Һәптилик хәвәрләр (19-январдин 25-январғичә)

Мухбиримиз җүмә
2013.01.25

Үрүмчидә мал баһасиниң өрлиши хитай бойичә әң алдида

Санлиқ мәлуматларға қариғанда, үрүмчидә мал баһаси хитай бойичә әң юқири нисбәттә өрлигән болуп, бу көплигән уйғурларниң күндилик турмушиға қийинчилиқларни туғдурған.

Рабийә қадир сода сарийи әтрапидики мәлум уйғур ашханиси хоҗайини гөш баһаси юқири өрлигәнликтин содисиға еғир тәсир йәткәнликини билдүрди.

Үрүмчи аһалилиридин игилишимизчә, нөвәттә үрүмчидә аддий турмуш чиқимини қамдаш үчүн ейиға әң аз дегәндә 5 миң сом кетидикән. Көпинчәйләнниң һали буниңға яр бәрмәйдикән.

Уйғур диярида ислами йосунда кийим тикиш чәклимигә учримақта

Уйғур аптоном райони даирилири уйғур аялларниң ислами йосунда кийинишини чәкләш үчүн һәр қайси җайлиридики кийим тикиш дуканлириға “10 ға йол қоймаслиқ вәдинамиси” яздурған.

Бу һәқтики инкаслардин мәлум болушичә, вәдинамидә “һиҗап түсидики кийимләрни тикип сетишқа йол қоймаслиқ, чүмбәл артқан вә сақал қойғанларни яллап ишләтмәслик” қатарлиқ мәзмунларму бар икән.

Ақсуниң мәлум наһийисидики бир кийим тиккүчи һөкүмәт тармақлириниң рухситисиз диний йосундики кийим буйрутмилирини алмайдиғанлиқини билдүрди.

Доктор әсәт сулайман: тарихи савақларни йәкүнләш уйғур миллий дәвасиға пайдилиқ

Шинҗаң университетиниң сабиқ профессори доктор әсәт сулайман “ели султанлиқи” дин алған тарихи савақларни йәкүнләшниң уйғур миллий дәваси үчүн муһим әһмийәткә игә икәнликини билдүрди.

У, бу сөзләрни 1-айниң 20-күни шветсийә уйғур маарип уюшмисида сөзлигән лексийидә оттуриға қойди.

Әсәт сулайманниң билдүрүшичә, “ели султанлиқи” уйғур тарихидики әң паҗиәлик ахирлашқан һакимийәтләрниң бири болуп, 7 йил ичидә 5 қетим падишаһ алмашқан икән.

Шветсийә уйғур маарип уюшмиси шветсийидә яшаватқан уйғур яшлириниң иҗтимаий вә тарихи билимлирини ашуруш үчүн өткән йилниң ахиридин башлап һәр айда бир қетим лексийә орунлаштуруп кәлмәктә.

“уйғурсофт” ширкити тор бети тақилип қалған

Биз игилигән учурларға қариғанда, “уйғурсофт” ширкити тор бети тақилип, 19-январдин башлап ечилмиған.

Бәзи гуманларға қариғанда, “уйғурсофт” мунбиридә йеңи нәшр қилинған “қурани кәрим” һәққидә муназириләр өткүзүлгән вә “қурани кәрим” ниң йеңи нәшридә садир болған бәзи мәсилиләр тәнқид қилинған болғачқа, “уйғурсофт” тор бети тақилип қалған болуши мумкин.

Ширкәт ториниң техникилиқ сәвәбләр түпәйли тақилип қалғанлиқи вә яки сиясий сәвәбләр билән тақап қоюлғанлиқи һазирчә мәлум әмәс.

Шәрқий түркистан вәхпиниң һәйәт гурупписи қайта тәшкилләнди

2013-Йили 1-айниң 19-күни истанбулдики шәрқий түркистан вәхпиниң рәһбәрлик һәйити қайта сайлап чиқилди.

Беләт ташлаш нәтиҗисидә, әсәр сака юқири аваз билән вәхпи рәисликигә, абдуҗелил туран әпәнди муавин рәисликкә сайланди.

Йиғинға 21 қурғучи әзадин 11 киши қатнашти, бәш қурғучи әза вакаләт хети әвәтти.

Шәрқий түркистан вәхпи түркийидә әң бурун қурулған шәрқий түркистан тәшкилатлиридин биридур.

Явропа парламентида уйғур ғайиблар мәсилиси оттуриға қоюлди

24-январ явропа парламентида дуня бойичә из-дерәксиз ғайиб болғанлар мәсилиси һәққидә ечилған йиғинда уйғур ғайиблар мәсилиси оттуриға қоюлди.

Йиғинда дуня уйғур қурултийиниң муавин рәиси өмәр қанат уйғур ғайиблар һәққидә омумий мәлумат бәрди.

Йиғинда ғайиблардин асаслиқ имаммәт ели, алим рози вә нәбиҗан ели қатарлиқ 3 нәпәр ғайибниң әһвали тәпсилий сүрәтлик тонуштурулғандин башқа, ғайиблар аилә-тавабиатлири учраватқан зулумлар һәққидиму мәлумат берилди.

Йиғинни явропа парламенти кишилик һоқуқ комитети билән вакаләтсиз милләтләр тәшкилати бирликтә уюштурған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.