen hel qilishqa chaqirdi.

Rabiye xanim sözide 2014‏-yilining Uyghurlar üchün intayin qabahetlik we éghir bedellerni töligen bir yil bolghanliqini ilgiri sürdi.

Wehalenki, u Uyghur xelqining tarixtiki eng qiyin bolghan bu ré'alliq ichidin oyghinip, qabahetlik imkansizliqni yéngeleydighanliqini hemde kelgüsige nisbeten ümidwarliq bilen qaraydighanliqini bildürdi.

Rabiye qadir xanim yene, xitay hökümiti bilen xitay xelqini Uyghurlarning öz heq-hoquqlirini telep qilishqa heqliq ikenlikini chüshinishke chaqirdi. Shuning bilen birge yene xitayning Uyghurlarni basturush arqiliq dunyada héchqachan ishenchke we hörmetke sazawer dölet bolalmaydighanliqini tekitlidi.

Nur bekri Uyghur aptonom rayonining re'islikidin qaldurulup xitay döletlik énérgiye idarisining bashliqliqigha yötkelgen

Uyghur aptonom rayonining re'isi nur bekri 31-dékabir küni re'islik wezipisidin qaldurulup, xitay döletlik tereqqiyat-islahat komitétining mu'awin mudiri hem énérgiye idarisining bashliqi wezipisige yötkelgen.

Xewerde déyilishiche, Uyghur aptonom rayonluq xelq qurultiyi da'imiy komitétining mudiri shöhret zakir nur bekrining re'islik wezipisini ötküzüwalghan.

Xitay kompartiyesi nur bekrige yuqiri baha bérip, uning "Intayin qabiliyetlik az sanliq millet kadiri" ikenlikini tekitligen.

Halbuki, xelq'aradiki közetküchiler we muhajirettiki Uyghur jama'etchiliki nur bekri Uyghur élida qorchaq re'is bolghan 7 yilda mutleq köp sanliq Uyghurlarning izchil naraziliq we tenqid obyékti bolup kelgenlikini ilgiri sürmekte.

Da'iriler ilham toxtining a'ilisige uni 6 ayghiche yoqlashqa bolmaydighanliqi uqturghan

Muddetsiz qamaqqa höküm qilin'ghan ilham toxtining mehbuslar behrimen bolushqa tégishlik eng töwen hoquq ‏- a'ilisidikiler bilen qerellik körüshüsh imkaniyitidin mehrum qilinishi jem'iyette qattiq naraziliq qozghighan.

Ilham toxtining ayali güzelnur xanimning radi'omizgha bildürüshiche, qamaqtiki ilham toxti 12-dékabir künidin bashlap ürümchi 1-türmisige yötkelgen.

Türme da'iriliri güzelnur xanimgha yazma uqturush ewetip, 2015-yil 6-ayning 15-künige qeder uning we bashqa uruq-tughqanlirining türmige kélip ilham toxtini yoqlishigha bolmaydighanliqini uqturghan. Uningda yene türme sirtidin ilham toxtigha kiyim-kéchek ewetishkimu ruxset qilinmaydighanliqi alahide eskertilgen.

Güzelnur xanim türme da'irilirige téléfon qilip sewebini sürüshtürgen bolsimu, lékin qayil qilarliq jawabqa érishelmigen.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet