Heptilik xewerler (16-féwraldin 22-féwralghiche)

Muxbirimiz eziz
2019-02-22
Élxet
Pikir
Share
Print
Dolqun eysa we ömer qanat ependiler amérika xelq'araliq diniy ishlar bash elchisi sam brownbek ependim bilen birge. 2019-Yili 15-féwral. Washin'gton, amérika.
Dolqun eysa we ömer qanat ependiler amérika xelq'araliq diniy ishlar bash elchisi sam brownbek ependim bilen birge. 2019-Yili 15-féwral. Washin'gton, amérika.
RFA

Bir qisim Uyghur tutqunlarning ichki mongghuldiki türmilerge yötkelgenliki delillendi

"Zimistan" tori yéqinda Uyghur diyaridin zor sandiki mehbuslarning xitay ölkiliridiki türmilerge yötkelgenlikini xewer qilghan idi. Muxbirimizning bu heqtiki ehwal éniqlishi dawamida buningdin birnechche ay ilgiri bir türküm Uyghur mehbuslarning ichki mongghuldiki türmilerge yötkep kélin'genliki ashkarilandi.

Alaqidar xadimlarning bildürüshiche, ichki mongghulgha yötkelgen bu Uyghur mehbuslarning tashqi dunyadikiler bilen alaqe qilishi men'i qilin'ghan bolup, ularni bashqurush ishliri "Dölet mexpiyetliki" qatarida bir yaqliq qilinmaqta iken.

"Intil" mektipining qurghuchisi ablet abdullaning tutulghanliqi ilgiri sürülmekte

Uyghur diyarida barghanséri yuqiri pellige chiqiwatqan zor tutqunda elge tonulghan saxawetchilerning biri, "Intil" mektipining qurghuchisi ablet abdullaningmu lagérgha élip kétilgenliki algha sürülmekte.

Bu yil 32 yashqa kirgen ablet abdulla öz aldigha igilik tiklep bay bolghandin kéyin 70 nechche muntizim oqutquchisi bolghan "Intil" kespiy téxnika mektipi échip, bir qisim namrat Uyghur oqughuchilarni heqsiz ma'arip bilen temin étip kelgen iken.

Analizchilar "Ablet abdullagha oxshash xitay hökümitining teqdirlishige muyesser bolghan bir saxawetchiningmu lagérgha solinishi lagérlarning heqiqiy xaraktérini yene bir qétim éniq körsitip béridu," dédi.

Ishqiyar abduréhimning bayanliri Uyghurlarning hazirqi ehwalini eks ettürmekte

Uyghur jem'iyiti duch kéliwatqan mislisiz basturushning Uyghur a'ililirini qanchilik xaniweyran qiliwatqanliqi ishqiyar abduréhimning bayanlirida yene bir qétim tipik halda eks etti.

Hazir türkiyede yashawatqan ishqiyar abduréhimning a'ile ezaliri 1997-yilidiki ghulja "5-Féwral paji'esi" mezgilidila qamaqqa höküm qilin'ghan. Yéqinda u qérindashliri we biwasite tughqanliridin 35 kishining lagérda we türmide ikenlikini éniqlap chiqqan.

Melum bolushiche, ishqiyar abduréhimning a'ilisi izchil "Nuqtiliq a'ile" bolup kelgen bolup, nöwettiki basturushta bu xil a'ililer éghir bedellerni tölimekte iken.

Xitay hökümitining kanadada Uyghurlar mesilisige qol tiqishi zor ghulghula qozghidi

Ötken hepte kanadadiki Uyghur pa'aliyetchi ruqiye turdushning mek-mastér uniwérsitétida Uyghurlar mesilisi heqqide léksiye bérish pa'aliyiti xitay oqughuchilarning qarshiliqi we öktemlik qilishigha duch kelgen idi.

Kéyinche bu ishlargha kanadadiki xitay elchixanisining biwasite arilashqanliqi we oqughuchilargha bu heqte qandaq körsetme bergenliki ashkara boldi.

Weqedin kéyin bu ehwal amérika we yawropadiki chong axbarat wasitiliride mexsus xewer qilinip, xitay hökümitining xitay oqughuchilar arqiliq chet'ellerdiki Uyghur dawasigha qandaq qol tiqiwatqanliqi heqqide chong ghulghula qozghaldi.

D u q rehberliri washin'gtonda muhim uchrishishlarda boldi

Aldinqi heptide amérikigha xizmet ziyariti üchün kelgen d u q ning re'isi dolqun eysa washin'gton shehiride amérika hökümitining bir qisim yuqiri derijilik xadimliri bilen uchrashqan hemde Uyghurlar mesilisi toghriliq pikir almashturghan.

Bu qétimliq uchrishishta d u q rehberliri amérika dölet mejliside tonushturulmaqchi bolghan Uyghurlargha da'ir ikki qanun layihesige munasiwetlik ishlarni tepsiliy muzakire qilghan.

Melum bolushiche, bu qétimqi uchrishishtin bashqa d u q rehberliri yene washin'gton shehiridiki axbarat wasitiliri we ilmiy teshkilatlar bilenmu uchriship, Uyghurlar mesilisining hazirqi ehwalini tonushturghan.

Amérika aliy mektepliride Uyghurlar mesilisi köplep tonushturuldi

Uyghurlar duch kéliwatqan siyasiy basturushlar heqqide aliy bilim yurtliridiki oqughuchi we oqutquchilargha melumat bérish meqsitide mushu hepte ichide amérikidiki indiyana uniwérsitéti we pénsilwaniye uniwérsitétida mexsus muhakime yighinliri ötküzüldi.

Indiyana uniwérsitétida ötküzülgen "Terbiyelesh lagéridiki Uyghurlar" témisidiki yighinda Uyghurlar diyarining hazirqi weziyiti, lagérlarda némiler boluwatqanliqi hemde Uyghurlar üchün némilerni qilish mumkinliki qatarliq mesililer muhakime qilindi.

Pénsilwaniye uniwérsitétida ötküzülgen bir künlük mexsus yighinda xitayning ötken ottuz yil mabeynide insan heqlirini qaysi derijide ayaq-asti qilip kelgenliki, bu jeryanda Uyghurlarning qandaq bedel töligenliki hem tölewatqanliqi tepsiliy muzakire qilindi.

Pikirler (0)
Share
Toluq bet