Heptilik xewerler (26-yanwardin 1-féwralghiche)

Muxbirimiz eziz
2019-02-01
Élxet
Pikir
Share
Print
Muddetsiz qamaq jazasigha höküm qilin'ghan Uyghur ziyaliysi ilham toxti ependi.
Muddetsiz qamaq jazasigha höküm qilin'ghan Uyghur ziyaliysi ilham toxti ependi.
AP

Türkiyediki oqughuchi memetyüsüp raxmanning lagérda ikenliki delillendi

Yéqinda ijtima'iy taratqularda türkiyening bülent ejewit uniwérsitétida éléktr inzhénérliqi kespide oquwatqan memetyüsüp raxmanning 2017-yili 1-yanwar küni istanbuldin ürümchige qarap uchqandin kéyinla iz-dériki yoqalghanliqi xewer qilin'ghan.

Muxbirimizning téléfon ziyaretliri dawamida memetyüsüp raxmanning atushning azaq yéza ong'ériq kentige nopusluq ikenliki we nöwette atushtiki yighiwélish lagérida ikenliki delillendi.

Melum bolushiche, 1995-yili tughulghan memetyüsüp raxman bir mehel "Dutar shahi" dep nam alghan abduréhim héytqa shagirt bolghan iken. Shuningdek türkiyede Uyghur muzika medeniyitini tonushturup belgilik tesir qozghighan iken.

Tijaretchi memetjan éli jinaza namizida tekbir ishariti qilghanliqi üchün tutulghan

Yéqinda atush shehiride olturushluq tijaretchi memetjan élining lagérgha élip kétilishide uning 15 yil ilgiriki bir jinaza namizida tekbir éytqanliqi seweb bolghanliqi aydinglashti.

Melum bolushiche, memetjan éli we ömer éli aka-ukilar ottura asiyada tijaret qilghanlar bolup, alaqidar orunlarning qaytip kélish heqqidiki téléfonliri boyiche yurtigha qaytqan iken.

Xitay hökümiti élan qilghan "Diniy esebiylikning 75 xil alamiti" namliq qollanmigha Uyghurlarning turmush we medeniyitige munasiwetlik köpligen hadisiler kirgüzülgen bolup, buningda köpligen diniy adetler "Esebiylik" dep békitilgen.

Sénator bob ménéndiz xitay hökümitini Uyghur élidiki yighiwélish lagérlirini ayaghlashturushqa chaqirdi

Yéqinda amérika kéngesh palatasining ezaliridin bop ménéndiz ependi amérikidiki dangliq axbarat wastiliridin bolghan CNN ning mexsus ziyaritini qobul qilip, Uyghurlarning hazirqi weziyiti heqqide muhim melumatlarni berdi.

Bop ménéndiz ependi bu qétimqi ziyarette Uyghur diyaridiki lagérlarni "Yighiwélish lagéri" dep atidi. Shuningdek nöwette bir milyondin köp Uyghurning lagérlargha qamilishini xitay hökümitining nöwettiki siyasetlirining muqeddimisi bolushi mumkin, dédi.

Bu qétimqi ziyaret jeryanida bop ependi yene "Uyghur kishilik hoquq qanun layihesi" ning qisqiche mezmunini tonushturup, xitay hökümitige dawamliq bésim qilishning zörürlükini tekitlidi.

Gherb tetqiqatchiliri xitaydin senuber tursun qatarliq Uyghur serxillirini qoyup bérishni telep qildi

Yawropada Uyghur medeniyiti we sen'iti heqqidiki tetqiqat bilen shughulliniwatqan 40 nechche alim we mutexessis birleshme bayanat élan qilip senewer tursun qatarliq lagérgha qamalghan Uyghur serxillirini tézdin qoyuwétishni telep qildi.

Yawropa we amérikidiki alimlar imza qoyghan bu qétimqi birleshme bayanat 28-yanwar küni bélgiyediki dangliq gézitlerdin bolghan "Höriyet" gézitide élan qilindi.

Xitay hökümiti izchil özlirining "Térrorluq we esebiylik" ke qarshi küresh qiliwatqanliqini pesh qilip kéliwatqan bolup, nöwette bu xildiki bayanatlarning élan qilinishi xitay hökümitining dunyani aldash meqsidige yételmigenlikini biwaste körsetti.

Bulghariye sot mehkimisi besh neper Uyghurni xitaygha qayturmasliqni höküm qildi

2017-Yili iyulda besh neper Uyghur yash "Qanunsiz chégradin ötken" dégen eyib bilen bulghariyede tutqun qilin'ghan idi. Shuningdin buyan d u q we bashqa kishilik hoquq teshkilatlirining pa'al küch chiqirishi bilen yéqinda bulghariye sot mehkimisi besh Uyghurni xitaygha qayturmasliq heqqide qarar alghan.

Melum bolushiche, bu besh Uyghur yash xitay hökümitining türlük bésimliri sewebidin öz yurtini terk étip, türkiyege chiqqanlar iken.

Ularning bu qétimqi kechmishi türkiyediki Uyghurlargha yawropagha bérishta qanunsiz yol arqiliq méngishning éghir bedellerge apiridighanliqini yene bir qétim esletti.

Ilham toxti "Nobél tinchliq mukapati" ning namzatliqigha körsitildi

Yéqinda amérika dölet mejlisi ezaliri Uyghurlarning heq we hoquqliri üchün ashkara söz qilip muddetsiz qamaq jazasigha höküm qilin'ghan Uyghur ziyaliysi ilham toxtini 2019-yilliq "Nobél tinchliq mukapati" ning namzatliqigha körsetti.

Bu qétim amérika dölet mejlisining ezaliridin marko rubiyo, koriy gardnér qatarliq 13 kishi nobél tinchliq mukapati komitétigha birleshme mektup yollap, "Bir milyondin artuq Uyghur lagérgha qamalghan mushundaq weziyette ilham toxti nobél tinchliq mukapatigha eng layiq bir namzat" dep körsetti.

Melum bolushiche, ötken hepte yawropadiki birnechche xelq'araliq teshkilat bayanat élan qilip, ilham toxtini 2019-yilliq "Rafto kishilik hoquq mukapati" gha namzatliqqa körsetken idi.

Pikirler (0)
Share
Toluq bet