Һәптилик хәвәрләр (29-декабирдин 4-январғичә)

Мухбиримиз әзиз
2019-01-04
Елхәт
Пикир
Share
Принт
Қариқашта өстәңгә чүшүп кетип қаза қилған бала.
Қариқашта өстәңгә чүшүп кетип қаза қилған бала.
Social Media

Қарақаштики лагер мәһбуслиридин банухан розимәмәт түрмидә җан үзгән

Уйғур дияридики сиясий бастурушта лагерларға қамалған кишиләрниң начар турмуш шараити сәвәбидин көпләп җан үзүватқанлиқи мәлум болмақта. Йеқинда қарақаш наһийәсиниң зава йезисидики банухан розимәмәт исимлик бир аялниң өткән һәптидә түрмидә җан үзгәнлики ашкариланди.

Мухбиримизниң әһвал ениқлиши җәрянида бануханниң «топлишип тәблиғ аңлаш» җинайити билән әйибләнгәнлики вә 11 йиллиқ қамаққа һөкүм қилинғанлиқи мәлум болди.

Мәлум болушичә, нөвәттә лагерға қамалғанларға «күчәйтип тәрбийәләш» намида җаза һөкүм қилиниватқан болуп, бу хилдики кишиләргә адәттә он йилдин артуқ қамақ җазаси берилидикән.

Өстәңдә тоңлап қалған гөдәкниң ата-аниси лагерда икәнлики мәлум болди

Йеқинда иҗтимаий таратқуларда қарақаш наһийәсидики икки яшлиқ бир оғул балиниң өстәңдә тоңлап өлүп кәткәнлики һәққидә бир хәвәр кәң тарқалди. Мухбиримизниң бу һәқтики әһвал ениқлиши җәрянида бу балиниң ата-анисиниң лагерға қамалғанлиқи мәлум болди.

Мәлум болушичә, мәзкур гөдәкниң исми рәһмитулла ширбақи болуп, қарақашниң чоканҗилға кәнтидин икән.

Рәһмитулланиң бовиси вә момиси алақидар сақчи орунлириниң тәстиқини елип рәһмитуллани бир йерим йилдин буян лагерда туруватқан ата-аниси билән көрүштүрүшкә 20 қетим елип барған болсиму, әмма лагер башқурғучилири көрүштүрмигән икән.

Уйғурларни хитай мәдәнийитини қобул қилишқа мәҗбурлаш әвҗ алмақта

Йеқинда лагерға қамалған уйғурларниң хитай мәдәнийитини қобул қилишқа мәҗбурлиниватқанлиқи көпләп мәлум болди. Хитай һөкүмитиниң рәсмий мәлуматлирида пәйзиват наһийәсидики лагерға қамалған уйғурларниң «бейҗиң тиятири» ни өгинип, хитайчә чаңчилә ойнашқа тәшкилләнгәнлики хәвәр қилинди.

Алақидар учурларда көрситилишичә, уйғур тили мәктәпләрдә омумйүзлүк чәклиниватқанда уйғурчә тил вә йезиқни ишлитишниң «икки йүзлимичилик» ниң ипадиси болуп қалғанлиқи мәлум.

Һалбуки, нөвәттә атуш шәһири қатарлиқ бир қисим җайларда уйғурлар хитайчә һөснхәтләрни өгинишкә тәшкилләнгән. Анализчилар бу һәқтә тохтилип, «бу уйғурларни ассимилятсийә қилишни техиму тезлитип, йәрлик миллий мәдәнийәтни йоқитишни мәқсәт қилғанлиқ,» деди.

Истанбул айродромида тутуп турулуватқан уйғурлар әркинликкә чиқти

Икки айдин көпрәк вақиттин буян истанбул айродромида тутуп турулуватқан 11 уйғур йеңи йил һарписида қоюп берилип, түркийәгә киришкә рухсәт қилинди. Мәлум болушичә, булар тайланд түрмисидин қечип малайсия арқилиқ түркийәгә кәлгән қачқун уйғурлар болуп, истанбул айродромида тосуп қелинған икән.

Бу уйғур қачқунларниң түркийәгә кириши үчүн «ийи» партийәсидин болған парламент әзаси пәхридин йоқуш әпәнди вә башқа алақидар затлар көп күч чиқарған.

Түркийә билән хитай оттурисидики һәмкарлиқниң күчийишигә әгишип, уйғурлар мәсилиси техиму назук түс еливатқанда бу хил иҗабий илгириләшниң оттуриға чиқиши көп қисим түрк хәлқиниң, шундақла уйғур муһаҗирлириниң қизғин алқишиға еришти.

Уйғурлар дияридики лагерлар һәққидә әрәб дунясидин тунҗи қетим аваз чиқти

Уйғурларниң пүткүл милләт бойичә «етник тазилаш» қа дуч келиши һәққидә америка вә явропадики бир қисим һөкүмәтләр күчлүк инкас қайтурғандин кейин әрәб дунясидин бу мәсилә һәққидики тунҗи сада кувәйт парламентидин чиқти.

1-январ күни кувәйт парламентиниң муавин рәиси усамә шаһин парламенттики бир қетимлиқ йиғинда уйғур дияридики лагерларға мунасивәтлик рәсимләрни көрситип туруп уйғурлар учраватқан күлпәтләрни, шуниңдәк хитай һөкүмитиниң җинайәтлирини баян қилди.

Дуня уйғур қурултийиниң рәиси долқун әйса бу мунасивәт билән радийомиз мухбириниң зияритини қобул қилип, буниң ислам әллиридә барлиққа кәлгән тунҗи қетимлиқ иҗабий илгириләш икәнликини билдүрди.

Түрк җамаитиниң уйғурларни қоллаш садалири күчәймәктә

Түркийәдики әң чоң аммиви тәшкилатлардин болған «кадирлар уюшмиси» вә «түрк оҗақлири» тәшкилати уйғурлар учраватқан зулум һәққидә доклат бериш паалийити вә намайишлар өткүзди.

Болупму истанбулдики фатиһ җамәсидә өткән җүмә күнидики җүмә намизидин кейин бәш миңчә кишиниң иштирак қилиши билән өткүзүлгән зор намайишта уйғурларни қоллаш вә хитайни әйибләш шоарлири яңриди.

Түрк җамаитиниң уйғурларни қоллаш паалийәтлири түркийә чеграсидин һалқип, германийәдики түрк җамаитиниң намайишлиридиму әкс әтти. Германийәниң нуренбург шәһиридики түрк җамаити 29-декабир күни өзлүкидин қозғилип хитай һөкүмитиниң уйғурларни бастурушиға наразилиқ билдүрүп зор көләмлик намайиш өткүзди.

Толуқ бәт